ਵਿਸ਼ਵ ਕੱਪ ਨੇ ਤੋੜੀ ਭਾਸ਼ਾ ਦੀ ਕੰਧ: ਸਪੈਨਿਸ਼ ਕਮੈਂਟਰੀ ਦੇ ਹੋਏ ਅੰਗਰੇਜ਼ੀ ਦਰਸ਼ਕ ਵੀ ਦੀਵਾਨੇ
ਅਜੀਤ ਡੈਸਕ
12-07-2026
ਨੀਲਸਨ ਰੇਟਿੰਗਾਂ ਅਨੁਸਾਰ, ਅਮਰੀਕਾ ਵਿੱਚ ਵਿਸ਼ਵ ਕੱਪ ਦੇ ਲਗਭਗ ਅੱਧੇ ਦਰਸ਼ਕਾਂ ਨੇ ਘੱਟੋ-ਘੱਟ ਇੱਕ ਮੈਚ ਸਪੈਨਿਸ਼ ਕਮੈਂਟਰੀ ਨਾਲ ਦੇਖਿਆ ਹੈ। ਜਦਕਿ ਹਰ ਮੈਚ ਅੰਗਰੇਜ਼ੀ ਵਿੱਚ ਵੀ ਉਪਲਬਧ ਹੈ, ਫਿਰ ਵੀ ਦਰਸ਼ਕ ਸਪੈਨਿਸ਼ ਪ੍ਰਸਾਰਣ ਨੂੰ ਵਧੇਰੇ ਰੋਮਾਂਚਕ ਅਤੇ ਭਾਵਨਾਤਮਕ ਮੰਨ ਰਹੇ ਹਨ।ਨ ਦਰਸ਼ਕਾਂ ਨੂੰ ਖ਼ਾਸ ਤੌਰ ‘ਤੇ ਮਸ਼ਹੂਰ ਕਮੈਂਟੇਟਰ ਆਂਦਰੇਸ ਕੈਂਟੋਰ ਦੀ ਜੋਸ਼ ਨਾਲ ਭਰੀ “ਗੋਓਓਓਲ!” ਦੀ ਆਵਾਜ਼ ਖਿੱਚਦੀ ਹੈ। ਇਸ ਤੋਂ ਇਲਾਵਾ ਟੈਲੀਮੁੰਡੋ ਹਾਈਡ੍ਰੇਸ਼ਨ ਬ੍ਰੇਕ ਦੌਰਾਨ ਵਿਗਿਆਪਨ ਨਹੀਂ ਦਿਖਾਉਂਦਾ, ਜਿਸ ਨਾਲ ਮੈਦਾਨ ਵਿੱਚ ਖਿਡਾਰੀਆਂ ਦੀਆਂ ਗੱਲਾਂ, ਕੋਚਾਂ ਦੀਆਂ ਪ੍ਰਤੀਕਿਰਿਆਵਾਂ ਅਤੇ ਮੈਚ ਦਾ ਤਣਾਅ ਲਗਾਤਾਰ ਦਰਸ਼ਕਾਂ ਤੱਕ ਪਹੁੰਚਦਾ ਰਹਿੰਦਾ ਹੈ।
ਇੰਡੀਆਨਾ ਦੀ ਐਸ਼ਲੀ ਹਾਲਮ, ਜੋ ਅੰਗਰੇਜ਼ੀ ਭਾਸ਼ਾ ਪੜ੍ਹਾਉਂਦੀ ਹੈ, ਕਹਿੰਦੀ ਹੈ ਕਿ ਭਾਵੇਂ ਉਹ ਹਰ ਸ਼ਬਦ ਨਹੀਂ ਸਮਝਦੀ, ਪਰ ਖੇਡ ਦਾ ਰੋਮਾਂਚ ਅਤੇ ਮਾਹੌਲ ਪੂਰੀ ਤਰ੍ਹਾਂ ਮਹਿਸੂਸ ਕਰ ਲੈਂਦੀ ਹੈ। ਮਿਸ਼ੀਗਨ ਦੇ ਜੈਕਸਨ ਬ੍ਰਾਊਨੀਅਸ ਨੇ ਵੀ ਕਿਹਾ ਕਿ ਕਮੈਂਟੇਟਰ ਦੀ ਆਵਾਜ਼ ਦਾ ਉਤਾਰ-ਚੜ੍ਹਾਅ ਹੀ ਦੱਸ ਦਿੰਦਾ ਹੈ ਕਿ ਮੈਚ ਵਿੱਚ ਗੋਲ ਹੋਣ ਵਾਲਾ ਹੈ ਜਾਂ ਨਹੀਂ। ਮਸ਼ਹੂਰ ਕਾਮੇਡੀਅਨ ਟ੍ਰੇਵਰ ਨੋਆ ਨੇ ਵੀ ਸਪੈਨਿਸ਼ ਪ੍ਰਸਾਰਣ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਵਿਗਿਆਪਨਾਂ ਤੋਂ ਬਿਨਾਂ ਮੈਚ ਦੇ ਹਰ ਪਲ ਨੂੰ ਦੇਖਣਾ ਦਰਸ਼ਕਾਂ ਨੂੰ ਖੇਡ ਨਾਲ ਹੋਰ ਨੇੜੇ ਜੋੜਦਾ ਹੈ। ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਇਹ ਨਵਾਂ ਰੁਝਾਨ ਸਾਬਤ ਕਰਦਾ ਹੈ ਕਿ ਫੁੱਟਬਾਲ ਦੀ ਅਸਲ ਭਾਸ਼ਾ ਸ਼ਬਦ ਨਹੀਂ, ਸਗੋਂ ਜਜ਼ਬਾ, ਰੋਮਾਂਚ ਅਤੇ ਭਾਵਨਾਵਾਂ ਹਨ। ਇਹੀ ਕਾਰਨ ਹੈ ਕਿ ਵਿਸ਼ਵ ਕੱਪ ਦੀ ਧੜਕਣ ਹੁਣ ਭਾਸ਼ਾ ਦੀਆਂ ਹੱਦਾਂ ਤੋਂ ਪਰੇ ਪਹੁੰਚ ਚੁੱਕੀ ਹੈ।
