ਵਿਸ਼ਵ ਕੱਪ ਦੌਰਾਨ ਮਨੁੱਖੀ ਤਸਕਰੀ ’ਤੇ NYPD ਦਾ ਵੱਡਾ ਵਾਰ, 7 ਨਾਬਾਲਗਾਂ ਸਮੇਤ 43 ਲੋਕ ਬਚਾਏ

ਅ

ਅਜੀਤ ਡੈਸਕ 24-07-2026

ਨਿਊਯਾਰਕ, 23 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ )- ਫੀਫਾ ਵਿਸ਼ਵ ਕੱਪ ਦੌਰਾਨ ਨਿਊਯਾਰਕ ਖੇਤਰ ਵਿਚ ਮਨੁੱਖੀ ਤਸਕਰੀ ਵਿਰੁੱਧ ਚਲਾਈ ਮੁਹਿੰਮ ਤਹਿਤ ਪੁਲਿਸ ਨੇ 7 ਨਾਬਾਲਗਾਂ ਸਮੇਤ 43 ਲੋਕਾਂ ਨੂੰ ਬਚਾਇਆ ਹੈ। NYPD ਅਨੁਸਾਰ 87 ਵੱਖ-ਵੱਖ ਕਾਰਵਾਈਆਂ ਦੌਰਾਨ ਤਸਕਰੀ ਨਾਲ ਜੁੜੇ ਹੋਣ ਦੇ ਸ਼ੱਕ ਹੇਠ 89 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਇਹ ਮੁਹਿੰਮ 11 ਜੂਨ ਤੋਂ 19 ਜੁਲਾਈ ਤੱਕ ਚਲਾਈ ਗਈ। ਬਚਾਏ ਗਏ ਲੋਕਾਂ ਵਿੱਚੋਂ ਜ਼ਿਆਦਾਤਰ ਕਥਿਤ ਤੌਰ ’ਤੇ ਜਿਨਸੀ ਸ਼ੋਸ਼ਣ ਲਈ ਮਜਬੂਰ ਕੀਤੇ ਗਏ ਸਨ। ਪੀੜਤਾਂ ਨੂੰ ਹੁਣ ਰਿਹਾਇਸ਼, ਭੋਜਨ, ਕਾਊਂਸਲਿੰਗ ਅਤੇ ਹੋਰ ਜ਼ਰੂਰੀ ਸਹਾਇਤਾ ਮੁਹੱਈਆ ਕਰਵਾਈ ਜਾ ਰਹੀ ਹੈ।ਪੁਲਿਸ ਦਾ ਕਹਿਣਾ ਹੈ ਕਿ ਇਨ੍ਹਾਂ ਕਾਰਵਾਈਆਂ ਤੋਂ ਕਈ ਨਵੇਂ ਸੁਰਾਗ ਮਿਲੇ ਹਨ ਅਤੇ ਕੁਝ ਮਾਮਲਿਆਂ ਦੀ ਜਾਂਚ ਅਜੇ ਜਾਰੀ ਹੈ। ਵਿਸ਼ਵ ਕੱਪ ਦੇ ਅੱਠ ਮੁਕਾਬਲੇ ਨਿਊਜਰਸੀ ਦੇ ਮੈਟਲਾਈਫ ਸਟੇਡੀਅਮ ਵਿੱਚ ਖੇਡੇ ਗਏ ਸਨ। ਵੱਡੀ ਭੀੜ ਅਤੇ ਸੈਲਾਨੀਆਂ ਦੀ ਆਵਾਜਾਈ ਨੂੰ ਦੇਖਦਿਆਂ ਸੁਰੱਖਿਆ ਏਜੰਸੀਆਂ ਨੇ ਕਈ ਸਾਲ ਪਹਿਲਾਂ ਹੀ ਤਿਆਰੀ ਸ਼ੁਰੂ ਕਰ ਦਿੱਤੀ ਸੀ।
ਅਮਰੀਕੀ ਹੋਮਲੈਂਡ ਸਕਿਉਰਿਟੀ ਵਿਭਾਗ ਮੁਤਾਬਕ ਵਿਸ਼ਵ ਕੱਪ ਦੌਰਾਨ ਦੇਸ਼ ਭਰ ਵਿੱਚ ਮਨੁੱਖੀ ਤਸਕਰੀ ਨਾਲ ਸਬੰਧਤ 673 ਤੋਂ ਵੱਧ ਗ੍ਰਿਫ਼ਤਾਰੀਆਂ ਹੋਈਆਂ। ਇਸੇ ਮੁਹਿੰਮ ਦੌਰਾਨ 61 ਬਾਲਗਾਂ ਅਤੇ 13 ਨਾਬਾਲਗਾਂ ਨੂੰ ਬਚਾਉਣ ਦਾ ਦਾਅਵਾ ਕੀਤਾ ਗਿਆ ਹੈ।