ਬੱਚਿਆਂ ਨੂੰ ਸੋਸ਼ਲ ਮੀਡੀਆ ਦੀ ਲਤ ਲਾਉਣ ਦੇ ਦੋਸ਼
ਨਿਊਯਾਰਕ, 23 ਅਗਸਤ (ਰਾਜੂ ਸਾਹਿਬਾਜ਼ਪੁਰਾ)- ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਦੀ ਮਾਲਕ ਕੰਪਨੀ ਮੈਟਾ ਖ਼ਿਲਾਫ਼ ਅਮਰੀਕਾ ਦੇ 29 ਰਾਜਾਂ ਵਲੋਂ ਬੱਚਿਆਂ ਦੀ ਸੁਰੱਖਿਆ ਅਤੇ ਨਿੱਜਤਾ ਨਾਲ ਜੁੜਿਆ ਵੱਡਾ ਮੁਕੱਦਮਾ ਚਲਾਇਆ ਜਾ ਰਿਹਾ ਹੈ। ਕੈਲੀਫੋਰਨੀਆ, ਕੋਲੋਰਾਡੋ, ਕੈਂਟਕੀ ਅਤੇ ਨਿਊ ਜਰਸੀ ਬਾਕੀ ਰਾਜਾਂ ਵਲੋਂ ਇਸ ਕੇਸ ਦੀ ਪੈਰਵੀ ਕਰ ਰਹੇ ਹਨ।
ਨਿਊਯਾਰਕ, 23 ਅਗਸਤ (ਰਾਜੂ ਸਾਹਿਬਾਜ਼ਪੁਰਾ)- ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਦੀ ਮਾਲਕ ਕੰਪਨੀ ਮੈਟਾ ਖ਼ਿਲਾਫ਼ ਅਮਰੀਕਾ ਦੇ 29 ਰਾਜਾਂ ਵਲੋਂ ਬੱਚਿਆਂ ਦੀ ਸੁਰੱਖਿਆ ਅਤੇ ਨਿੱਜਤਾ ਨਾਲ ਜੁੜਿਆ ਵੱਡਾ ਮੁਕੱਦਮਾ ਚਲਾਇਆ ਜਾ ਰਿਹਾ ਹੈ। ਕੈਲੀਫੋਰਨੀਆ, ਕੋਲੋਰਾਡੋ, ਕੈਂਟਕੀ ਅਤੇ ਨਿਊ ਜਰਸੀ ਬਾਕੀ ਰਾਜਾਂ ਵਲੋਂ ਇਸ ਕੇਸ ਦੀ ਪੈਰਵੀ ਕਰ ਰਹੇ ਹਨ। ਕਰੀਬ ਛੇ ਹਫ਼ਤੇ ਚੱਲਣ ਵਾਲੇ ਮੁਕੱਦਮੇ ਦਾ ਫ਼ੈਸਲਾ ਸੋਸ਼ਲ ਮੀਡੀਆ ਦਾ ਮੌਜੂਦਾ ਰੂਪ ਬਦਲ ਸਕਦਾ ਹੈ। ਰਾਜਾਂ ਦਾ ਦੋਸ਼ ਹੈ ਕਿ ਮੈਟਾ ਨੇ ਬੱਚਿਆਂ ਅਤੇ ਨੌਜਵਾਨਾਂ ਨੂੰ ਲੰਮਾ ਸਮਾਂ ਆਨਲਾਈਨ ਰੱਖਣ ਲਈ ਆਪਣੇ ਪਲੇਟਫਾਰਮਾਂ ਵਿਚ ਲਤ ਪੈਦਾ ਕਰਨ ਵਾਲੀਆਂ ਵਿਸ਼ੇਸ਼ਤਾਵਾਂ ਜੋੜੀਆਂ। ਇਨ੍ਹਾਂ ਵਿਚ ਅਨੰਤ ਸਕ੍ਰੋਲਿੰਗ, ਆਪਣੇ-ਆਪ ਚੱਲਣ ਵਾਲੀਆਂ ਵੀਡੀਓਜ਼, ਲਗਾਤਾਰ ਨੋਟੀਫਿਕੇਸ਼ਨ, ‘ਲਾਈਕ’, ਸੁੰਦਰਤਾ ਫਿਲਟਰ, ਇੰਸਟਾਗ੍ਰਾਮ ਸਟੋਰੀਜ਼ ਅਤੇ ਐਲਗੋਰਿਦਮ ਰਾਹੀਂ ਦਿਖਾਈ ਜਾਣ ਵਾਲੀ ਸਮੱਗਰੀ ਸ਼ਾਮਲ ਹੈ। ਮੁਕੱਦਮੇ ਵਿਚ ਦਾਅਵਾ ਕੀਤਾ ਗਿਆ ਹੈ ਕਿ ਕੰਪਨੀ ਨੂੰ ਨੌਜਵਾਨਾਂ ਵਿਚ ਚਿੰਤਾ, ਉਦਾਸੀ, ਸਰੀਰਕ ਦਿੱਖ ਬਾਰੇ ਹੀਣ ਭਾਵਨਾ ਅਤੇ ਖੁਦ ਨੂੰ ਨੁਕਸਾਨ ਪਹੁੰਚਾਉਣ ਦੇ ਖ਼ਤਰਿਆਂ ਦੀ ਜਾਣਕਾਰੀ ਸੀ, ਪਰ ਮਾਪਿਆਂ ਅਤੇ ਆਮ ਲੋਕਾਂ ਸਾਹਮਣੇ ਪਲੇਟਫਾਰਮਾਂ ਨੂੰ ਸੁਰੱਖਿਅਤ ਦੱਸਿਆ ਜਾਂਦਾ ਰਿਹਾ। ਰਾਜਾਂ ਨੇ ਮੈਟਾ ਉੱਤੇ 13 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਦਾ ਡਾਟਾ ਮਾਪਿਆਂ ਦੀ ਪੁਸ਼ਟੀਸ਼ੁਦਾ ਮਨਜ਼ੂਰੀ ਤੋਂ ਬਿਨਾਂ ਇਕੱਠਾ ਕਰਨ ਅਤੇ ਖਪਤਕਾਰ ਸੁਰੱਖਿਆ ਕਾਨੂੰਨਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਵੀ ਲਾਏ ਹਨ। ਕੇਸ ਹਾਰਨ ’ਤੇ ਕੰਪਨੀ ਨੂੰ ਕਰੀਬ 200 ਅਰਬ ਡਾਲਰ ਦਾ ਜੁਰਮਾਨਾ ਹੋ ਸਕਦਾ ਹੈ।
