ਟੋਹਾਣਾ, 11 ਜੁਲਾਈ (ਮਨਜੀਤ ਸਿੰਘ)– ਅਨੁਭਵੀ ਸਵਾਸਥ ਮਿੱਤਰ ਚੈਰੀਟੇਬਲ ਟਰੱਸਟ ਹਰਿਆਣਾ (ਰਜਿ.) ਦੇ ਸਰਪ੍ਰਸਤ ਡਾ. ਦਿਲਬਾਗ ਸਿੰਘ ਦੀਵਾਨਾ ਦੀ ਸਰਪ੍ਰਸਤੀ ਅਤੇ ਡਾ. ਅਜਾਇਬ ਸਿੰਘ ਫਤਿਹਪੁਰੀ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਅਤੇ ਬਲਾਕ ਮੁਖੀ ਡਾ. ਗੁਰਦੀਪ ਸਿੰਘ ਢਿੱਲੋਂ ਦੀ ਅਗਵਾਈ ਹੇਠ ਪਿੰਡ ਸ਼ਕਰਪੁਰਾ ਵਿਖੇ ਡਾ. ਪਿਆਰਾ ਸਿੰਘ ਦੇ ਕਲੀਨਿਕ ਵਿਖੇ ਇੱਕ ਅਹਿਮ ਮੀਟਿੰਗ ਹੋਈ। ਮੀਟਿੰਗ ਵਿੱਚ 31 ਜੁਲਾਈ, 2026 ਨੂੰ ਟੋਹਾਣਾ ਦੀ ਭਾਟੀਆ ਧਰਮਸ਼ਾਲਾ ਵਿਖੇ ਸ਼ਹੀਦ ਊਧਮ ਸਿੰਘ ਦੇ ਸ਼ਹੀਦੀ ਦਿਵਸ ‘ਤੇ ਸਵੇਰੇ 9ਵਜੇ ਤੋਂ 3 ਵਜੇ ਤੱਕ ਲੱਗਣ ਵਾਲੇ 16ਵੇਂ ਵਿਸ਼ਾਲ ਖੂਨਦਾਨ ਕੈਂਪ ਦੀਆਂ ਤਿਆਰੀਆਂ ਬਾਰੇ ਵਿਸਥਾਰ ਵਿੱਚ ਚਰਚਾ ਕੀਤੀ ਗਈ। ਖੂਨਦਾਨ ਕੈਂਪ ਦੀ ਸਫਲਤਾ ਨੂੰ ਯਕੀਨੀ ਬਣਾਉਣ ਲਈ ਵੱਖ-ਵੱਖ ਜ਼ਿੰਮੇਵਾਰੀਆਂ ਸੌਂਪੀਆਂ ਗਈਆਂ ਅਤੇ ਹੋਰ ਲੋਕਾਂ ਨੂੰ ਖੂਨਦਾਨ ਕਰਨ ਲਈ ਉਤਸ਼ਾਹਿਤ ਕਰਨ ਦਾ ਫੈਸਲਾ ਕੀਤਾ ਗਿਆ। ਬੁਲਾਰਿਆਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਖੂਨਦਾਨ ਇੱਕ ਮਹਾਨ ਦਾਨ ਹੈ ਅਤੇ ਖੂਨ ਦੀ ਇੱਕ ਯੂਨਿਟ ਕਈ ਲੋੜਵੰਦ ਮਰੀਜ਼ਾਂ ਦੀ ਜਾਨ ਬਚਾ ਸਕਦੀ ਹੈ। ਇਸ ਲਈ, ਸਮਾਜ ਦੇ ਹਰ ਸਿਹਤਮੰਦ ਵਿਅਕਤੀ ਨੂੰ ਨਿਯਮਿਤ ਤੌਰ ‘ਤੇ ਖੂਨਦਾਨ ਕਰਨ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਇਸ ਮੌਕੇ ਟਰੱਸਟ ਦੇ ਸਰਪ੍ਰਸਤ ਡਾ: ਦਿਲਬਾਗ ਸਿੰਘ ਦੀਵਾਨਾ, ਟੋਹਾਣਾ ਬਲਾਕ ਪ੍ਰਧਾਨ ਡਾ: ਗੁਰਦੀਪ ਸਿੰਘ ਢਿੱਲੋਂ, ਜ਼ਿਲ੍ਹਾ ਮੀਤ ਪ੍ਰਧਾਨ ਡਾ: ਮਹਾਂਵੀਰ ਧਾਰਸੂਲ, ਡਾ: ਸੁਰਿੰਦਰ ਅੱਕਾਂਵਾਲੀ, ਡਾ: ਰਘੁਵੀਰ ਧਾਰਸੂਲ, ਡਾ: ਜੋਗਿੰਦਰ ਧਾਰਸੂਲ, ਜਾਖਲ ਬਲਾਕ ਪ੍ਰਧਾਨ ਡਾ: ਵਿਨੋਦ ਕੁਮਾਰ ਮਿਓਂਦ, ਟੋਹਾਣਾ ਬਲਾਕ ਸਕੱਤਰ ਡਾ: ਰਮਨਦੀਪ ਸਿੰਘ ਢੇਰ, ਡਾ: ਪ੍ਰਵੀਨ ਗ੍ਰੋਹਾ ਮੂਸਾਖੇੜਾ, ਡਾ: ਸੁਨੀਤ ਸ਼ਕਰਪੁਰਾ, ਡਾ: ਪ੍ਰਵੀਨ ਅੱਕਾਂਵਾਲੀ, ਡਾ: ਭਜਨ ਲਹਿਰਾਥੇਹ ਅਤੇ ਡਾ: ਦਿਲਬਾਗ ਲਹਿਰਾਥੇਹ ਸਮੇਤ ਹੋਰ ਮੈਂਬਰ ਹਾਜ਼ਰ ਸਨ।
