ਪੁਲਿਸ ਵਲੋਂ ਫੜੇ ਗਏ ਦੋਸ਼ੀ।
ਕਤਲ ਕੇਸ ਵਿਚ ਪੁਲਿਸ ਨੇ 6 ਵਿਅਕਤੀ ਕੀਤੇ ਕਾਬੂ
ਨਵੀਂ ਦਿੱਲੀ, 21 ਅਕਤੂਬਰ (ਡਾ. ਬਲਵਿੰਦਰ ਸਿੰਘ ਸੋਢੀ)- ਉੱਤਰ ਪੂਰਬੀ ਜ਼ਿਲ੍ਹੇ ਦੇ ਸੀਲਮਪੁਰ ਥਾਣੇ ਦੀ ਪੁਲਿਸ ਨੇ 6 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿਚ ਦੋ ਵਿਅਕਤੀ ਨਾਬਾਲਗ ਹਨ।
ਨਵੀਂ ਦਿੱਲੀ, 21 ਅਕਤੂਬਰ (ਡਾ. ਬਲਵਿੰਦਰ ਸਿੰਘ ਸੋਢੀ)- ਉੱਤਰ ਪੂਰਬੀ ਜ਼ਿਲ੍ਹੇ ਦੇ ਸੀਲਮਪੁਰ ਥਾਣੇ ਦੀ ਪੁਲਿਸ ਨੇ 6 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿਚ ਦੋ ਵਿਅਕਤੀ ਨਾਬਾਲਗ ਹਨ। ਇਨ੍ਹਾਂ ਨੂੰ ਪੁਲਿਸ ਨੇ ਇਕ ਕਤਲ ਦੇ ਮਾਮਲੇ ਵਿਚ ਫੜਿਆ ਅਤੇ ਇਹ ਮਾਮਲਾ ਪੁਲਿਸ ਨੇ ਕੁਝ ਘੰਟਿਆਂ ਵਿਚ ਸੁਲਝਾ ਲਿਆ। ਪੁਲਿਸ ਨੇ ਫੜੇ ਗਏ ਵਿਅਕਤੀਆਂ ਤੋਂ ਇਕ ਚਾਕੂ ਵੀ ਬਰਾਮਦ ਕੀਤਾ ਹੈ ਜੋ ਇਨ੍ਹਾਂ ਨੇ ਅਪਰਾਧ ਵਿਚ ਵਰਤਿਆ ਸੀ। ਫੜੇ ਗਏ ਵਿਅਕਤੀਆਂ ਦੇ ਨਾਂਅ ਅਮਾਨ ਖਾਨ ਉਰਫ਼ ਅਰਸ਼ੂ (21) ਨਿਵਾਸੀ ਸੀਲਮਪੁਰ ਦਿੱਲੀ, ਅਫਜ਼ਲ ਖਾਨ (18) ਨਿਵਾਸੀ ਸੀਲਮਪੁਰ ਦਿੱਲੀ, ਅਬਦਿਲ ਮੋਮਿਨ (18) ਨਿਵਾਸੀ ਗੌਤਮਪੁਰੀ ਦਿੱਲੀ, ਸ਼ੋਏਬ ਮਿਰਜ਼ਾ (18) ਨਿਵਾਸੀ ਸੀਲਮਪੁਰ, ਦੋ ਨਾਬਾਲਗ ਉਮਰ 17 ਸਾਲ ਹਨ। ਪੁਲਿਸ ਅਨੁਸਾਰ ਮਰਨ ਵਾਲਾ ਸੁਭਾਨ ਪਾਰਕ ਵਿਚ ਆਪਣੇ ਦੋਸਤ ਨਾਲ ਸਿਗਰਟ ਪੀ ਰਿਹਾ ਸੀ ਅਤੇ ਉਥੇ 5-6 ਲੜਕੇ ਆਏ ਤਾਂ ਉਨ੍ਹਾਂ ਨੇ ਸਿਗਰਟ ਪੀਣ ਪ੍ਰਤੀ ਇਤਰਾਜ਼ ਕਰਦਿਆਂ ਸੁਭਾਨ ’ਤੇ ਚਾਕੂ ਨਾਲ ਹਮਲਾ ਕੀਤਾ ਅਤੇ ਉਸੇ ਸਮੇਂ ਫ਼ਰਾਰ ਹੋ ਗਏ। ਸੁਭਾਨ ਨੂੰ ਉਸ ਦਾ ਦੋਸਤ ਹਸਪਤਾਲ ਲੈ ਗਿਆ ਅਤੇ ਨਾਲ ਹੀ ਉਸ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਪੁਲਿਸ ਹਸਪਤਾਲ ਵਿਚ ਪੁੱਜੀ ਅਤੇ ਉਦੋਂ ਸੁਭਾਨ ਬੇਹੋਸ਼ੀ ਹਾਲਤ ਵਿਚ ਸੀ। ਸੁਭਾਨ ਦੀ ਬਾਅਦ ਵਿਚ ਹਸਪਤਾਲ ਵਿਚ ਹੀ ਮੌਤ ਹੋ ਗਈ। ਪੁਲਿਸ ਨੇ ਮਾਮਲਾ ਦਰਜ ਕਰ ਕੇ ਸੀ.ਸੀ.ਟੀ.ਵੀ. ਅਤੇ ਹੋਰਨਾਂ ਸਬੂਤਾਂ ਦੇ ਆਧਾਰ ’ਤੇ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲਿਸ ਇਨ੍ਹਾਂ ਤੋਂ ਪੁੱਛ ਪੜਤਾਲ ਕਰ ਰਹੀ ਹੈ।
