ਜਲੰਧਰ, 12 ਮਈ (ਐੱਮ. ਐੱਸ. ਲੋਹੀਆ) - ਆਜ਼ਾਦੀ ਦੇ ਇਨਕਲਾਬੀ ਸੰਘਰਸ਼ ਅਤੇ ਵਿਸ਼ੇਸ਼ ਕਰਕੇ ਗਦਰ ਲਹਿਰ ਦੇ ਸੂਰਮਿਆਂ ਦੀ ਕੁਰਬਾਨੀ ਨੰੂ ਇਤਿਹਾਸ ਦਾ ਮਹੱਤਵਪੂਰਨ ਹਿੱਸਾ ਬਣਾਉਣ ਵਾਲੇ ਇਤਿਹਾਸਕਾਰ ਅਤੇ ਗੁਰੂ ਨਾਨਕ ਇੰਜੀਨੀਅਰਿੰਗ ਕਾਲਜ ਲੁਧਿਆਣਾ ਦੇ ਪ੍ਰੋਫ਼ੈਸਰ ਮਲਵਿੰਦਰਜੀਤ ਸਿੰਘ ਵੜੈਚ ਨੰੂ ਲਾਸਾਨੀ ਇਨਸਾਨ ਦੱਸਦਿਆਂ ਇੰਜ. ਕੁਲਵੰਤ ਬੀਰ ਸਿੰਘ ਕਲੇਰ ਨੇ ਉਨ੍ਹਾਂ ਨੰੂ ਆਪਣੀ ਸ਼ਰਧਾ ਦੇ ਫੁੱਲ ਭੇਟ ਕੀਤੇ | ਅੱਜ ਪ੍ਰੋਫ਼ੈਸਰ ਵੜੈਚ ਨਿਮਿਤ ਰੱਖੀ ਸ਼ੋਕ ਸਭਾ 'ਚ ਬੋਲਦਿਆਂ ਇੰਜੀਨੀਅਰ ਕਲੇਰ ਨੇ ਉਨ੍ਹਾਂ ਦੇ ਲਾਸਾਨੀ ਜੀਵਨ 'ਤੇ ਰੌਸ਼ਨੀ ਪਾਈ | ਉਨ੍ਹਾਂ ਤੋਂ ਇਲਾਵਾ ਇੰਜ. ਯਾਦਵਿੰਦਰਪਾਲ ਸਿੰਘ ਬਾਠ, ਇੰਜ. ਮਨੋਹਰ ਸਿੰਘ ਖਹਿਰਾ, ਇੰਜ. ਅੰਮਿ੍ਤਪਾਲ ਸਿੰਘ ਅਤੇ ਇੰਜ. ਸੀਤਲ ਸਿੰਘ ਸੰਘਾ ਨੇ ਵੀ ਪ੍ਰੋਫ਼ੈਸਰ ਸਾਹਿਬ ਦੇ ਮਹਾਨ ਯੋਗਦਾਨ ਬਾਰੇ ਆਪਣੇ ਵਿਚਾਰ ਪ੍ਰਗਟਾਉਂਦਿਆ ਉਨ੍ਹਾਂ ਨੰੂ ਖਿਰਾਜ-ਇ-ਅਕੀਦਤ ਭੇਟ ਕੀਤੀ | ਵਰਨਣਯੋਗ ਹੈ ਕਿ ਸਾਹਿਤਕਲਾ ਕੇਂਦਰ ਜਲੰਧਰ ਦੇ ਰੂਹੇ ਰਵਾਂ ਇੰਜ. ਹਰਜਿੰਦਰ ਸਿੰਘ ਮਿਨਹਾਸ (ਸਰੀ), ਇੰਜ. ਤੇਜਾ ਸਿੰਘ ਸੰਧੂ ਤੇ ਇੰਜ. ਰਘੂਬੀਰ ਸਿੰਘ ਸਿੱਧੂ (ਬਰੰਪਟਨ) ਵੀ ਪ੍ਰੋਫ਼ੈਸਰ ਵੜੈਚ ਦੇ ਵਿਦਿਆਰਥੀ ਰਹੇ ਹਨ | ਸਭਾ ਦੇ ਅਖੀਰ 'ਚ ਕੇਂਦਰ ਦੇ ਪ੍ਰਧਾਨ ਪ੍ਰੋਫ਼ੈਸਰ ਡਾ. ਗੋਪਾਲ ਸਿੰਘ ਬੁੱਟਰ ਨੇ ਕਿਹਾ ਕਿ ਪ੍ਰੋਫ਼ੈਸਰ ਮਲਵਿੰਦਰਜੀਤ ਸਿੰਘ ਵੜੈਚ ਸਾਡੇ ਮਾਰਗ ਦਰਸ਼ਕ ਸਨ ਅਤੇ ਉਨ੍ਹਾਂ ਦੀਆਂ ਲਿਖਤਾਂ ਤੇ ਜੀਵਨ ਸਾਨੰੂ ਉਸਾਰੂ ਕੰਮਾਂ 'ਚ ਲੱਗੇ ਰਹਿਣ ਲਈ ਨਿਰੰਤਰ ਪ੍ਰੇਰਿਤ ਕਰਦੇ ਰਹਿਣਗੇ | ਕੇਂਦਰ ਦੇ ਜਨਰਲ ਸਕੱਤਰ ਨਰਿੰਦਰਪਾਲ ਸਿੰਘ ਕੰਗ ਨੇ ਵੜੈਚ ਸਾਹਿਬ ਨੂੰ ਕਾਵਿਕ ਸ਼ਰਧਾਂਜਲੀ ਦਿੱਤੀ |
