ਆਲਮਗੀਰ, 21 ਅਪ੍ਰੈਲ (ਜਰਨੈਲ ਸਿੰਘ ਪੱਟੀ)-ਨਨਕਾਣਾ ਸਾਹਿਬ ਪਬਲਿਕ ਸਕੂਲ ਗਿੱਲ ਪਾਰਕ ਦੇ ਵਿਦਿਆਰਥੀ ਨੂੰ ਇਕ ਰਾਸ਼ਟਰੀ ਪੱਧਰ ਦੇ ਪ੍ਰੋਗਰਾਮ ਇਸਰੋ ਯੂਵੀਕਾ 2026 ਲਈ ਚੁਣੇ ਜਾਣ ਨਾਲ ਸਕੂਲ ਦਾ ਨਾਮ ਰੌਸ਼ਨ ਕੀਤਾ | 10ਵੀਂ ਜਮਾਤ ਦੇ ਹੁਸ਼ਿਆਰ ਵਿਦਿਆਰਥੀ ਅਜੈ ਧੀਮਾਨ ਨੂੰ ਬਹੁਤ ਹੀ ਵੱਕਾਰੀ ਭਾਰਤੀ ਪੁਲਾੜ ਖੋਜ ਸੰਗਠਨ ਯੂਵੀਕਾ (ਯੰਗ ਸਾਇੰਟਿਸਟ ਪ੍ਰੋਗਰਾਮ) 2026 ਲਈ ਚੁਣਿਆ ਗਿਆ ਹੈ | ਯੂਵੀਕਾ ਯੁਵਾ ਵਿਗਿਆਨੀ ਕਾਰਜਕ੍ਰਮ ਇਕ ਵਿਲੱਖਣ ਪਹਿਲ ਹੈ, ਜੋ ਇਸਰੋ ਦੁਆਰਾ ਹਰ ਸਾਲ ਦੇਸ਼ ਭਰ ਦੇ ਨੌਜਵਾਨ ਵਿਗਿਆਨਕ ਦਿਮਾਗਾਂ ਨੂੰ ਪਰਖਣ ਲਈ ਕੀਤੀ ਜਾਂਦੀ ਹੈ | ਸਕੂਲ ਦਾ ਵਿਦਿਆਰਥੀ ਅਜੈ ਧੀਮਾਨ 456 ਹੋਰ ਵਿਦਿਆਰਥੀਆਂ ਵਿਚ ਸ਼ਾਮਿਲ ਹੈ, ਜਿਨ੍ਹਾਂ ਨੂੰ ਪੂਰੇ ਭਾਰਤ ਤੋਂ ਚੁਣਿਆ ਗਿਆ ਹੈ | ਅਜੈ ਧੀਮਾਨ ਜੋਧਪੁਰ ਦੇ ਖੇਤਰੀ ਰਿਮੋਟ ਸੈਂਸਿੰਗ ਸੈਂਟਰ ਦਾ ਦੌਰਾ ਕਰੇਗਾ, ਜਿੱਥੇ ਉਹ ਪੁਲਾੜ ਵਿਗਿਆਨ ਅਤੇ ਤਕਨਾਲੋਜੀ ਦੇ ਖੇਤਰ ਵਿਚ ਸਿੱਖਣ ਦਾ ਭਰਪੂਰ ਅਨੁਭਵ ਪ੍ਰਾਪਤ ਕਰੇਗਾ | ਇਹ ਪ੍ਰੋਗਰਾਮ ਮਈ 2026 ਵਿਚ ਤਹਿ ਕੀਤਾ ਗਿਆ ਹੈ | ਇਸ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਪੁਲਾੜ ਐਪਲੀਕੇਸ਼ਨਾਂ, ਸੈਟੇਲਾਈਟ ਤਕਨਾਲੋਜੀ ਅਤੇ ਪੁਲਾੜ ਖੇਤਰ ਵਿਚ ਭਾਰਤ ਦੀ ਤਰੱਕੀ ਬਾਰੇ ਡੂੰਘੀ ਸੂਝ ਪ੍ਰਦਾਨ ਕਰਨਾ ਹੈ | ਆਪਣੀ ਖੁਸ਼ੀ ਜ਼ਾਹਿਰ ਕਰਦਿਆਂ ਵਿਦਿਆਰਥੀ ਅਜੇ ਧੀਮਾਨ ਨੇ ਕਿਹਾ ਕਿ ਕੈਂਪ ਦੌਰਾਨ ਮੈਂ ਇੰਟਰਐਕਟਿਵ ਕਲਾਸਰੂਮ ਲੈਕਚਰਾਂ, ਮਾਹਿਰ ਸੈਸ਼ਨਾਂ ਅਤੇ ਵਿਹਾਰਕ ਗਤੀਵਿਧੀਆਂ ਵਿਚ ਹਿੱਸਾ ਲਵਾਂਗਾ, ਪੁਲਾੜ ਵਿਗਿਆਨ, ਤਕਨਾਲੋਜੀ ਅਤੇ ਇਸ ਦੇ ਅਸਲ ਜੀਵਨ ਦੇ ਉਪਯੋਗਾਂ ਦੀ ਦਿਲਚਸਪ ਦੁਨੀਆ ਦਾ ਸਿੱਧਾ ਸਾਹਮਣਾ ਕਰਾਂਗਾ | ਮੈਨੂੰ ਉਤਸ਼ਾਹਿਤ ਕਰਨ ਲਈ ਆਪਣੇ ਸਕੂਲ ਪ੍ਰਬੰਧਕਾਂ ਦਾ ਧੰਨਵਾਦੀ ਹਾਂ | ਸਕੂਲ ਦੀ ਪਿ੍ੰਸੀਪਲ ਹਰਮੀਤ ਕੌਰ ਵੜੈਚ ਨੇ ਇਸ ਪ੍ਰਾਪਤੀ 'ਤੇ ਬਹੁਤ ਖੁਸ਼ੀ ਅਤੇ ਮਾਣ ਪ੍ਰਗਟ ਕਰਦਿਆਂ ਕਿਹਾ ਕਿ ਸਾਨੂੰ ਸਕੂਲ ਦੇ ਵਿਦਿਆਰਥੀ ਅਜੈ ਧੀਮਾਨ ਦੀ ਸ਼ਾਨਦਾਰ ਪ੍ਰਾਪਤੀ ਲਈ ਬਹੁਤ ਮਾਣ ਹੈ | ਇਸਰੋ ਦੇ ਯੂਵੀਕਾ ਪ੍ਰੋਗਰਾਮ ਲਈ ਚੁਣਿਆ ਜਾਣਾ ਇਕ ਦੁਰਲੱਭ ਸਨਮਾਨ ਹੈ ਅਤੇ ਉਸ ਦੀ ਸਖ਼ਤ ਮਿਹਨਤ, ਉਤਸੁਕਤਾ ਅਤੇ ਸਿੱਖਣ ਦੇ ਜਨੂੰਨ ਦਾ ਪ੍ਰਮਾਣ ਹੈ | ਅਸੀਂ ਉਸ ਨੂੰ ਪੁਲਾੜ ਵਿਗਿਆਨ ਦੀ ਦੁਨੀਆ ਵਿਚ ਇਸ ਸ਼ਾਨਦਾਰ ਯਾਤਰਾ ਦੀ ਸ਼ੁਰੂਆਤ ਕਰਦੇ ਹੋਏ ਵੱਡੀ ਸਫਲਤਾ ਦੀ ਕਾਮਨਾ ਕਰਦੇ ਹਾਂ |
