ਜੰਡਿਆਲਾ ਮੰਜਕੀ,10 ਜੁਲਾਈ(ਸੁਰਜੀਤ ਸਿੰਘ ਜੰਡਿਆਲਾ) ਸਥਾਨਕ ਕਸਬੇ ਦੇ ਕਈ ਦੁਕਾਨਦਾਰਾਂ ਨੂੰ ਠੱਗ ਕੇ ਭੱਜੇ ਨੌਸਰਬਾਜ਼ ਦੀ ਪੁਲਿਸ ਨੂੰ ਸ਼ਿਕਾਇਤ ਦਿੱਤੇ ਜਾਣ ਦੇ ਬਾਵਜੂਦ ਪੰਜ ਦਿਨ ਬੀਤ ਜਾਣ ਤੇ ਵੀ ਉਕਤ ਠੱਗ ਪੁਲਿਸ ਵੱਲੋਂ ਕਾਬੂ ਨਹੀਂ ਕੀਤਾ ਜਾ ਸਕਿਆ। ਕਈ ਦੁਕਾਨਦਾਰਾਂ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਦਿਨ ਦਿਹਾੜੇ ਕਸਬੇ ਦੀਆਂ ਵੱਖ ਵੱਖ ਦੁਕਾਨਾਂ ਵਿੱਚ ਪੁੱਜੇ ਠੱਗ ਵੱਲੋਂ ਕਰਿਆਨੇ ਵਾਲੀ ਦੁਕਾਨ ਤੋਂ ਕਰਿਆਨਾ, ਕੱਪੜਿਆਂ ਦੀ ਦੁਕਾਨ ਤੋਂ ਬੈਡ ਸ਼ੀਟਾਂ, ਫਲਾਂ ਵਾਲੀ ਦੁਕਾਨ ਤੋਂ ਫਰੂਟ ਅਤੇ ਇਕ ਰੈਸਟੋਰੈਂਟ ਤੋਂ ਬਟਰ ਚਿਕਨ ਅਤੇ ਰੋਟੀਆਂ ਲੈ ਕੇ ਆਨਲਾਈਨ ਸਕੈਨਰ ਰਾਹੀਂ ਪੇਮੈਂਟ ਕਰਨ ਦਾ ਡਰਾਮਾ ਕੀਤਾ ਗਿਆ ਜਦ ਕਿ ਪੇਮੈਂਟ ਉਕਤ ਦੁਕਾਨਦਾਰਾਂ ਦੇ ਖਾਤੇ ਵਿੱਚ ਨਹੀਂ ਪੁੱਜੀ। ਠੱਗ ਵੱਲੋਂ ਕਿਹਾ ਗਿਆ ਕਿ ਮੈਂ ਪੁਲਿਸ ਚੌਂਕੀ ਜੰਡਿਆਲਾ ਵਿੱਚ ਇੰਚਾਰਜ ਲੱਗਾ ਹੋਇਆ ਹਾਂ ਅਤੇ ਉਕਤ ਪੇਮੈਂਟ ਨੈਟਵਰਕ ਸਮੱਸਿਆ ਕਰਕੇ ਤੁਹਾਡੇ ਤੱਕ ਨਹੀਂ ਪੁੱਜੀ। ਮੇਰੇ ਵੱਲੋਂ ਪੇਮੈਂਟ ਕਰ ਦਿੱਤੀ ਗਈ ਹੈ। ਉਕਤ ਠੱਗੀ ਸਬੰਧੀ ਦੁਕਾਨਦਾਰਾਂ ਵੱਲੋਂ ਸਥਾਨਕ ਸ਼ਾਪਕੀਪਰ ਐਸੋਸੀਏਸ਼ਨ ਦੇ ਪ੍ਰਧਾਨ ਮੱਖਣ ਪੱਲਣ ਨੂੰ ਨਾਲ ਲੈ ਕੇ ਪੁਲਿਸ ਚੌਂਕੀ ਜੰਡਿਆਲਾ ਨੂੰ ਸ਼ਿਕਾਇਤ ਵੀ ਦਿੱਤੀ ਗਈ। ਉਕਤ ਠੱਗ ਦੁਕਾਨਾਂ ਅੱਗੇ ਅਤੇ ਅੰਦਰ ਲੱਗੇ ਵੱਖ ਵੱਖ ਸੀਸੀਟੀਵੀ ਕੈਮਰਿਆਂ ਵਿੱਚ ਕੈਦ ਵੀ ਹੋ ਗਿਆ ਅਤੇ ਉਸਦੀਆਂ ਫੋਟੋਆਂ ਦੁਕਾਨਦਾਰਾਂ ਵੱਲੋਂ ਬਕਾਇਦਾ ਸੋਸ਼ਲ ਮੀਡੀਆ ਤੇ ਵਾਇਰਲ ਵੀ ਕਰ ਦਿੱਤੀਆਂ ਗਈਆਂ। ਠੱਗ ਦੇ ਪੁਲਿਸ ਗ੍ਰਿਫਤ ਤੋਂ ਬਾਹਰ ਰਹਿਣ ਸਬੰਧੀ ਐਸੋਸੀਏਸ਼ਨ ਦੇ ਪ੍ਰਧਾਨ ਮੱਖਣ ਪੱਲਣ ਨੇ ਕਿਹਾ ਕਿ ਉਕਤ ਠੱਗ ਜਲਦ ਹੀ ਕਾਬੂ ਕਰ ਲਿਆ ਜਾਵੇਗਾ ਅਤੇ ਉਹ ਆਪਣੇ ਸਰੋਤਾਂ ਰਾਹੀਂ ਉਸ ਦੇ ਨੇੜੇ ਪਹੁੰਚ ਚੁੱਕੇ ਹਨ।
