ਕੁੱਤਿਆਂ ਤੇ ਬਿੱਲੀਆਂ ਨੂੰ ਹਲਕਾਅ ਤੋਂ ਬਚਾਉਣ ਲਈ ਮੁਫ਼ਤ ਟੀਕਾਕਰਨ ਕੈਂਪ ਅੱਜ ਤੇ ਕੱਲ੍ਹ ਨੂੰ -ਰਾਹੁਲ ਭਾਰਦਵਾਜ
ਕਪੂਰਥਲਾ, 3 ਅਗਸਤ (ਵਿ. ਪ੍ਰ.)
ਕਪੂਰਥਲਾ, 3 ਅਗਸਤ (ਵਿ.ਪ੍ਰ.)-ਅਰਬਨ ਪੈਟਸ ਕਪੂਰਥਲਾ ਵਲੋਂ ਜਾਨਵਰਾਂ ਦੀ ਭਲਾਈ ਲਈ ਡਾ. ਜੀ.ਐਸ. ਬੇਦੀ ਦੀ ਅਗਵਾਈ ਵਿਚ ਹਲਕਾਅ ਤੋਂ ਬਚਾਅ ਦੇ ਮੁਫ਼ਤ ਟੀਕਾਕਰਨ ਸਬੰਧੀ 4 ਤੇ 5 ਅਗਸਤ ਨੂੰ ਸਵੇਰੇ 11 ਵਜੇ ਤੋਂ ਲੈ ਕੇ ਸ਼ਾਮ 5 ਵਜੇ ਤੱਕ ਅਰਬਨ ਪੈਟਸ ਬਾਈਪਾਸ ਚੌਂਕ ਕਪੂਰਥਲਾ ਵਿਖੇ ਇਕ ਕੈਂਪ ਲਗਾਇਆ ਜਾ ਰਿਹਾ ਹੈ | ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਰਾਹੁਲ ਭਾਰਦਵਾਜ ਨੇ ਦੱਸਿਆ ਕਿ ਇਸ ਕੈਂਪ ਵਿਚ ਪਾਲਤੂ ਅਤੇ ਆਵਾਰਾ ਕੁੱਤਿਆਂ ਅਤੇ ਬਿੱਲੀਆਂ ਦਾ ਮੁਫ਼ਤ ਟੀਕਾਕਰਨ ਹੋਵੇਗਾ | ਉਨ੍ਹਾਂ ਕਿਹਾ ਕਿ ਕੈਂਪ ਵਿਚ ਕਾਵਾ, ਇੰਡੀਅਨ ਇਮਨੂਯੋਲੋਜੀਕਲ, ਐਮ.ਐਮ.ਡੀ., ਐਨੀਮਲ ਸਾਇੰਸ, ਮੈਨਕਾਇੰਡ ਅਤੇ ਡਰੂਲਜ਼ ਦਾ ਵਿਸ਼ੇਸ਼ ਯੋਗਦਾਨ ਰਹੇਗਾ, ਜੋ ਕਿ ਵੈਕਸੀਨ ਦੇ ਨਾਲ ਜਾਨਵਰਾਂ ਨੂੰ ਲਿਆਉਣ ਵਾਲੇ ਲੋਕਾਂ ਨੂੰ ਸੈਂਪਲ ਦੇਣਗੇ | ਰਾਹੁਲ ਭਾਰਦਵਾਜ ਨੇ ਦੱਸਿਆ ਕਿ ਕੈਂਪ ਵਿਚ ਟੀਕਾਕਰਨ ਤੋਂ ਇਲਾਵਾ ਜਾਨਵਰਾਂ ਨੂੰ ਹਲਕਾਅ ਤੋਂ ਬਚਾਉਣ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ | ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਕੈਂਪ ਵਿਚ ਵੱਧ ਤੋਂ ਵੱਧ ਕੁੱਤੇ, ਬਿੱਲੀਆਂ, ਲਿਆ ਕੇ ਇਸ ਕੈਂਪ ਤੋਂ ਲਾਹਾ ਲੈਣ |
