ਇੰਗਲੈਂਡ ਨੇ ਪਨਾਮਾ ਨੂੰ 2-0 ਨਾਲ ਹਰਾਇਆ

ਨਿਊਯਾਰਕ, 28 ਜੂਨ (ਰਾਜੂ ਸਹਿਬਾਜ਼ਪੁਰਾ )-ਫੀਫਾ ਵਿਸ਼ਵ ਕੱਪ 2026 ਦੇ ਗਰੁੱਪ ‘ਐਲ’ ਦੇ ਆਖ਼ਰੀ ਮੈਚ ਵਿਚ ਇੰਗਲੈਂਡ ਨੇ ਪਨਾਮਾ ਨੂੰ 2-0 ਨਾਲ ਹਰਾ ਕੇ ਗਰੁੱਪ ’ਚ ਪਹਿਲਾ ਸਥਾਨ ਹਾਸਲ ਕਰ ਲਿਆ ਹੈ। ਨਿਊਯਾਰਕ–ਨਿਊ ਜਰਸੀ ਸਟੇਡੀਅਮ ’ਚ ਖੇਡੇ ਗਏ ਇਸ ਮੁਕਾਬਲੇ ’ਚ ਪਹਿਲੇ ਹਾਫ਼ ਦੌਰਾਨ ਇੰਗਲੈਂਡ ਨੂੰ ਗੋਲ ਕਰਨ ਲਈ ਕਾਫ਼ੀ ਸੰਘਰਸ਼ ਕਰਨਾ ਪਿਆ, ਪਰ ਦੂਜੇ ਹਾਫ਼ ਵਿਚ ਟੀਮ ਨੇ 2 ਮਿੰਟਾਂ ਦੇ ਅੰਦਰ ਹੀ 2 ਗੋਲ ਕਰਕੇ ਮੈਚ ਆਪਣੇ ਨਾਂਅ ਕਰ ਲਿਆ। ਪਹਿਲੇ 45 ਮਿੰਟਾਂ ’ਚ ਪਨਾਮਾ ਨੇ ਮਜ਼ਬੂਤ ਰੱਖਿਆ ਕੀਤੀ ਤੇ ਇੰਗਲੈਂਡ ਦੇ ਹਮਲਾਵਰਾਂ ਨੂੰ ਖੁੱਲ੍ਹੇ ਮੌਕੇ ਨਹੀਂ ਦਿੱਤੇ। ਮੈਚ ਦਾ ਰੁਖ 60ਵੇਂ ਮਿੰਟ ’ਚ ਬਦਲਿਆ ਜਦੋਂ ਜੂਡ ਬੈਲਿੰਗਹਮ ਨੇ ਬੁਕਾਯੋ ਸਾਕਾ ਦੇ ਕਾਰਨਰ ’ਤੇ ਸ਼ਾਨਦਾਰ ਗੋਲ ਕਰਕੇ ਇੰਗਲੈਂਡ ਨੂੰ 1-0 ਦੀ ਬੜ੍ਹਤ ਦਿਵਾਈ। ਇਸ ਤੋਂ ਕੇਵਲ 2 ਮਿੰਟ ਬਾਅਦ ਬੈਲਿੰਗਹਮ ਨੇ ਹੀ ਸਟੀਕ ਪਾਸ ਦੇ ਕੇ ਹੈਰੀ ਕੇਨ ਲਈ ਗੋਲ ਦਾ ਮੌਕਾ ਬਣਾਇਆ ਤੇ ਕੇਨ ਨੇ ਹੈਡਰ ਰਾਹੀਂ ਗੇਂਦ ਜਾਲ ’ਚ ਪਾ ਦਿੱਤੀ। ਇਸ ਗੋਲ ਨਾਲ ਹੈਰੀ ਕੇਨ ਨੇ ਵਿਸ਼ਵ ਕੱਪ ਇਤਿਹਾਸ ’ਚ ਇੰਗਲੈਂਡ ਲਈ ਆਪਣਾ 11ਵਾਂ ਗੋਲ ਕੀਤਾ ਤੇ ਸਾਬਕਾ ਸਟਾਰ ਗੈਰੀ ਲਿਨੇਕਰ ਦਾ ਰਿਕਾਰਡ ਤੋੜਦਿਆਂ ਇੰਗਲੈਂਡ ਦੇ ਸਭ ਤੋਂ ਵੱਧ ਵਿਸ਼ਵ ਕੱਪ ਗੋਲ ਕਰਨ ਵਾਲੇ ਖਿਡਾਰੀ ਬਣ ਗਏ। ਪਨਾਮਾ ਨੇ ਵੀ ਕੁਝ ਚੰਗੇ ਮੌਕੇ ਬਣਾਏ, ਪਰ ਉਹ ਉਨ੍ਹਾਂ ਨੂੰ ਗੋਲ ਵਿੱਚ ਤਬਦੀਲ ਨਹੀਂ ਕਰ ਸਕੀ। ਇੰਗਲੈਂਡ ਦੇ ਗੋਲਕੀਪਰ ਤੇ ਰੱਖਿਆ ਪੰਤੀ ਨੇ ਸਾਰੇ ਹਮਲੇ ਨਾਕਾਮ ਕਰ ਦਿੱਤੇ।
ਅਲਜੀਰੀਆ-ਆਸਟਰੀਆ ਡਰਾਅ ਨਾਲ ਨਾਕਆਊਟ ’ਚ ਪਹੁੰਚੀਆਂ-ਫੀਫਾ ਵਿਸ਼ਵ ਕੱਪ 2026 ਦੇ ਗਰੁੱਪ ‘ਜੇ’ ਦੇ ਆਖ਼ਰੀ ਮੁਕਾਬਲੇ ਵਿਚ ਅਲਜੀਰੀਆ ਤੇ ਆਸਟਰੀਆ ਵਿਚਕਾਰ ਖੇਡਿਆ ਗਿਆ ਮੈਚ 3-3 ਦੀ ਬਰਾਬਰੀ ’ਤੇ ਸਮਾਪਤ ਹੋਇਆ। ਮੈਚ ਦੀ ਸ਼ੁਰੂਆਤ ਤੋਂ ਹੀ ਦੋਵੇਂ ਟੀਮਾਂ ਹਮਲਾਵਰ ਅੰਦਾਜ਼ ’ਚ ਨਜ਼ਰ ਆਈਆਂ। 28ਵੇਂ ਮਿੰਟ ਵਿੱਚ ਆਸਟਰੀਆ ਨੇ ਪਹਿਲਾ ਗੋਲ ਕਰਕੇ ਮੈਚ ’ਚ ਬੜ੍ਹਤ ਬਣਾਈ। ਮਾਰਕੋ ਅਰਨਾਟੋਵਿਚ ਨੇ ਗੋਲ ਕਰਕੇ ਸਕੋਰ 1-0 ਕਰ ਦਿੱਤਾ। ਇਸ ਤੋਂ ਬਾਅਦ ਅਲਜੀਰੀਆ ਨੇ ਦਬਾਅ ਵਧਾਇਆ ਤੇ ਪਹਿਲੇ ਹਾਫ਼ ਦੇ ਅਖੀਰ ਵਿੱਚ ਰਫ਼ੀਕ ਬੈਲਘਾਲੀ ਨੇ ਸ਼ਾਨਦਾਰ ਗੋਲ ਕਰਕੇ ਸਕੋਰ 1-1 ਨਾਲ ਬਰਾਬਰ ਕਰ ਦਿੱਤਾ। ਦੂਜੇ ਅੱਧ ’ਚ 55ਵੇਂ ਮਿੰਟ ’ਚ ਮਾਰਸੇਲ ਸਾਬਿਤਜ਼ਰ ਨੇ ਆਸਟਰੀਆ ਨੂੰ 2-1 ਨਾਲ ਅੱਗੇ ਕਰ ਦਿੱਤਾ। ਪਰ ਅਲਜੀਰੀਆ ਨੇ ਹਾਰ ਨਹੀਂ ਮੰਨੀ ਤੇ ਕੇਵਲ ਪੰਜ ਮਿੰਟ ਬਾਅਦ ਕਪਤਾਨ ਰਿਆਦ ਮਹਰੇਜ਼ ਨੇ ਹੁਸਾਮ ਆਉਆਰ ਦੇ ਪਾਸ ’ਤੇ ਗੋਲ ਕਰਕੇ ਸਕੋਰ 2-2 ਕਰ ਦਿੱਤਾ। 90+3ਵੇਂ ਮਿੰਟ ’ਚ ਰਿਆਦ ਮਹਰੇਜ਼ ਨੇ ਆਪਣਾ ਦੂਜਾ ਗੋਲ ਕਰਦਿਆਂ ਅਲਜੀਰੀਆ ਨੂੰ 3-2 ਨਾਲ ਅੱਗੇ ਕਰ ਦਿੱਤਾ ਤੇ ਲੱਗ ਰਿਹਾ ਸੀ ਕਿ ਅਲਜੀਰੀਆ ਗਰੁੱਪ ’ਚ ਦੂਜੇ ਸਥਾਨ ’ਤੇ ਕਬਜ਼ਾ ਕਰ ਲਵੇਗਾ। ਹਾਲਾਂਕਿ ਆਸਟਰੀਆ ਨੇ ਆਖ਼ਰੀ ਪਲਾਂ ’ਚ ਹਿੰਮਤ ਨਹੀਂ ਹਾਰੀ। 90+6ਵੇਂ ਮਿੰਟ ਵਿਚ ਸਾਸਾ ਕਲਾਜ਼ਦਿਚ ਨੇ ਹੈਡਰ ਰਾਹੀਂ ਗੋਲ ਕਰਕੇ ਮੈਚ 3-3 ਨਾਲ ਬਰਾਬਰ ਕਰ ਦਿੱਤਾ।
ਕ੍ਰੋਏਸ਼ੀਆ ਨੇ ਘਾਨਾ ਨੂੰ 2-1 ਨਾਲ ਹਰਾਇਆ-ਫੀਫਾ ਵਿਸ਼ਵ ਕੱਪ 2026 ਦੇ ਗਰੁੱਪ ‘ਐਲ’ ਦੇ ਆਖ਼ਰੀ ਮੁਕਾਬਲੇ ’ਚ ਕ੍ਰੋਏਸ਼ੀਆ ਨੇ ਜ਼ਬਰਦਸਤ ਵਾਪਸੀ ਕਰਦਿਆਂ ਘਾਨਾ ਨੂੰ 2-1 ਨਾਲ ਹਰਾ ਦਿੱਤਾ। 31ਵੇਂ ਮਿੰਟ ’ਚ ਪੇਤਾਰ ਸੁਚਿਚ ਨੇ ਲਗਭਗ 30 ਗਜ਼ ਦੀ ਦੂਰੀ ਤੋਂ ਸ਼ਾਨਦਾਰ ਲੰਬੀ ਰੇਂਜ ਦਾ ਸ਼ਾਟ ਲਗਾ ਕੇ ਗੇਂਦ ਨੂੰ ਜਾਲ ’ਚ ਪਹੁੰਚਾ ਦਿੱਤਾ। ਇਸ ਗੋਲ ਨਾਲ ਕਰੋਏਸ਼ੀਆ ਨੇ 1-0 ਦੀ ਬੜ੍ਹਤ ਬਣਾਈ। ਦੂਜੇ ਅੱਧ ਵਿੱਚ ਘਾਨਾ ਨੇ ਖੇਡ ਦਾ ਰੁਖ ਬਦਲ ਦਿੱਤਾ। ਟੀਮ ਨੇ ਲਗਾਤਾਰ ਹਮਲੇ ਕੀਤੇ ਅਤੇ 73ਵੇਂ ਮਿੰਟ ’ਚ ਫ੍ਰੀ-ਕਿਕ ਤੋਂ ਮਿਲੇ ਮੌਕੇ ਦਾ ਫਾਇਦਾ ਚੁੱਕਦਿਆਂ ਡੈਰਿਕ ਲੁਕਾਸਨ ਨੇ ਨੇੜੇ ਤੋਂ ਗੋਲ ਕਰਕੇ ਸਕੋਰ 1-1 ਨਾਲ ਬਰਾਬਰ ਕਰ ਦਿੱਤਾ।ਬਰਾਬਰੀ ਤੋਂ ਬਾਅਦ ਮੈਚ ਹੋਰ ਰੋਮਾਂਚਕ ਹੋ ਗਿਆ। 83ਵੇਂ ਮਿੰਟ ’ਚ ਕ੍ਰੋਏਸ਼ੀਆ ਦੇ ਤਜਰਬੇਕਾਰ ਕਪਤਾਨ ਲੂਕਾ ਮੋਡਰਿਚ ਦੇ ਕਾਰਨਰ ’ਤੇ ਨਿਕੋਲਾ ਵਲਾਸਿਚ ਨੇ ਸ਼ਾਨਦਾਰ ਹੈਡਰ ਰਾਹੀਂ ਗੋਲ ਕਰਕੇ ਕਰੋਏਸ਼ੀਆ ਨੂੰ 2-1 ਨਾਲ ਮੁੜ ਅੱਗੇ ਕਰ ਦਿੱਤਾ। ਇਹ ਗੋਲ ਹੀ ਮੈਚ ਦਾ ਫੈਸਲਾਕੁੰਨ ਗੋਲ ਸਾਬਤ ਹੋਇਆ ਤੇ ਕ੍ਰੋਏਸ਼ੀਆ ਨੇ ਇਕ ਸ਼ਾਨਦਾਰ ਜਿੱਤ ਦਰਜ ਕੀਤੀ।