ਬਿਨਾਂ ਮੀਟਰ ਰੀਡਿੰਗ ਦੇ ਲੋਕਾਂ ਘਰ ਪਹੁੰਚੇ ਭਾਰੀ ਭਰਕਮ ਬਿੱਲ, ਬਿਜਲੀ ਬੋਰਡ ਵਿਚ ਲੱਗੀਆਂ ਲੰਮੀਆਂ ਲਾਈਨਾਂ

ਜ਼ੀਰਕਪੁਰ, 3 ਜੁਲਾਈ (ਮਨਿੰਦਰ ਸਿੰਘ)- ਪਿਛਲੇ ਕੁਝ ਮਹੀਨਿਆਂ ਤੋਂ ਮੀਟਰ ਰੀਡਰਾਂ ਦੀ ਹੜਤਾਲ ਦੇ ਕਾਰਨ ਬਿਜਲੀ ਬੋਰਡ ਵਲੋਂ ਲੋਕਾਂ ਦੇ ਘਰ ਐਵਰੇਜ ਬਿੱਲ ਭੇਜੇ ਜਾ ਰਹੇ ਹਨ, ਜਿਸ ਕਾਰਨ ਲੋਕਾਂ ਨੂੰ ਵੱਡੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬਿਜਲੀ ਵਿਭਾਗ ਵਲੋਂ ਇਹ ਬਿੱਲ ਸਮੇਂ ਤੋਂ ਦੇਰੀ ਨਾਲ ਭੇਜੇ ਜਾ ਰਹੇ ਹਨ, ਜਿਸ ਕਾਰਨ ਲੋਕਾਂ ਨੂੰ ਸਰਕਾਰ ਵਲੋਂ ਦਿੱਤੀ ਜਾ ਰਹੀ ਮੁਫਤ ਬਿਜਲੀ ਦੀ ਸਹੂਲਤ ਦਾ ਲਾਭ ਨਹੀਂ ਮਿਲ ਰਿਹਾ ਹੈ। ਬੀਤੇ ਦਿਨੀਂ ਬਿਜਲੀ ਵਿਭਾਗ ਵਲੋਂ ਅੱਜ ਦੀ ਆਖਰੀ ਮਿਤੀ ਦੇ ਬਿਨਾਂ ਰੀਡਿੰਗ ਭਾਰੀ ਭਰਕਮ ਬਿਲ ਲੋਕਾਂ ਦੇ ਘਰ ਭੇਜ ਦਿੱਤੇ ਗਏ, ਜਿਸ ਕਾਰਨ ਅੱਜ ਲੋਕ ਇਨ੍ਹਾਂ ਬਿਲਾਂ ਬਾਰੇ ਜਾਣਕਾਰੀ ਲੈਣ ਲਈ ਬਿਜਲੀ ਬੋਰਡ ਦੇ ਮੁੱਖ ਦਫ਼ਤਰ ਲੰਮੀਆਂ ਲਾਈਨਾਂ ਲਗਾ ਕੇ ਖੜੇ ਦੇਖੇ ਗਏ। ਇਸ ਮੌਕੇ ਕੁਝ ਲੋਕਾਂ ਨੇ ਦੱਸਿਆ ਕਿ ਉਨਾਂ ਦੇ ਘਰੇ ਸਿਰਫ਼ ਇਕ ਪੱਖਾ ਤੇ ਬਿਜਲੀ ਦਾ ਇਕ ਬਲਬ ਹੈ, ਜਦ ਕਿ ਉਨ੍ਹਾਂ ਨੂੰ ਬਿਜਲੀ ਵਿਭਾਗ ਵਲੋਂ 4 ਹਜ਼ਾਰ ਰੁਪਏ ਦਾ ਬਿੱਲ ਭੇਜ ਦਿੱਤਾ ਗਿਆ ਹੈ। ਇਸ ਸੰਬੰਧੀ ਉਹ ਵਿਭਾਗੀ ਅਧਿਕਾਰੀਆਂ ਤੋਂ ਜਾਣਕਾਰੀ ਲੈਣ ਆਏ ਹਨ।