ਨਵੀਂ ਦਿੱਲੀ, 23 ਅਕਤੂਬਰ (ਇੰਟ)- ਅੱਜ ਦੇ ਡਿਜੀਟਲ ਯੁੱਗ ਵਿੱਚ UPI ਰਾਹੀਂ ਪੈਸੇ ਭੇਜਣਾ ਕਾਫ਼ੀ ਆਸਾਨ ਹੋ ਗਿਆ ਹੈ। Google Pay, PhonePe ਅਤੇ Paytm ਵਰਗੀਆਂ ਐਪਾਂ ਦੀ ਮਦਦ ਨਾਲ ਲੋਕ ਕੁਝ ਸਕਿੰਟਾਂ ਵਿੱਚ ਲੈਣ-ਦੇਣ ਕਰ ਲੈਂਦੇ ਹਨ। ਪਰ ਕਈ ਵਾਰ ਅਜਿਹੀ ਸਮੱਸਿਆ ਆਉਂਦੀ ਹੈ, ਜਦੋਂ ਭੇਜਣ ਵਾਲੇ ਦੇ ਬੈਂਕ ਖਾਤੇ ਵਿੱਚੋਂ ਪੈਸੇ ਕੱਟ ਜਾਂਦੇ ਹਨ, ਪਰ ਪ੍ਰਾਪਤਕਰਤਾ ਦੇ ਖਾਤੇ ਵਿੱਚ ਰਕਮ ਨਹੀਂ ਪਹੁੰਚਦੀ।
ਅਜਿਹੀ ਸਥਿਤੀ ਵਿਚ ਗਾਹਕਾਂ ਨੂੰ ਆਪਣੇ ਪੈਸੇ ਵਾਪਸ ਮਿਲਣ ਦੀ ਚਿੰਤਾ ਰਹਿੰਦੀ ਹੈ। ਹਾਲਾਂਕਿ, ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਅਸਫਲ ਡਿਜੀਟਲ ਲੈਣ-ਦੇਣ ਨਾਲ ਸਬੰਧਤ ਨਿਯਮ ਬਣਾਏ ਹੋਏ ਹਨ, ਜਿਨ੍ਹਾਂ ਤਹਿਤ ਨਿਰਧਾਰਤ ਸਮਾਂ-ਸੀਮਾ ਵਿਚ ਪੈਸੇ ਵਾਪਸ ਨਾ ਆਉਣ ’ਤੇ ਕੁਝ ਯੋਗ ਮਾਮਲਿਆਂ ਵਿਚ ਗਾਹਕ ਨੂੰ ਹਰ ਰੋਜ਼ ₹100 ਮੁਆਵਜ਼ਾ ਮਿਲ ਸਕਦਾ ਹੈ। RBI ਦੇ ਨਿਯਮਾਂ ਅਨੁਸਾਰ, ਮੁਆਵਜ਼ਾ ਮਿਲਣਾ ਲੈਣ-ਦੇਣ ਦੀ ਕਿਸਮ ਅਤੇ ਦੇਰੀ ਦੇ ਕਾਰਨ ’ਤੇ ਨਿਰਭਰ ਕਰਦਾ ਹੈ। ਇਸ ਲਈ ਹਰ ਅਸਫਲ UPI ਭੁਗਤਾਨ ’ਤੇ ਆਪਣੇ ਆਪ ₹100 ਮਿਲਣਾ ਲਾਜ਼ਮੀ ਨਹੀਂ ਹੈ।
ਜੇਕਰ ਤੁਹਾਡੇ ਖਾਤੇ ਵਿਚੋਂ ਪੈਸੇ ਕੱਟੇ ਗਏ ਹਨ, ਪਰ ਦੂਜੇ ਵਿਅਕਤੀ ਜਾਂ ਦੁਕਾਨਦਾਰ ਨੂੰ ਨਹੀਂ ਮਿਲੇ, ਤਾਂ ਸਭ ਤੋਂ ਪਹਿਲਾਂ ਆਪਣੀ UPI ਐਪ ਵਿਚ ਲੈਣ-ਦੇਣ ਦੀ ਸਥਿਤੀ ਚੈੱਕ ਕਰੋ। ਇਸ ਤੋਂ ਬਾਅਦ ਬੈਂਕ ਜਾਂ ਭੁਗਤਾਨ ਸੇਵਾ ਪ੍ਰਦਾਤਾ ਕੋਲ ਸ਼ਿਕਾਇਤ ਦਰਜ ਕਰਵਾਓ। ਜੇਕਰ ਨਿਰਧਾਰਤ ਸਮਾਂ-ਸੀਮਾ ਵਿਚ ਸਮੱਸਿਆ ਦਾ ਹੱਲ ਨਹੀਂ ਹੁੰਦਾ, ਤਾਂ RBI ਦੇ ਲਾਗੂ ਨਿਯਮਾਂ ਅਨੁਸਾਰ ਮੁਆਵਜ਼ੇ ਦੀ ਮੰਗ ਕੀਤੀ ਜਾ ਸਕਦੀ ਹੈ।ਗਾਹਕਾਂ ਲਈ ਜ਼ਰੂਰੀ ਹੈ ਕਿ ਉਹ ਲੈਣ-ਦੇਣ ਦੀ ਰਸੀਦ, UPI ਰੈਫਰੈਂਸ ਨੰਬਰ ਅਤੇ ਸ਼ਿਕਾਇਤ ਦੀ ਜਾਣਕਾਰੀ ਸੰਭਾਲ ਕੇ ਰੱਖਣ, ਤਾਂ ਜੋ ਲੋੜ ਪੈਣ ’ਤੇ ਇਨ੍ਹਾਂ ਦੀ ਵਰਤੋਂ ਕੀਤੀ ਜਾ ਸਕੇ।
