ਨਵੀਂ ਦਿੱਲੀ, 11 ਨਵੰਬਰ (ਏਜੰਸੀ)-ਮੂਡੀਜ਼ ਰੇਟਿੰਗਜ਼ ਨੇ ਬੁੱਧਵਾਰ ਨੂੰ ਕਿਹਾ ਕਿ ਵਿਆਪਕ ਆਰਥਿਕ ਵੇਗ ਅਤੇ ਊਰਜਾ ਸਪਲਾਈ ਦੇ ਝਟਕਿਆਂ ਨੂੰ ਸਹਿਣ ਦੀ ਸਮਰੱਥਾ ਦੇ ਦਮ ’ਤੇ ਮੌਜੂਦਾ ਵਿੱਤੀ ਵਰ੍ਹੇ ’ਚ ਭਾਰਤੀ ਅਰਥਵਿਵਸਥਾ ਦੇ 7 ਫ਼ੀਸਦੀ ਦੀ ਉੱਚੀ ਦਰ ਨਾਲ ਵਧਣ ਦੀ ਉਮੀਦ ਹੈ। ਹਾਲਾਂਕਿ, ਮੂਡੀਜ਼ ਨੇ ਆਪਣੇ ‘ਗਲੋਬਲ ਮੈਕਰੋ ਆਉਟਲੁੱਕ 2027-28’ ’ਚ ਕਿਹਾ ਹੈ ਕਿ ਵਿਕਾਸ ਲਈ ਨੇੜਲੇ ਭਵਿੱਖ ਦੇ ਜੋਖਮ ਬਣੇ ਹੋਏ ਹਨ।
ਇਸ ਦਾ ਕਾਰਨ ਇਹ ਹੈ ਕਿ ਪਰਿਵਾਰਕ ਖਪਤ “ਵਧਦੀਆਂ ਅਤੇ ਵਿਆਪਕ ਹੁੰਦੀਆਂ ਕੀਮਤਾਂ ਦੇ ਦਬਾਅ” ਕਾਰਨ ਕਮਜ਼ੋਰ ਸਥਿਤੀ ’ਚ ਹੈ। ਨਾਲ ਹੀ, ਮੁੱਖ ਮਹਿੰਗਾਈ ਦਰ ਭਾਰਤੀ ਰਿਜ਼ਰਵ ਬੈਂਕ ਦੇ 2-6 ਫੀਸਦੀ ਦੇ ਟੀਚੇ ਦੀ ਉਪਰਲੀ ਸੀਮਾ ਦੇ ਨੇੜੇ ਪਹੁੰਚ ਗਈ ਹੈ। ਇਸ ਤੋਂ ਇਲਾਵਾ, ਦੱਖਣ-ਪੱਛਮੀ ਮੌਨਸੂਨ ਦੀ ਕਮੀ ਅਤੇ ‘ਅਲ ਨੀਨੋ’ ਹਾਲਾਤ ਦਾ ਮਜ਼ਬੂਤ ਹੋਣਾ ਖੇਤੀਬਾੜੀ ਉਤਪਾਦਨ ਅਤੇ ਪੇਂਡੂ ਮੰਗ ’ਤੇ ਨਕਾਰਾਤਮਕ ਪ੍ਰਭਾਵ ਪਾਵੇਗਾ।
ਇਸ ਨੇ ਕਿਹਾ ਕਿ ਭਾਰਤ ਦਾ ਵਿਆਪਕ ਆਰਥਿਕ ਵੇਗ ਅਤੇ ਊਰਜਾ ਸਪਲਾਈ ਦੇ ਝਟਕੇ ਪ੍ਰਤੀ ਦਿਖਾਈ ਗਈ ਲਚਕਤਾ ਸਾਡੇ 2026-27 ਦੇ ਵਿਕਾਸ ਪੂਰਵ-ਅਨੁਮਾਨਾਂ ਨੂੰ 6.5 ਫੀਸਦੀ ਤੋਂ ਵਧਾ ਕੇ 7 ਫ਼ੀਸਦੀ ਕਰਨ ਦਾ ਆਧਾਰ ਬਣਦੀ ਹੈ।
