ਜੀ.ਐਸ.ਟੀ. 'ਚ ਕਟੌਤੀ ਦਾ ਲਾਭ ਖਪਤਕਾਰਾਂ ਨੂੰ ਮਿਲ ਰਿਹੈ-ਸੀਤਾਰਮਨ

ਕਿਹਾ, ਕੀਮਤਾਂ 'ਤੇ ਨਿਗਰਾਨੀ ਰੱਖ ਰਹੀ ਹੈ ਸਰਕਾਰ
ਨਵੀਂ ਦਿੱਲੀ, 18 ਅਕਤੂਬਰ (ਪੀ.ਟੀ.ਆਈ.)-ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਸਨਿਚਰਵਾਰ ਨੂੰ ਕਿਹਾ ਕਿ ਜੀ.ਐਸ.ਟੀ. ਸੁਧਾਰਾਂ ਦੇ ਲਾਭ ਘਟੀਆਂ ਕੀਮਤਾਂ ਦੇ ਰੂਪ ਵਿਚ ਖਪਤਕਾਰਾਂ ਤੱਕ ਪਹੁੰਚ ਰਹੇ ਹਨ | ਜੀ.ਐਸ.ਟੀ. ਬੱਚਤ ਉਤਸਵ 'ਤੇ ਇੱਕ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ ਸਰਕਾਰ 22 ਸਤੰਬਰ ਨੂੰ ਘੱਟ ਜੀ.ਐਸ.ਟੀ. ਦਰਾਂ ਲਾਗੂ ਹੋਣ ਤੋਂ ਬਾਅਦ ਦੇਸ਼ ਭਰ ਵਿਚ 54 ਵਸਤੂਆਂ ਵਿਚ ਕੀਮਤਾਂ ਵਿਚ ਕਟੌਤੀ ਦੀ ਨਿਗਰਾਨੀ ਕਰ ਰਹੀ ਹੈ | 'ਜੀ.ਐਸ.ਟੀ. ਦਰਾਂ ਵਿਚ ਕਟੌਤੀ ਦੇ ਨਤੀਜੇ ਵਜੋਂ ਖਰੀਦਦਾਰੀ ਵਿਚ ਵਾਧਾ ਹੋਇਆ ਹੈ | ਸੀਤਾਰਮਨ ਨੇ ਕਿਹਾ ਕਿ ਖਪਤ ਮੁਹਿੰਮ ਜਾਰੀ ਰਹੇਗੀ | ਸਾਨੂੰ ਯਕੀਨ ਹੈ ਕਿ ਕੰਪਨੀਆਂ ਦੁਆਰਾ ਅਜਿਹੀਆਂ ਹਰ ਵਸਤੂਆਂ 'ਤੇ ਲਾਭ ਦਿੱਤੇ ਜਾ ਰਹੇ ਹਨ | ਕੁਝ ਵਸਤੂਆਂ ਦੇ ਮਾਮਲੇ ਵਿਚ ਕਾਰੋਬਾਰਾਂ ਨੇ ਖਪਤਕਾਰਾਂ ਨੂੰ ਭਾਰ-ਔਸਤ ਜੀ.ਐਸ.ਟੀ. ਦਰ ਕਟੌਤੀ ਦੇ ਲਾਭਾਂ ਤੋਂ ਵੱਧ ਦਿੱਤੇ ਹਨ | ਸੀਤਾਰਮਨ ਨੇ ਕਿਹਾ ਕਿ ਖਪਤਕਾਰ ਮਾਮਲਿਆਂ ਦੇ ਵਿਭਾਗ ਨੂੰ ਜੀ.ਐਸ.ਟੀ. ਕਟੌਤੀ ਦੇ ਅਨੁਸਾਰ ਕੀਮਤਾਂ ਵਿਚ ਕਮੀ ਨਾ ਕਰਨ ਨਾਲ ਸੰਬੰਧਿਤ 3,169 ਸ਼ਿਕਾਇਤਾਂ ਪ੍ਰਾਪਤ ਹੋਈਆਂ ਹਨ | ਇਸ 'ਚੋਂ 3,075 ਸ਼ਿਕਾਇਤਾਂ ਕੇਂਦਰੀ ਅਸਿੱਧੇ ਟੈਕਸ ਤੇ ਕਸਟਮ ਬੋਰਡ (ਸੀ.ਬੀ.ਆਈ.ਸੀ.) ਦੇ ਨੋਡਲ ਅਧਿਕਾਰੀਆਂ ਨੂੰ ਭੇਜੀਆਂ ਗਈਆਂ ਹਨ | ਵਿਭਾਗ ਵਲੋਂ ਕੁੱਲ 94 ਸ਼ਿਕਾਇਤਾਂ ਦਾ ਨਿਪਟਾਰਾ ਕੀਤਾ ਗਿਆ ਹੈ | ਮੰਤਰੀ ਨੇ ਕਿਹਾ ਕਿ ਵਿਭਾਗ ਸ਼ਿਕਾਇਤ ਰਿਪੋਰਟਿੰਗ ਪੋਰਟਲ 'ਤੇ ਇੱਕ ਕਾਰਜਸ਼ੀਲਤਾ ਨੂੰ ਸਮਰੱਥ ਬਣਾਏਗਾ, ਤਾਂ ਜੋ ਸ਼ਿਕਾਇਤਾਂ ਨੂੰ ਸੰਬੰਧਿਤ ਜ਼ੋਨਾਂ ਦੇ ਮੁੱਖ ਕਮਿਸ਼ਨਰਾਂ ਨੂੰ ਭੇਜਿਆ ਜਾ ਸਕੇ, ਜਿੱਥੋਂ ਸ਼ਿਕਾਇਤਾਂ ਆਈਆਂ ਹਨ | 22 ਸਤੰਬਰ ਤੋਂ ਨਵੀਆਂ ਘੱਟ ਜੀ.ਐਸ.ਟੀ. ਦਰਾਂ ਲਾਗੂ ਹੋਈਆਂ, ਜਿਸ ਦੇ ਨਤੀਜੇ ਵਜੋਂ ਟੁਥਪੇਸਟ ਤੇ ਸ਼ੈਂਪੂ ਤੋਂ ਲੈ ਕੇ ਕਾਰਾਂ ਤੇ ਟੈਲੀਵਿਜ਼ਨ ਸੈੱਟਾਂ ਤੱਕ 375 ਵਸਤੂਆਂ ਦੀਆਂ ਕੀਮਤਾਂ ਘਟੀਆਂ | 5, 12, 18 ਅਤੇ 28 ਫੀਸਦੀ ਦੀਆਂ ਟੈਕਸ ਦਰਾਂ ਨੂੰ 5 ਫੀਸਦੀ ਅਤੇ 18 ਫੀਸਦੀ ਦੀਆਂ ਦੋ ਦਰਾਂ ਵਿਚ ਜੋੜ ਦਿੱਤਾ ਗਿਆ ਹੈ, ਜਿਸ ਦੇ ਨਤੀਜੇ ਵਜੋਂ ਰੋਜ਼ਾਨਾ ਵਰਤੋਂ ਦੀਆਂ ਵਸਤੂਆਂ ਦੀਆਂ 99 ਫੀਸਦੀ ਕੀਮਤਾਂ ਘਟੀਆਂ ਹਨ |