ਮੁੱਲਾਂਪੁਰ-ਦਾਖਾ, 27 ਸਤੰਬਰ (ਨਿਰਮਲ ਸਿੰਘ ਧਾਲੀਵਾਲ)-ਨਗਰ ਕੌਂਸਲ ਮੁੱਲਾਂਪੁਰ ਦਾਖਾ ਵਿਖੇ ਸਥਾਨਕ ਸਰਕਾਰਾਂ ਵਿਭਾਗ ਦੀਆਂ ਹਦਾਇਤਾਂ 'ਤੇ ਪ੍ਰਧਾਨ ਮੰਤਰੀ ਸਵੈਨਿਧੀ ਯੋਜਨਾ ਅਧੀਨ ਸ਼ਹਿਰੀ ਖੇਤਰ ਦੇ ਰੇਹੜੀ-ਫੜ੍ਹੀ ਵਾਲਿਆਂ ਨੂੰ ਸਬਸਿਡੀ ਕਰਜ਼ਾ ਮੁਹੱਈਆ ਕਰਵਾਉਣ ਲਈ ਮੁੱਲਾਂਪੁਰ-ਦਾਖਾ ਨਗਰ ਕੌਂਸਲ ਪ੍ਰਧਾਨ ਜਸਵਿੰਦਰ ਸਿੰਘ ਹੈਪੀ, ਕਾਰਜ ਸਾਧਕ ਅਫ਼ਸਰ ਹੈਪੀ ਸਿੰਘ ਦੀ ਅਗਵਾਈ ਹੇਠ ਲਗਾਏ ਲੋਕ ਕਲਿਆਣ ਮੇਲੇ ਦਾ ਸੈਂਕੜੇ ਸਟਰੀਟ ਵੈਂਡਰਾਂ ਨੇ ਲਾਹਾ ਲਿਆ | ਇਸ ਪ੍ਰੋਗਰਾਮ ਤਹਿਤ ਸ਼ਹਿਰ ਅੰਦਰ ਰੇਹੜੀ-ਫੜ੍ਹੀ ਵਾਲਿਆਂ ਦੇ ਸਬਸਿਡੀ ਸਹਿਤ 15000/-, 25000/-ਅਤੇ 50000/- ਰੁਪਏ ਲੋਨ ਸਬੰਧੀ ਫਾਰਮ ਭਰਵਾਏ ਗਏ | ਕੈਂਪ ਵਿਚ ਵੱਖ-ਵੱਖ ਬੈਂਕਾਂ ਦੇ ਅਧਿਕਾਰੀਆਂ ਵਲੋਂ ਸਟਰੀਟ ਵੈਂਡਰਾਂ ਨੂੰ ਲੋਨ ਸਬੰਧੀ ਜਾਣਕਾਰੀ ਵੰਡੀ ਗਈ | ਇਸ ਮੌਕੇ ਰੇਹੜੀ-ਫੜ੍ਹੀ ਵਾਲਿਆਂ ਨੂੰ ਸਵੈਨਿਧੀ ਸਮਰਿੱਧੀ ਸਕੀਮ ਨਾਲ ਜੋੜਨ ਦੇ ਨਾਲ ਡਿਜ਼ੀਟਲੀ ਐਕਟੀਵੇਟ ਕਰਕੇ ਉਨ੍ਹਾਂ ਨੂੰ ਕਿਊ ਆਰ ਕੋਡ ਵੀ ਦਿੱਤੇ ਗਏ | ਕੈਂਪ ਸਮੇਂ ਸਿਟੀ ਮਿਸ਼ਨ ਮੈਨੇਜਰ ਨਰਿੰਦਰਦੀਪ ਕੌਰ, ਗੁਰਤੇਜ ਸਿੰਘ, ਜੂਨੀਅਰ ਸਹਾਇਕ ਕਮ ਨੋਡਲ ਅਫ਼ਸਰ ਲਖਵਿੰਦਰ ਸਿੰਘ, ਕਲਰਕ ਕੁਲਵਿੰਦਰ ਸਿੰਘ, ਕਲਰਕ ਗੁਰਪ੍ਰੀਤ ਕੌਰ ਹੋਰਨਾਂ ਨੇ ਡਿਊਟੀ ਬਾਖੂਬੀ ਨਿਭਾਈ |