ਜਗਰਾਉਂ, 21 ਦਸੰਬਰ (ਸ਼ਮਸ਼ੇਰ ਸਿੰਘ ਗਾਲਿਬ)- ਸਾਹਿਤ ਸਾਹਿਤ ਸਭਾ ਦੀ ਮਹੀਨਾਵਾਰ ਮੀਟਿੰਗ ਪ੍ਰਧਾਨ ਅਵਤਾਰ ਸਿੰਘ ਦੀ ਅਗਵਾਈ ਹੇਠ ਜਗਰਾਉਂ ਵਿਖੇ ਹੋਈ | ਇਹ ਮੀਟਿੰਗ ਅੰਤਰਰਾਸ਼ਟਰੀ ਸ਼ਾਇਰ ਅਤੇ ਚਿੱਤਰਕਾਰ ਦੇਵ ਨੂੰ ਸਮਰਪਿਤ ਸੀ | ਇਸ ਸਮੇਂ ਬੁਲਾਰਿਆਂ ਨੇ ਕਿਹਾ ਕਿ ਦੇਵ ਕਲਾ ਤੇ ਕਵਿਤਾ ਨਾਲ ਹਕੀਕੀ ਤੌਰ 'ਤੇ ਜੁੜਿਆ ਸਿਰਜਕ ਸੀ, ਜਿਸ ਦੀ ਜੀਵਨ-ਸ਼ੈਲੀ ਵੀ ਕਾਵਿਕ ਤੇ ਕਲਾਤਮਿਕ ਸੀ | ਉਨ੍ਹਾਂ ਕਿਹਾ ਕਿ ਸਿਰਜਣਾ ਸਮੇਤ ਪੰਜਾਬੀ ਦੀਆਂ ਅਨੇਕ ਸਾਹਿਤਕ ਪੱਤਿ੍ਕਾਵਾਂ ਵਿਚ ਮੁੱਖ ਪੰਨੇ 'ਤੇ ਛਪਦਾ ਸੀ, ਜਿਸ ਨੂੰ ਦੁਨੀਆ ਭਰ ਦੇ ਲੋਕ ਪਸੰਦ ਕਰਦੇ ਸਨ | ਇਸ ਮੌਕੇ ਭੰਗੜਾ ਉਸਤਾਦ ਕੁਲਦੀਪ ਸਿੰਘ ਨੂੰ ਵੀ ਯਾਦ ਕੀਤਾ ਗਿਆ | ਦੇਸ਼ ਦੇ ਮੌਜੂਦਾ ਮਾਹੌਲ ਤੇ ਸੰਵਾਦ ਰਚਾਉਂਦਿਆਂ ਸਭਾ ਦੇ ਪ੍ਰੋ: ਐੱਚ.ਐੱਸ. ਡਿੰਪਲ ਨੇ ਚਲੰਤ ਮੁੱਦਿਆਂ ਬਾਰੇ ਚਰਚਾ ਕੀਤੀ ਅਤੇ 'ਇਸ਼ਕ ਦੇ ਦਾਉ-ਪੇਚਾਂ ਤੋਂ, ਮਾਸ਼ੂਕਾ ਦੀ ਮੁਹੱਬਤ ਤੱਕ, ਗ਼ਜ਼ਲ ਕਿਉਂ ਹੋ ਗਈ ਸੀਮਤ, ਅਮੀਰਾਂ ਦੀ ਹੀ ਖੱਬਤ ਤੱਕ' ਮਤਲੇ ਨਾਲ ਆਪਣਾ ਕਾਵਿ-ਕਲਾਮ ਪੇਸ਼ ਕੀਤਾ | ਇਸ ਮੌਕੇ ਬੋਲਦਿਆਂ ਨੌਜਵਾਨ ਸ਼ਾਇਰ ਪ੍ਰਭਜੋਤ ਸੋਹੀ ਨੇ ਆਖਿਆ ਕਿ ਸਮਾਜ ਵਿਚ ਸਹਿਣਸ਼ੀਲਤਾ ਤੇ ਸੁਤੰਤਰਤਾ ਦਾ ਮਾਹੌਲ ਪੈਦਾ ਕਰਨ ਲਈ ਸਾਹਿਤ ਦੀ ਵੱਡੀ ਭੂਮਿਕਾ ਹੁੰਦੀ ਹੈ | ਇਸ ਮੌਕੇ ਪ੍ਰਧਾਨ ਅਵਤਾਰ ਸਿੰਘ ਨੇ ਇਨ੍ਹਾਂ ਕਥਨ ਦੀ ਪ੍ਰੋੜਤਾ ਕਰਦਿਆਂ ਆਖਿਆ ਕਿ ਸਮਾਜਿਕ ਤੇ ਸਿਆਸੀ ਮਸਲਿਆਂ ਵਿਚ ਬੌਧਿਕ ਦਖ਼ਲਅੰਦਾਜ਼ੀ ਕਰਨਾ ਵੀ ਅਦੀਬ ਦੇ ਵੱਡੇ ਫਰਜ਼ਾਂ ਵਿਚ ਸ਼ੁਮਾਰ ਹੈ | ਇਸ ਮੌਕੇ ਲੇਖਕ ਅਜੀਤ ਪਿਆਸਾ ਦੁਆਰਾ ਸੂਫ਼ੀ ਰੰਗ ਵਿਚ ਗੀਤ ਗਾਏ ਗਏ | ਇਸ ਮੌਕੇ ਮੇਜਰ ਸਿੰਘ ਛੀਨਾ ਨੇ ਵੀ ਆਪਣਾ ਗੀਤ ਪੇਸ਼ ਕੀਤਾ | ਇਸ ਮੌਕੇ ਪ੍ਰਭਜੋਤ ਸੋਹੀ ਤੇ ਰਾਜਦੀਪ ਤੂਰ ਨੇ ਕ੍ਰਮਵਾਰ 'ਸੂਹੀ ਨਾਦ' ਤੇ 'ਧੀਆਂ' ਤੇ ਆਪਣੀਆਂ ਚਰਚਿੱਤ ਕਾਵਿ-ਰਚਨਾਵਾਂ ਪੇਸ਼ ਕੀਤੀਆਂ ਅਤੇ ਡਾ: ਜਸਵੰਤ ਸਿੰਘ ਢਿਲੋਂ ਨੇ ਆਪਣੀ ਆਵਾਜ਼ ਵਿਚ ਰਾਜਦੀਪ ਤੂਰ ਦੀ ਇਕ ਗ਼ਜ਼ਲ 'ਧੀਆਂ' ਸਾਂਝੀ ਕੀਤੀ | ਇਸ ਸਮੇਂ ਕੁਲਦੀਪ ਲੋਹਟ ਨੇ ਵੀ ਆਪਣੇ ਵਿਚਾਰ ਪੇਸ਼ ਕੀਤੇ | ਇਸ ਸਮੇਂ ਅਮਰਜੀਤ ਮਾਹੀ ਨੇ 'ਕਲਾ' ਵਿਸ਼ੇ 'ਤੇ ਆਪਣੀ ਕਵਿਤਾ ਪੇਸ਼ ਕੀਤੀ | ਇਸ ਮੌਕੇ ਸਭਾ ਦੇ ਪ੍ਰਧਾਨ ਅਵਤਾਰ ਜਗਰਾਉਂ ਵਲੋਂ ਅਗਲੀ ਬੈਠਕ ਜਨਵਰੀ 2026 ਮਹੀਨੇ ਦੇ ਤੀਸਰੇ ਐਤਵਾਰ ਹੋਣ ਬਾਰੇ ਦੱਸਿਆ | ਜਿਸ ਦੌਰਾਨ ਸਭਾ ਦੇ ਸਲਾਨਾ ਸਮਾਗਮ ਦੌਰਾਨ ਸਨਮਾਨਿਤ ਕੀਤੀਆਂ ਜਾਣ ਵਾਲੀਆਂ ਸ਼ਖ਼ਸੀਅਤਾਂ ਦੇ ਨਾਵਾਂ ਤੇ ਰਚਨਾਵਾਂ ਬਾਰੇ ਸੰਵਾਦ ਰਚਾਇਆ ਜਾਵੇਗਾ |
