ਬਹਿਰਾਮਪੁਰ, 4 ਸਤੰਬਰ (ਪ੍ਰੋ: ਬਲਬੀਰ ਸਿੰਘ ਕੋਲਾ)-ਬੀਤੇ ਦਿਨਾਂ 'ਚ ਪੈ ਲਗਾਤਾਰ ਮੀਂਹ ਕਰਕੇ ਰਾਵੀ ਦਰਿਆ ਦਾ ਪਾਣੀ ਕੰਢਿਆਂ ਤੋਂ ਬਾਹਰ ਆਉਣ ਨਾਲ ਕਿਸਾਨਾਂ ਦੀਆਂ ਫ਼ਸਲਾਂ ਅਤੇ ਸੜਕਾਂ ਪਾਣੀ ਵਿਚ ਡੁੱਬ ਗਈਆਂ ਹਨ | ਬੀਤੀ ਰਾਤ ਇਲਾਕੇ ਦੇ ਲੋਕਾਂ ਸਹਿਮ ਵਿਚ ਕੱਟੀ ਹੈ | ਪਰ ਅੱਜ ਪਾਣੀ ਦਾ ਪੱਧਰ ਘੱਟਣਾ ਸ਼ੁਰੂ ਹੋ ਗਿਆ ਹੈ | ਇਲਾਕੇ ਦੇ ਪਿੰਡ ਝਬਕਰਾ ਦਾ ਨਿਵਾਣ ਵਾਲਾ ਇਲਾਕਾ, ਚੱਕ ਰਾਮ ਸਹਾਏ, ਮਕੌੜਾ, ਜੁੱਗੋਚੱਕ ਟਾਂਡਾ, ਕਾਹਨਾ, ਓਗਰਾ, ਠੱਠੀ ਫਰੀਦਪੁਰ ਅਤੇ ਨਵੀਂ ਆਬਾਦੀ ਚੰਡੀਗੜ੍ਹ ਪਾਣੀ ਦੀ ਮਾਰ ਹੇਠ ਹਨ | ਪਿੰਡ ਝਬਕਰਾ ਤੋਂ ਜੁੱਗੋਚੱਕ ਟਾਂਡਾ ਤੇ ਅਗਲੇ ਪਿੰਡਾਂ ਨੰੂ ਜਾਣ ਵਾਲੀ ਸੜਕ ਪਾਣੀ ਵਿਚ ਡੁੱਬੀ ਹੋਈ ਹੈ | ਹੜ੍ਹ ਪੀੜਤ ਲੋਕਾਂ ਦੀ ਮਦਦ ਲਈ ਲੰਗਰ, ਸੁੱਕਾ ਰਾਸ਼ਨ, ਪਸ਼ੂਆਂ ਲਈ ਤੂੜੀ ਅਤੇ ਚੋਖਰ ਲੈ ਕੇ ਆਉਣ ਵਾਲੇ ਲੋਕਾਂ ਤੇ ਵਾਹਨਾਂ ਦਾ ਮੇਲਾ ਲੱਗਾ ਹੋਇਆ ਹੈ | ਲੋਕ ਦੂਰੋਂ-ਦੂਰੋਂ ਹੜ੍ਹ ਪੀੜਤਾਂ ਦੀ ਮਦਦ ਲਈ ਆ ਰਹੇ ਹਨ ਤੇ ਦਿਲ ਖੋਲ ਕੇ ਪੀੜਤਾਂ ਦੀ ਮਦਦ ਕਰ ਰਹੇ ਹਨ | ਚੰਡੀਗੜ੍ਹ, ਮੁਹਾਲੀ ਤੋਂ ਨੌਜਵਾਨ ਵੱਡੀ ਪੱਧਰ 'ਤੇ ਰਾਸ਼ਨ ਤੇ ਸਮਾਨ ਲੈ ਕੇ ਆਏ ਹੋਏ ਹਨ ਅਤੇ ਦਿਲੋਂ ਲੋਕਾਂ ਦੀ ਮਦਦ ਘਰ-ਘਰ ਪਹੁੰਚ ਕੇ ਕਰਕੇ ਕਰ ਰਹੇ ਹਨ |
