ਕਾਦੀਆਂ, 26 ਦਸੰਬਰ (ਕੁਲਵਿੰਦਰ ਸਿੰਘ)- ਸਾਰੇ ਧਰਮਾਂ ਵਿਚ ਅਮਨ ਅਤੇ ਸੁਲਹਾ ਦੀ ਬੁਨਿਆਦ ਪਾਉਣ ਵਾਲਾ ਇਕ ਰੂਹਾਨੀ ਸੰਮੇਲਨ ਮੁਸਲਿਮ ਜਮਾਤ ਅਹਿਮਦੀਆ ਭਾਰਤ ਦੇ ਮੁੱਖ ਕੇਂਦਰ ਕਾਦੀਆਨ ਦਾਰੁਲ ਅਮਾਨ ਵਿਚ 130ਵਾਂ ਜਲਸਾ ਸਾਲਾਨਾ ਆਪਣੀ ਰਵਾਇਤੀ ਸ਼ਾਨੋ-ਸ਼ੌਕਤ ਨਾਲ ਆਰੰਭ ਹੋ ਗਿਆ | ਪਵਿੱਤਰ ਕੁਰਆਨ ਸ਼ਰੀਫ ਦੀ ਤਿਲਾਵਤ ਨਾਲ ਜਲਸਾ ਆਰੰਭ ਹੋਇਆ | ਸਮਾਰੋਹ ਦੀ ਪ੍ਰਧਾਨਗੀ ਸਦਰ ਅੰਜੁਮਨ ਅਹਿਮਦੀਆ ਮੌਲਾਨਾ ਮੁਹੰਮਦ ਕਰੀਮ-ਓਦ-ਦੀਨ ਸ਼ਾਹਿਦ ਨੇ ਕੀਤੀ | ਅੱਜ ਸ਼ੁਰੂ ਹੋਏ ਤਿੰਨ ਦਿਨਾਂ ਜਲਸੇ ਦੇ ਪਹਿਲੇ ਦਿਨ ਮੌਲਾਨਾ ਮੁਹੰਮਦ ਹਮੀਦ ਕੋਸਰ ਅਤੇ ਮੌਲਾਨਾ ਅਤਾਉਲ ਮੁਜੀਬ ਲੋਨ ਨੇ ਸੰਬੋਧਨ ਕੀਤਾ | ਮੌਲਾਨਾ ਰਫ਼ੀਕ ਅਹਿਮਦ ਮਲਾਬਾਰੀ ਸਾਹਿਬ ਸਦਰ ਮਜਲਿਸ ਤਹਰੀਕ-ਏ-ਜਦੀਦ, ਅੰਜੂਮਨ ਅਹਿਮਦੀਆ ਕਾਦਿਆਨ ਨੇ ਸੰਬੋਧਨ ਕਰਦਿਆਂ ਜਲਸਾ ਸਾਲਾਨਾ ਦੀ ਰੂਹਾਨੀ ਅਹਿਮੀਅਤ ਅਤੇ ਇਸ ਦੀ ਆਲਮੀ ਵਿਸ਼ਾਲਤਾ ਨੂੰ ਉਜਾਗਰ ਕੀਤਾ | ਜਲਸਾ ਸਾਲਾਨਾ ਦਾ ਜਾਣ-ਪਛਾਣ ਪੈਦਾ ਕਰਨ, ਨਵੇਂ ਅਤੇ ਪੁਰਾਣੇ ਅਫ਼ਰਾਦ ਦੇ ਰੂਹਾਨੀ ਰਿਸ਼ਤਿਆਂ ਨੂੰ ਮਜ਼ਬੂਤ ਕਰਨ, ਮਰਹੂਮੀਨ ਲਈ ਸਾਂਝੀਆਂ ਦੁਆਵਾਂ ਤੇ ਸ਼ਾਮਲ ਹੋਣ ਵਾਲਿਆਂ ਲਈ ਖ਼ਾਸ ਦੁਆਵਾਂ ਦਾ ਮੌਕਾ ਵੀ ਪੈਦਾ ਕਰਦਾ ਹੈ | ਮੁਹੰਮਦ ਹਮੀਦ ਕੌਸਰ ਸਾਹਿਬ ਨੇ ਵੀ ਸੰਬੋਧਨ ਕੀਤਾ | ਮੁਸਲਿਮ ਜਮਾਤ ਅਹਿਮਦੀਆ ਭਾਰਤ ਦੇ ਸਕੱਤਰ ਮੁਹੰਮਦ ਇਨਾਮ ਗ਼ੌਰੀ ਨੇ ਵੀ ਆਏ ਸ਼ਰਧਾਲੂਆਂ ਦਾ ਸਵਾਗਤ ਕੀਤਾ ਤੇ ਜਲਸੇ ਦੀ ਮਹਾਨਤਾ ਉਪਰ ਚਾਨਣਾ ਪਾਇਆ ਤੇ ਕਿਹਾ ਕਿ ਮੁਸਲਿਮ ਜਮਾਤ ਅਹਿਮਦੀਆ ਦੇ ਰੂਹਾਨੀ ਪੰਜਵੇਂ ਖ਼ਲੀਫ਼ਾ ਹਜ਼ਰਤ ਮਿਰਜ਼ਾ ਮਸਰੂਰ ਅਹਿਮਦ ਦੀ ਦੇਖ-ਰੇਖ ਹੇਠ ਅਹਿਮਦੀਆ ਜਮਾਤ ਤਰੱਕੀ ਕਰ ਰਹੀ ਹੈ | ਹਾਫ਼ਜ਼ ਮਖਦੂਮ ਸ਼ਰੀਫ਼ ਸਾਹਿਬ ਐਡੀਸ਼ਨਲ ਨਾਜ਼ਿਰ ਆਲਾ ਦੱਖਣੀ ਹਿੰਦ ਨੇ ਵੀ ਸੰਬੋਧਨ ਕੀਤਾ | ਇਸ ਤੋਂ ਇਲਾਵਾ ਮੁਨੀਰ ਅਹਿਮਦ ਖ਼ਾਦਿਮ ਨੇ ਕਿਹਾ ਕਿ ਦੁਨੀਆ ਦੇ 220 ਤੋਂ ਵੱਧ ਮੁਲਕਾਂ ਤੱਕ ਮੁਸਲਿਮ ਜਮਾਤ ਅਹਿਮਦੀਆ ਆਪਣਾ ਸੰਦੇਸ਼ 'ਮੁਹੱਬਤ ਸਭ ਨਾਲ ਨਫ਼ਰਤ ਕਿਸੇ ਤੋਂ ਨਹੀਂ' ਪਹੁੰਚਾ ਰਹੀ ਹੈ | ਤਿੰਨ ਦਿਨ ਤੱਕ ਚੱਲਣ ਵਾਲੇ ਇਸ ਜਲਸੇ ਵਿਚ ਇਕ ਦਿਨ ਸਰਬ ਧਰਮ ਸੰਮੇਲਨ ਵੀ ਕਰਵਾਇਆ ਜਾ ਰਿਹਾ ਹੈ | ਬਾਹਰੋਂ ਆ ਰਹੇ ਮਹਿਮਾਨਾਂ ਤੇ ਸ਼ਰਧਾਲੂਆਂ ਲਈ ਲਈ ਰੇਲਵੇ ਵਲੋਂ ਕਾਦੀਆਂ-ਅੰਮਿ੍ਤਸਰ ਵਿਚਕਾਰ ਵਿਸ਼ੇਸ਼ ਰੇਲ ਗੱਡੀ ਵੀ ਸ਼ੁਰੂ ਕੀਤੀ ਗਈ ਹੈ, ਜੋ ਕਿ ਪਹਿਲੀ ਜਨਵਰੀ ਤੱਕ ਆਉਂਦੀ ਰਹੇਗੀ |
