ਲਾਡੋਵਾਲ, 1 ਸਤੰਬਰ (ਬਲਬੀਰ ਸਿੰਘ ਰਾਣਾ)-ਭਾਰੀ ਬਾਰਸ਼ਾਂ ਪੈਣ ਕਾਰਨ ਸਤਲੁਜ ਦਰਿਆ 'ਚ ਵੀ ਪਾਣੀ ਦਾ ਪੱਧਰ ਵਧਣ ਲੱਗਾ ਹੈ, ਜਿਸ ਨਾਲ ਆਸ-ਪਾਸ ਦੇ ਪਿੰਡਾਂ ਦੇ ਲੋਕ ਡਰ ਅਤੇ ਸਹਿਮ ਦੇ ਆਲਮ ਵਿਚ ਡੁੱਬੇ ਹੋਏ ਹਨ ਕਿਉਂਕਿ ਪਾਣੀ ਦਾ ਤੇਜ ਵਹਾਅ ਆਉਣ ਵਾਲੇ ਕਿਸੇ ਵੀ ਟਾਈਮ ਵਿਚ ਵਧ ਸਕਦਾ ਹੈ | ਜਦ ਸਤਲੁਜ ਦਰਿਆ ਵਿਚ ਵਗ ਰਹੇ ਪਾਣੀ ਦਾ ਪੱਧਰ ਜਾਣਨ ਲਈ ਲਾਡੋਵਾਲ ਦਫ਼ਤਰ ਦੇ ਗੇਜ ਮਾਸਟਰ ਸਰਬਜੀਤ ਸਾਬੀ ਅਤੇ ਰਾਮ ਸਰੂਪ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਅੱਜ ਸਤਲੁਜ ਰਿਹਾ ਵਿਚ ਕਰੀਬ 775.10 ਫੁੱਟ ਪਾਣੀ ਹੈ, ਜਿਹੜਾ ਕਿ 46 ਹਜ਼ਾਰ ਕਿਊਸਕ ਪਾਣੀ ਦੱਸਿਆ ਜਾ ਰਿਹਾ ਹੈ, ਜੋ ਇਸ ਵਕਤ ਵਗ ਰਿਹਾ ਹੈ | ਉਨ੍ਹਾਂ ਦੱਸਿਆ ਕਿ ਜਦ ਸਤਲੁਜ ਦਰਿਆ ਵਿਚ ਲੋਅ ਲੈਵਲ 'ਤੇ ਖ਼ਤਰਾ ਪੈਦਾ ਹੋਵੇਗਾ, ਤਦ ਇਸ ਦਰਿਆ ਵਿਚ 76000 ਕਿਊਸਕ ਪਾਣੀ ਵਗਣਾ ਸ਼ੁਰੂ ਹੋ ਜਾਵੇਗਾ, ਜਿਹੜਾ ਅੱਜ 46 ਹਜ਼ਾਰ ਕਿਊਸਕ ਪਾਣੀ ਵਗ ਰਿਹਾ ਹੈ, ਉਦੋਂ ਜ਼ਰੂਰ ਸਤਲੁਜ ਦਰਿਆ ਦਾ ਪਾਣੀ ਲੋਕਾਂ ਨੂੰ ਸੋਚਣ ਲਈ ਮਜਬੂਰ ਕਰੇਗਾ |
