ਫੁੱਲਾਂਵਾਲ/ਇਆਲੀ/ਥਰੀਕੇ, 1 ਸਤੰਬਰ (ਮਨਜੀਤ ਸਿੰਘ ਦੁੱਗਰੀ)-ਲਗਾਤਾਰ ਪੈ ਰਹੇ ਮੀਂਹ ਨੇ ਸਾਰਾ ਇਲਾਕਾ ਹੀ ਜਲਥਲ ਕਰਕੇ ਰੱਖ ਦਿੱਤਾ, ਜਿਸ ਨੂੰ ਲੈ ਕੇ ਵਾਹਨ ਚਾਲਕਾਂ ਦੇ ਨਾਲ ਨਾਲ ਪੈਦਲ ਚੱਲਣ ਵਾਲੇ ਰਾਹਗੀਰਾਂ ਨੂੰ ਵੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ | ਕਈ ਥਾਈਾ ਖੜੇ ਡੂੰਘੇ ਪਾਣੀ 'ਚੋਂ ਗੱਡੀਆਂ ਦੇ ਲੰਘਣ ਵੇਲੇ ਉਨ੍ਹਾਂ ਦੇ ਅਗਲੇ ਬੰਪਰ ਅਤੇ ਅਗਲੀਆਂ ਨੰਬਰ ਪਲੇਟਾਂ ਦੇ ਟੁੱਟ ਕੇ ਡਿਗ ਜਾਣ ਨਾਲ ਕਾਰ ਚਾਲਕਾਂ ਦੀ ਪਰੇਸ਼ਾਨੀ 'ਚ ਵਾਧਾ ਹੋਇਆ | ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਮਾਰਗ ਸਥਿਤ ਪਿੰਡ ਠੱਕਰਵਾਲ ਦੀ ਜੂਹ 'ਚ ਪੈਂਦੇ ਰਿਜੋਰਟ ਬਾਥ ਕੈਸਲ ਦੇ ਸਾਹਮਣੇ ਸੀਵਰੇਜ 'ਚੋਂ ਬੈਕ ਮਾਰ ਰਹੇ ਪਾਣੀ ਨੇ ਸਾਰੀ ਸੜਕ ਨੂੰ ਜਲਥਲ ਕਰ ਦਿੱਤਾ | ਇਸੇ ਤਰ੍ਹਾਂ ਰਾਜਗੁਰੂ ਨਗਰ ਦੀਆਂ ਸਾਰੀਆਂ ਸੜਕਾਂ ਜਲਥਲ ਹੋਈਆਂ ਰਹੀਆਂ ਅਤੇ ਹਾਊਸਿੰਗ ਬੋਰਡ ਕਾਲੋਨੀ ਵਿਖੇ ਇਕ ਵੱਡੇ ਪਿੱਪਲ ਦੇ ਦਰੱਖਤ ਦੇ ਟੁੱਟ ਕੇ ਸੜਕ 'ਤੇ ਡਿਗ ਜਾਣ ਨਾਲ ਆਵਾਜਾਈ ਪ੍ਰਭਾਵਿਤ ਹੋਈ ਅਤੇ ਬਿਜਲੀ ਦੀਆਂ ਤਾਰਾਂ ਖੰਬੇ ਅਤੇ ਟਰਾਂਸਫਾਰਮਰ ਇਸ ਦੀ ਲਪੇਟ ਵਿਚ ਆ ਜਾਣ ਨਾਲ ਬਿਜਲੀ ਅਤੇ ਇੰਟਰਨੈੱਟ ਸੇਵਾਵਾਂ ਪੂਰੀ ਤਰ੍ਹਾਂ ਠੱਪ ਹੋ ਕੇ ਰਹਿ ਗਈਆਂ | ਇਸ ਡਿੱਗਣ ਵਾਲੇ ਪਿੱਪਲ ਦੇ ਸਾਹਮਣੇ ਹੀ ਸਰਕਾਰੀ ਪ੍ਰਾਇਮਰੀ ਸਕੂਲ ਪੈਂਦਾ ਹੈ, ਜਿਸ ਨੂੰ ਮੀਂਹ ਦੇ ਚਲਦਿਆਂ ਸਰਕਾਰ ਵਲੋਂ 3 ਸਤੰਬਰ ਤੱਕ ਬੰਦ ਕਰਨ ਦੇ ਦਿੱਤੇ ਆਦੇਸ਼ਾਂ ਕਾਰਨ ਬੱਚਿਆਂ ਨੂੰ ਸਕੂਲੋਂ ਛੁੱਟੀ ਹੋਣ ਕਰਕੇ ਵੱਡਾ ਹਾਦਸਾ ਹੋਣੋਂ ਟਲ ਗਿਆ |
