ਲੁਧਿਆਣਾ, 21 ਦਸੰਬਰ (ਭੁਪਿੰਦਰ ਸਿੰਘ ਬੈਂਸ)- ਮਹਾਂਨਗਰ ਦੇ ਬਹਾਦੁਰਕੇ ਰੋਡ ਸਥਿਤ ਏਕਤਾ ਡਾਇੰਗ ਯੂਨਿਟ ਐਤਵਾਰ ਸਵੇਰੇ ਅਚਾਨਕ ਭਿਆਨਕ ਅੱਗ ਲੱਗ ਗਈ, ਜਿਸ ਨਾਲ ਇਲਾਕੇ ਵਿਚ ਹੜਕੰਪ ਮਚ ਗਿਆ | ਅੱਗ ਦੀਆਂ ਉਚੀਆਂ ਲਪਟਾਂ ਤੇ ਧੂੰਏ ਦੇ ਗੁਬਾਰਾਂ ਕਾਰਨ ਨੇੜਲੇ ਉਦਯੋਗਿਕ ਇਕਾਈਆਂ ਵਿਚ ਕੰਮ ਕਰ ਰਹੇ ਮਜਦੂਰ ਤੁਰੰਤ ਬਾਹਰ ਨਿਕਲੇ ਤੇ ਸੁਰੱਖਿਆ ਵਾਸਤੇ ਇਲਾਕਾ ਖਾਲੀ ਕਰਵਾ ਦਿੱਤਾ ਗਿਆ | ਅੱਗ ਦੀ ਸੂਚਨਾ ਮਿਲਦਿਆਂ ਹੀ ਫਾਇਰ ਬਿ੍ਗੇਡ ਦੀਆਂ 3 ਗੱਡੀਆਂ ਟੀਮ ਸਮੇਤ ਮੌਕੇ 'ਤੇ ਪਹੁੰਚੀਆਂ | ਨਾਲ ਹੀ ਥਾਣਾ ਸਲੇਮ ਟਾਬਰੀ ਦੀ ਪੁਲਿਸ ਪਾਰਟੀ ਨੇ ਇਲਾਕੇ ਨੰੂ ਘੇਰਾਬੰਦੀ ਕਰਕੇ ਟ੍ਰੈਫਿਕ ਡਾਇਵਰਟ ਕੀਤਾ ਤਾਂ ਜੋ ਰਾਹਤ ਬਚਾਵ ਕਾਰਜਾਂ ਵਿਚ ਕੋਈ ਰੁਕਾਵਟ ਨਾ ਆਵੇ | ਫਾਇਰ ਬਿ੍ਗੇਡ ਦੇ ਫਾਇਰਮੈਨ ਪੰਕਜ ਸ਼ਰਮਾ ਨੇ ਦੱਸਿਆ ਕਿ ਅੱਗ ਯੂਨਿਟ ਦੇ ਬੋਇਲਰ ਸੈਕਸ਼ਨ ਤੋਂ ਸ਼ੁਰੂ ਹੋਈ, ਤੇਜ਼ੀ ਨਾਲ ਪਾਣੀ ਦੀਆਂ ਲਾਈਨਾਂ ਬਿਛਾਕੇ ਤੇ ਫੋਮ ਦੀ ਵਰਤੋਂ ਕਰਦਿਆਂ ਟੀਮ ਨੇ ਕੁੱਝ ਸਮੇਂ ਦੀ ਮੁਸ਼ੱਕਤ ਤੋਂ ਬਾਅਦ ਅੱਗ 'ਤੇ ਕਾਬੂ ਪਾ ਲਿਆ | ਉਨ੍ਹਾਂ ਕਿਹਾ ਕਿ ਸਮੇਂ ਸਿਰ ਕਾਰਵਾਈ ਨਾ ਹੁੰਦੀ ਤਾਂ ਅੱਗ ਨੇੜਲੇ ਯੂਨਿਟਾਂ ਤੱਕ ਫੈਲ ਸਕਦੀ ਸੀ | ਘਟਨਾ ਵਿਚ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਖਬਰ ਨਹੀ ਹੈ | ਪਰ ਬੋਇਲਰ, ਮਸ਼ੀਨਰੀ ਤੇ ਤਿਆਰ ਮਾਲ ਨੰੂ ਨੁਕਸਾਨ ਪਹੁੰਚਣ ਕਾਰਨ ਲੱਖਾਂ ਰੁਪਏ ਦੇ ਮਾਲੀ ਨੁਕਸਾਨ ਦਾ ਅੰਦਾਜਾ ਲਗਾਇਆ ਜਾ ਰਿਹਾ ਹੈ | ਮੁੱਢਲੀ ਜਾਂਚ ਵਿਚ ਅੱਗ ਸ਼ਾਰਟ ਸਰਕਿਟ ਜਾਂ ਬੋਇਲਰ ਦੀ ਤਕਨੀਕੀ ਖਾਮੀ ਕਾਰਨ ਲੱਗਣ ਦੀ ਸੰਭਾਵਨਾ ਹੈ | ਹਾਲਾਂਕਿ ਅਸਲ ਕਾਰਨ ਦੀ ਪੁਸ਼ਟੀ ਵਿਭਾਗੀ ਜਾਂਚ ਤੋ ਬਾਅਦ ਹੀ ਹੋਵੇਗੀ | ਪੁਲਿਸ ਤੇ ਫਾਇਰ ਵਿਭਾਗ ਨੇ ਯੂਨਿਟ ਪ੍ਰਬੰਧਨ ਨੰੂ ਸੁੁਰੱਖਿਆ ਮਿਆਰਾਂ ਦੀ ਪਾਲਣਾ, ਬੋਇਲਰ ਦੀ ਨਿਯਮਤ ਜਾਂਚ ਤੇ ਫਾਇਰ ਸੇਫਟੀ ਉਪਕਰਣ ਅਪਡੇਟ ਰੱਖਣ ਦੀ ਹਿਦਾਇਤ ਦਿੱਤੀ ਹੈ | ਇਲਾਕਾ ਨਿਵਾਸੀਆਂ ਤੇ ਉਦਯੋਗਿਕ ਸੰਗਠਨਾਂ ਦੇ ਨੇ ਵੀ ਫਾਇਰ ਬਿ੍ਗੇਡ ਦੀ ਤੁਰੰਤ ਕਾਰਵਾਈ ਦੀ ਪ੍ਰਸ਼ੰਸਾ ਕੀਤੀ, ਜਿਸ ਨਾਲ ਵੱਡਾ ਹਾਦਸਾ ਟਲ ਗਿਆ |
