ਐਲਾਂਤੇ ਮਾਲ 'ਚ ਇਮਾਰਤੀ ਨਿਯਮਾਂ ਦੀਆਂ ਉਲੰਘਣਾਵਾਂ 'ਤੇ ਯੂ. ਟੀ. ਪ੍ਰਸ਼ਾਸਨ ਦੀ ਵੱਡੀ ਕਾਰਵਾਈ
ਅਜੀਤ ਡੈਸਕ
03-11-2025
ਪਾਰਕਿੰਗ ਖੇਤਰ 'ਤੇ ਕੀਤਾ ਕਬਜ਼ਾ, ਹੁਣ ਲੱਗੇਗਾ ਜੁਰਮਾਨਾ
ਅਸਟੇਟ ਦਫ਼ਤਰ ਦੀ ਜਾਂਚ ਰਿਪੋਰਟ ਅਨੁਸਾਰ, ਮਾਲ ਪ੍ਰਬੰਧਨ ਵਲੋਂ ਪਾਰਕਿੰਗ ਲਈ ਰਾਖਵੀਂ 22 ਹਜ਼ਾਰ ਵਰਗ ਫੁੱਟ ਜਗਾ 'ਤੇ ਲੈਂਡਸਕੇਪਿੰਗ ਅਤੇ ਗ੍ਰੀਨਰੀ ਤਿਆਰ ਕਰ ਦਿੱਤੀ ਗਈ ਸੀ, ਜਿਸ ਨਾਲ ਵਾਹਨ ਪਾਰਕਿੰਗ ਦੀ ਸੁਵਿਧਾ ਪ੍ਰਭਾਵਿਤ ਹੋਈ | ਇਸ ਤੋਂ ਇਲਾਵਾ ਮਾਲ ਦੇ ਰਿਟੇਲ ਖੇਤਰ 'ਚ ਵੀ ਬਿਨਾਂ ਮਨਜ਼ੂਰੀ ਕਈ ਢਾਂਚੇ ਬਣਾਉਣ ਦੀ ਪੁਸ਼ਟੀ ਕੀਤੀ ਗਈ ਹੈ | ਪ੍ਰਸ਼ਾਸਨ ਨੇ 8 ਅਗਸਤ ਨੂੰ ਮਾਲ ਦਾ ਨਿਰੀਖਣ ਕੀਤਾ ਸੀ | ਦੋ ਮਹੀਨਿਆਂ ਤੱਕ ਦਿੱਤੇ ਸਮੇਂ ਦੌਰਾਨ ਸੁਧਾਰ ਨਾ ਕੀਤੇ ਜਾਣ ਕਾਰਨ, ਹੁਣ ਚੰਡੀਗੜ੍ਹ ਅਸਟੇਟ ਨਿਯਮ 2007 ਅਤੇ ਪੰਜਾਬ ਦੀ ਰਾਜਧਾਨੀ (ਵਿਕਾਸ ਤੇ ਨਿਯਮ) ਐਕਟ 1952 ਦੇ ਤਹਿਤ ਸਖ਼ਤ ਕਾਰਵਾਈ ਕੀਤੀ ਗਈ ਹੈ | ਨਿਯਮਾਂ ਅਨੁਸਾਰ, ਮਾਲ ਪ੍ਰਬੰਧਨ ਨੂੰ ਪ੍ਰਤੀ ਵਰਗ ਫੁੱਟ ਪ੍ਰਤੀ ਦਿਨ ਦੇ ਹਿਸਾਬ ਨਾਲ ਜੁਰਮਾਨਾ ਭਰਨਾ ਪਵੇਗਾ | ਅਧਿਕਾਰੀਆਂ ਨੇ ਕਿਹਾ ਕਿ ਜਨਤਕ ਉਪਯੋਗ ਲਈ ਰਾਖਵੀਂ ਜਗਾ 'ਤੇ ਕਿਸੇ ਵੀ ਕਿਸਮ ਦਾ ਕਬਜ਼ਾ ਜਾਂ ਬਿਨਾਂ ਮਨਜ਼ੂਰੀ ਦੇ ਢਾਂਚਾ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ | ਮਾਲ ਕੰਪਲੈਕਸ ਦੀ ਅਸਲ ਯੋਜਨਾ ਤੇ ਜਨਤਕ ਖੇਤਰ ਦੀ ਮੁੜ ਬਹਾਲੀ ਲਈ ਕਾਰਵਾਈ ਜਾਰੀ ਰਹੇਗੀ ਤਾਂ ਜੋ ਚੰਡੀਗੜ੍ਹ ਦੇ ਵਿਕਾਸ ਨਿਯਮਾਂ ਦੀ ਪੂਰੀ ਤਰ੍ਹਾਂ ਪਾਲਣਾ ਹੋ ਸਕੇ |
