ਕੈਲੰਡਰ ਵਿਵਾਦ ਹੱਲ ਕਰਨ ਲਈ ਸਾਬਕਾ ਸੰਸਦ ਮੈਂਬਰ ਅਤਿੰਦਰਪਾਲ ਸਿੰਘ ਨੇ ਕੀਤੀ ਪਹਿਲਕਦਮੀ <br/>
ਅਜੀਤ ਡੈਸਕ
28-12-2025
ਉਨ੍ਹਾਂ ਨੇ ਕਿਰਪਾਲ ਸਿੰਘ ਬਠਿੰਡਾ, ਗੁਰਬਚਨ ਸਿੰਘ ਸੇਖੋਂ, ਸਰਬਜੀਤ ਸਿੰਘ ਸੈਕਰਾਮੈਂਟੋ, ਅਨੁਰਾਗ ਸਿੰਘ, ਸੁਰਜੀਤ ਸਿੰਘ ਨਿਸ਼ਾਨ (ਸਾਬਕਾ ਲੈਫ. ਕਰਨਲ) ਨੂੰ ਸੱਦਾ ਪੱਤਰ ਭੇਜ ਕੇ ਪ੍ਰਸਤਾਵ ਰੱਖਿਆ ਕਿ ਜਦੋਂ ਤੱਕ ਦੋਵੇਂ ਧਿਰਾਂ ਵਿਚ ਕੋਈ ਵੀ ਤੌਖਲੇ ਬਾਕੀ ਰਹਿ ਜਾਂਦੇ ਹਨ, ਉਸ ਸਮੇਂ ਤੱਕ ਜਿੰਨੇ ਵੀ ਸੈਮੀਨਾਰ ਕਰਨ ਦੀ ਲੋੜ ਪਵੇਗੀ, ਉਹ ਪਟਿਆਲਾ ਵਿਖੇ ਸਾਰੇ ਪ੍ਰਬੰਧਕ ਆਪਣੇ ਖ਼ਰਚੇ ਉੱਪਰ ਕਰਨਗੇ |
ਅਤਿੰਦਰਪਾਲ ਸਿੰਘ ਨੇ ਦੱਸਿਆ ਕਿ ਸੈਮੀਨਾਰ ਗੁਰਦੁਆਰਾ ਅਨਾਮ ਸਿੱਖ ਸ਼ਹੀਦਾਂ ਢੈਂਠਲ ਸਮਾਣਾ ਰੋਡ ਪਟਿਆਲਾ ਵਿਖੇ ਸਬੰਧਿਤ ਧਿਰਾਂ ਦੀ ਸਹਿਮਤੀ ਵਾਲੀਆਂ ਸਾਂਝੀਆਂ ਤਾਰੀਖ਼ਾਂ ਵਿਚ ਕਰਵਾਏ ਜਾਣਗੇ, ਜਿਨ੍ਹਾਂ ਦੀ ਵਿਉਂਤਬੰਦੀ ਲਈ ਉਨ੍ਹਾਂ ਨੇ ਸੁਝਾਅ ਦਿੱਤਾ ਕਿ ਪਹਿਲੇ ਤਿੰਨ ਘੰਟਿਆਂ ਦੀ ਬੈਠਕ ਵਿਚ ਗੁਰਚਰਨ ਸਿੰਘ ਸੇਖੋਂ ਦੀ ਪੁਸਤਕ 'ਗੁਰੂ ਸਾਹਿਬਾਨਾਂ ਵਲੋਂ ਸਥਾਪਤ ਕੀਤਾ ਮੂਲ ਸਿੱਖ ਕੈਲੰਡਰ' ਅਤੇ ਕਿਰਪਾਲ ਸਿੰਘ ਬਠਿੰਡਾ ਦੀ ਪੁਸਤਕ 'ਨਾਨਕਸ਼ਾਹੀ ਕੈਲੰਡਰ ਬਨਾਮ ਬਿਕ੍ਰਮੀ ਕੈਲੰਡਰ' 'ਤੇ ਚਰਚਾ ਕੀਤੀ ਜਾਵੇਗੀ |
ਚਰਚਾ ਦਾ 'ਅਕਾਦਮਿਕ ਪੱਧਰ 'ਤੇ ਵਿਚਾਰ ਅਤੇ ਸੰਵਾਦ' ਦਾ ਆਧਾਰ ਇਹ ਬਣਾਇਆ ਜਾਣਾ ਚਾਹੀਦਾ ਹੈ ਕਿ ਦੋਵੇਂ ਵਿਦਵਾਨ ਇਕ-ਦੂਜੇ 'ਤੇ ਸਵਾਲ-ਜਵਾਬ ਨਾ ਕਰਨ ਬਲਕਿ ਆਪੋ-ਆਪਣੀ ਪਸੰਦ ਦੇ ਦੋ-ਦੋ ਵਿਦਵਾਨਾਂ ਨੂੰ ਦੋਵੇਂ ਪੁਸਤਕਾਂ ਤਿਆਰੀ ਲਈ ਦੇਣ, ਜਿਨ੍ਹਾਂ ਸਬੰਧੀ ਦੋਵਾਂ ਤੋਂ ਉਕਤ ਵਿਦਵਾਨ ਪ੍ਰਸ਼ਨਾਂ ਦੇ ਜਵਾਬ ਲੈਣ |
ਦੁਪਹਿਰ ਤੋਂ ਬਾਅਦ ਹੋਣ ਵਾਲੀ ਦੂਜੀ ਬੈਠਕ ਦੀ ਜਥੇਦਾਰੀ ਕਰਨ ਹਿਤ ਉਪਰੋਕਤ ਵਿਦਵਾਨ ਅਤੇ ਅਤਿੰਦਰਪਾਲ ਸਿੰਘ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਸਾਹਿਬ ਅਤੇ ਅਕਾਲ ਤਖ਼ਤ ਸਾਹਿਬ ਵਲੋਂ ਘੋਸ਼ਿਤ ਕੈਲੰਡਰ ਕਮੇਟੀ ਨੂੰ ਇਸ ਗੁਰਮਤਿ ਸੰਵਾਦ ਵਿਚ ਸ਼ਾਮਲ ਹੋਣ ਦਾ ਸਾਂਝਾ ਸੱਦਾ ਪੱਤਰ ਭੇਜਣ | ਦੂਜੇ ਸਮਾਗਮ 'ਚ ਮੂਲ ਨਾਨਕਸ਼ਾਹੀ ਕੈਲੰਡਰ ਅਤੇ ਸ਼੍ਰੋਮਣੀ ਕਮੇਟੀ ਦਾ ਸੋਧਿਆ ਨਾਨਕਸ਼ਾਹੀ ਕੈਲੰਡਰ ਤੇ ਜੰਤਰੀ ਵਿਚਲੀਆਂ ਖ਼ਾਮੀਆਂ ਸੰਬੰਧੀ ਉਪਰੋਕਤ ਪੰਜੋਂ ਵਿਦਵਾਨ ਕੋਈ ਸਾਂਝਾ ਫ਼ੈਸਲਾ ਲੈਣ ਅਤੇ ਜਿਹੜੇ ਫ਼ੈਸਲੇ ਨਾ ਹੋ ਸਕਣ ਉਸ ਬਾਬਤ ਖ਼ਾਲਸਾ ਪੰਥ ਦੀ ਅੱਡਰੀ, ਸੁਤੰਤਰ, ਵਿਲੱਖਣ ਪ੍ਰਭਤਾ-ਸੰਪੰਨ (ਸਾਵਰਨ) ਹਸਤੀ ਦੀ ਕਾਇਮੀ ਨਿਮਿਤ ਖ਼ਾਲਸੇ ਦਾ ਆਪਣਾ ਨਾਨਕਸ਼ਾਹੀ ਕੈਲੰਡਰ ਦੇ ਫ਼ੈਸਲੇ ਤੇ ਪਹੁੰਚਣ ਦੀ ਸਮਾਂਬੱਧ ਰਣਨੀਤੀ ਬਣਾਉਣ |
