ਪਟਿਆਲਾ, 4 ਸਤੰਬਰ (ਅਮਰਬੀਰ ਸਿੰਘ ਆਹਲੂਵਾਲੀਆ)-ਸੂਬੇ ਅੰਦਰ ਹੌਲੀ-ਹੌਲੀ ਵੱਡਾ ਇਲਾਕਾ ਪਾਣੀ ਦੀ ਮਾਰ ਹੇਠਾਂ ਆਉਂਦਾ ਜਾ ਰਿਹਾ ਹੈ | ਪਹਾੜਾਂ ਤੋਂ ਕਹਿਰ ਬਣਦਾ ਆ ਰਿਹਾ ਪਾਣੀ ਖੇਤੀ ਦੇ ਨਾਲ ਸੜਕੀ ਆਵਾਜਾਈ ਨੂੰ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕਰ ਰਿਹਾ ਹੈ | ਜਿਸ ਦਾ ਸਿੱਧਾ ਅਸਰ ਪੈਪਸੂ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ (ਪੀ.ਆਰ.ਟੀ.ਸੀ.) 'ਤੇ ਪੈਂਦਾ ਜਾ ਰਿਹਾ ਹੈ | ਰੋਜਾਨਾ 2 ਕਰੋੜ 50 ਲੱਖ ਰੁਪਏ ਦੀ ਆਮਦਨ 'ਚੋਂ ਸਿਰਫ 1 ਕਰੋੜ 70 ਲੱਖ ਦੇ ਕਰੀਬ ਆਮਦਨ ਹੀ ਵਿਭਾਗ ਦੇ ਖਜਾਨੇ ਵਿਚ ਪਹੁੰਚ ਰਹੀ ਹੈ | ਇਸ ਘਾਟੇ ਦੇ ਹੋਰ ਵਧਣ ਦਾ ਅੰਦੇਸ਼ਾ ਲਗਾਇਆ ਜਾ ਰਿਹਾ ਹੈ ਕਿਉਂਕਿ ਹੁਣ ਪਟਿਆਲਾ ਅਤੇ ਇਸ ਦੇ ਆਸ ਪਾਸ ਵਾਲੇ ਇਲਾਕਿਆਂ ਵਿਚ ਹੜ੍ਹਾਂ ਦੀ ਗੰਭੀਰ ਹੁੰਦੀ ਸਥਿਤੀ ਕਾਰਨ ਸੜਕਾਂ 'ਤੇ ਬੱਸਾਂ ਦਾ ਚਲਣਾ ਸੰਭਵ ਨਹੀਂ ਹੋਵੇਗਾ |
