ਮਲੋਟ, 26 ਸਤੰਬਰ (ਪਾਟਿਲ)-ਰਾਮਾ ਡਰਾਮਾਟਿਕ ਕਲੱਬ ਵਲੋਂ ਰਾਮ ਲੀਲ੍ਹਾ ਮੈਦਾਨ ਵਿਖੇ ਚੱਲ ਰਹੀ ਰਾਮ ਲੀਲ੍ਹਾ ਦੌਰਾਨ ਬੀਤੀ ਰਾਤ ਸ੍ਰੀ ਰਾਮ ਚੰਦਰ ਜੀ ਦੀ ਸਿਹਰਾ ਬੰਦੀ ਸ਼ਾਨਦਾਰ ਢੰਗ ਨਾਲ ਕੀਤੀ ਗਈ | ਧਾਰਮਿਕ ਜੋਸ਼ ਤੇ ਸ਼ਰਧਾ ਨਾਲ ਭਰੇ ਇਸ ਸਮਾਗਮ ਵਿਚ ਸੰਗਤਾਂ ਦੀ ਵੱਡੀ ਗਿਣਤੀ 'ਚ ਹਾਜ਼ਰੀ ਰਹੀ | ਮੈਦਾਨ ਵਿਚ 'ਜੈ ਸ੍ਰੀ ਰਾਮ' ਦੇ ਨਾਅਰੇ ਗੂੰਜਦੇ ਰਹੇ | ਇਸ ਮੌਕੇ ਮੁੱਖ ਮਹਿਮਾਨ ਵਜੋਂ ਆੜ੍ਹਤੀਆ ਐਸੋਸੀਏਸ਼ਨ ਦੇ ਪ੍ਰਧਾਨ ਸੁਨੀਸ਼ ਕੁਮਾਰ ਨੀਟਾ ਗੋਇਲ ਪਰਿਵਾਰ ਸਮੇਤ ਪਹੁੰਚੇ | ਖੱਤਰੀ ਸਮਾਜ ਦੇ ਪ੍ਰਧਾਨ ਰਾਜੀਵ ਬਾਵਾ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਿਲ ਹੋਏ | ਉਨ੍ਹਾਂ ਦੇ ਨਾਲ ਵਾਈਸ ਪ੍ਰਧਾਨ ਸ਼ਿਵ ਗੰਡੋਤਰਾ, ਕਾਂਗਰਸ ਬਲਾਕ ਪ੍ਰਧਾਨ ਸ਼ਿਵ ਕੁਮਾਰ ਸ਼ਿਵਾ, ਭੋਲੇ ਕੀ ਫੌਜ ਦੇ ਪ੍ਰਧਾਨ ਰਾਹੁਲ ਗਗਨੇਜਾ ਤੇ ਸਮਾਜ ਸੇਵੀ ਬਿੱਟੂ ਸੇਤੀਆ ਸਮੇਤ ਕਈ ਹੋਰ ਸ਼ਖ਼ਸੀਅਤਾਂ ਨੇ ਹਾਜ਼ਰੀ ਭਰੀ | ਕਲੱਬ ਦੇ ਪ੍ਰਧਾਨ ਅਸ਼ਵਨੀ ਡਾਵਰ ਹੈਪੀ, ਐੱਮ.ਸੀ. ਸੋਨੂ ਡਾਵਰ, ਸਤਿਗੁਰੂ ਦੇਵ ਪੱਪੀ ਸਰਪ੍ਰਸਤ ਅਤੇ ਰਾਮ ਲੀਲ੍ਹਾ ਮੈਨੇਜਿੰਗ ਕਮੇਟੀ ਵਲੋਂ ਖੱਤਰੀ ਸਭਾ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਗਿਆ | ਇਸ ਦੇ ਨਾਲ ਹੀ ਮੁੱਖ ਮਹਿਮਾਨ ਸੁਨੀਸ਼ ਗੋਇਲ ਨੂੰ ਵੀ ਸਨਮਾਨਿਤ ਕੀਤਾ ਗਿਆ | ਇਸ ਮੌਕੇ ਪ੍ਰਧਾਨ ਅਸ਼ਵਨੀ ਡਾਵਰ ਹੈਪੀ ਨੇ ਕਿਹਾ ਕਿ ਰਾਮ ਲੀਲ੍ਹਾ ਸਾਡੀ ਸਾਂਝੀ ਧਾਰਮਿਕ ਤੇ ਸੱਭਿਆਚਾਰਕ ਵਿਰਾਸਤ ਹੈ | ਸਾਨੂੰ ਇਸ ਨੂੰ ਨਵੀਂ ਪੀੜ੍ਹੀ ਤੱਕ ਪਹੁੰਚਾਉਣ ਲਈ ਇਕੱਠੇ ਹੋ ਕੇ ਯਤਨ ਕਰਨੇ ਹਨ | ਮੁੱਖ ਮਹਿਮਾਨ ਸੁਨੀਸ਼ ਗੋਇਲ ਤੇ ਰਾਜੀਵ ਬਾਵਾ ਨੇ ਕਿਹਾ ਕਿ ਇਹ ਸਮਾਗਮ ਸਿਰਫ਼ ਧਾਰਮਿਕ ਹੀ ਨਹੀਂ, ਸਗੋਂ ਸਮਾਜ ਨੂੰ ਜੋੜਨ ਦਾ ਵੱਡਾ ਸਾਧਨ ਵੀ ਹੈ |
