ਮਮਦੋਟ, 2 ਜੂਨ (ਸੁਖਦੇਵ ਸਿੰਘ ਸੰਗਮ)-ਸਿਹਤ ਵਿਭਾਗ ਵਲੋਂ ਵਿਸ਼ਵ ਤੰਬਾਕੂ ਦਿਹਾੜੇ 'ਤੇ ਸਬ ਸੈਂਟਰ ਲੱਖਾ ਹਾਜੀ ਅਧੀਨ ਪੈਂਦੇ ਪਿੰਡ ਸੁੰਦਰ ਸਿੰਘ ਵਾਲਾ ਵਿਖੇ ਇਕ ਸੈਮੀਨਾਰ ਲਗਾ ਕੇ ਤੰਬਾਕੂ ਨਾਲ ਹੋਣ ਵਾਲੀਆਂ ਗੰਭੀਰ ਬਿਮਾਰੀਆਂ ਸਬੰਧੀ ਵਿਸਥਾਰਤ ਜਾਣਕਾਰੀ ਦਿੱਤੀ ਗਈ | ਇਸ ਮੌਕੇ ਡਾਕਟਰ ਰਾਜੂ ਚੌਹਾਨ ਐੱਸ.ਐਮ.ਓ ਮਮਦੋਟ ਦੇ ਹੁਕਮਾਂ 'ਤੇ ਲੱਗੇ ਇਸ ਸੈਮੀਨਾਰ ਵਿਚ ਪਹੁੰਚੇ ਲੋਕਾਂ ਨੂੰ ਅਮਰਜੀਤ ਸਿੰਘ ਨੇ ਕਿਹਾ ਕਿ ਖ਼ੁਸ਼ਹਾਲੀ ਵਜੋਂ ਜਾਣੇ ਜਾਂਦੇ ਪੰਜਾਬ ਵਿਚ ਪਿਛਲੇ ਕੁਝ ਸਾਲਾਂ ਵਿਚ ਨਸ਼ਿਆਂ ਨੇ ਐਸਾ ਪੈਰ ਪਸਾਰਿਆ ਹੈ ਕਿ ਲੋਕਾਂ ਨੂੰ ਨਸ਼ਿਆਂ ਨੇ ਆਪਣੀ ਲਪੇਟ ਵਿਚ ਲੈ ਰੱਖਿਆ ਹੈ | ਉਨ੍ਹਾਂ ਕਿਹਾ ਕਿ ਤੰਬਾਕੂ ਨਸ਼ਿਆਂ ਦੇ ਰਸਤੇ ਨੂੰ ਜਾਣ ਵਾਲਾ ਪਹਿਲਾ ਨਸ਼ਾ ਹੈ, ਜਿਸ ਨੂੰ ਸ਼ੌਂਕ ਵਜੋਂ ਵਰਤਣ ਵਾਲੇ ਨੂੰ ਪਤਾ ਹੀ ਨਹੀਂ ਲੱਗਦਾ ਕਿ ਉਹ ਕਦੋਂ ਨਸ਼ਿਆਂ ਦੀ ਦਲਦਲ ਵਿਚ ਫਸ ਗਿਆ | ਉਨ੍ਹਾਂ ਕਿਹਾ ਕਿ ਮਨੁੱਖ ਵਿਚ ਮੂੰਹ ਦੇ ਕੈਂਸਰ ਦਾ ਵੱਡਾ ਕਾਰਨ ਤੰਬਾਕੂ ਦਾ ਸੇਵਨ ਕਰਨਾ ਹੈ | ਇਸ ਮੌਕੇ ਡਾ. ਅਸ਼ੋਕ ਕੁਮਾਰ ਨੇ ਕਿਹਾ ਕਿ ਜਿਨ੍ਹਾਂ ਜ਼ਰੂਰੀ ਨਸ਼ਿਆਂ ਦਾ ਖ਼ਾਤਮਾ ਕਰਨਾ ਹੈ, ਉਨ੍ਹਾਂ ਜ਼ਰੂਰੀ ਤੰਬਾਕੂ ਨੋਸ਼ੀ ਨੂੰ ਰੋਕਣਾ ਹੈ, ਕਿਉਂਕਿ ਤੰਬਾਕੂ ਦੀ ਵਰਤੋਂ ਵਿਅਕਤੀ ਸਾਰੇ ਦਿਨ ਵਿਚ ਅਨੇਕਾਂ ਵਾਰ ਕਰ ਜਾਂਦੇ ਹਨ ਅਤੇ ਇਸ ਦੀ ਵਰਤੋਂ ਸ਼ਰੇਆਮ ਜਨਤਕ ਥਾਵਾਂ 'ਤੇ ਵੀ ਅਕਸਰ ਹੋ ਜਾਂਦੀ ਹੈ | ਉਨ੍ਹਾਂ ਕਿਹਾ ਕਿ ਤੰਬਾਕੂ ਦਾ ਨਸ਼ਾ ਕਰਨਾ ਭਾਵੇਂ ਬਹੁਤ ਆਸਾਨ ਲੱਗਦਾ ਹੈ ਪ੍ਰੰਤੂ ਇਸ ਨਾਲ ਫੈਲਣ ਵਾਲੀਆਂ ਭੈੜੀਆਂ ਬਿਮਾਰੀਆਂ ਜਿਵੇਂ ਮੂੰਹ ਦਾ ਕੈਂਸਰ, ਫੇਫੜਿਆਂ ਦਾ ਕੈਂਸਰ, ਗੈਰ ਸੰਚਾਰੀ ਰੋਗਾਂ ਆਦਿ ਦੀ ਗਿ੍ਫ਼ਤ ਵਿਚ ਆਉਣ ਬਾਅਦ ਮਨੁੱਖ ਦਾ ਜਿਊਣਾ ਦੁੱਭਰ ਹੋ ਜਾਂਦਾ ਹੈ ਇਸ ਲਈ ਲੋਕਾਂ ਨੂੰ ਕਿਸੇ ਵੀ ਤਰ੍ਹਾਂ ਦੇ ਨਸ਼ੇ ਕਰਨ ਤੋਂ ਬਚਣਾ ਚਾਹੀਦਾ ਹੈ | ਇਸ ਮੌਕੇ ਜਸਵਿੰਦਰ ਕੌਰ, ਛਿੰਦਰਪਾਲ ਕੌਰ ਆਸ਼ਾ ਵਰਕਰ, ਲੱਛਮੀ ਬਾਈ ਆਸ਼ਾ ਫੈਸੀਲੀਟੇਟਰ, ਦੋਲਤ ਰਾਮ ਪੰਚ ਮੌਜੂਦ ਸਨ |
