ਹਬੀਬ ਕੇ ਬੰਨ੍ਹ 'ਚ ਖੋਰਾ : ਸੈਂਕੜੇ ਲੋਕ ਬੰਨ੍ਹ ਬਚਾਉਣ ਲਈ ਜੁਟੇ

ਅ

ਅਜੀਤ ਡੈਸਕ 03-09-2025

ਫ਼ਿਰੋਜ਼ਪੁਰ, 2 ਸਤੰਬਰ (ਗੁਰਿੰਦਰ ਸਿੰਘ)-ਫ਼ਿਰੋਜ਼ਪੁਰ ਦੇ ਨਜ਼ਦੀਕ ਸਥਿਤ ਹਬੀਬ ਕੇ ਬੰਨ੍ਹ ਨੂੰ ਲੱਗ ਰਹੇ ਗੰਭੀਰ ਖੋਰੇ ਨੇ ਫ਼ਿਰੋਜ਼ਪੁਰ ਵਾਸੀਆਂ ਦੀ ਚਿੰਤਾ ਵਧਾ ਦਿੱਤੀ ਹੈ | ਸਤਲੁਜ ਦਰਿਆ ਦੇ ਪਾਣੀ ਦੇ ਤੇਜ਼ ਵਹਾਅ ਨੇ ਜਿੱਥੇ ਬੰਨ੍ਹ ਨੂੰ ਕਮਜ਼ੋਰ ਕੀਤਾ ਹੈ | ਓਥੇ ਹੀ ਇਸ ਦੀ ਮਜ਼ਬੂਤੀ ਲਈ ਇਕ ਵੱਡੀ ਲੋਕ ਲਹਿਰ ਦੇਖਣ ਨੂੰ ਮਿਲੀ | ਪਿਛਲੇ 72 ਘੰਟਿਆਂ ਤੋਂ ਲਗਾਤਾਰ ਫ਼ੌਜੀਆਂ ਦੇ ਨਾਲ ਨੇੜਲੇ ਪਿੰਡਾਂ ਦੇ ਲੋਕ, ਨੌਜਵਾਨ, ਬਜ਼ੁਰਗ ਤੇ ਅÏਰਤਾਂ ਬੰਨ੍ਹ ਨੂੰ ਬਚਾਉਣ ਦੀ ਸੇਵਾ ਵਿਚ ਲੱਗੇ ਹੋਏ ਹਨ | ਮਿੱਟੀ ਦੀਆਂ ਬੋਰੀਆਂ ਬੰਨ੍ਹ ਨਾਲ ਲਗਾਉਣ ਲਈ ਲੋਕਾਂ ਨੇ ਆਪਣੀਆਂ ਟਰੈਕਟਰ-ਟਰਾਲੀਆਂ ਅਤੇ ਹੋਰ ਸਾਧਨ ਝੋਕ ਦਿੱਤੇ ਹਨ | ਪਹਿਲਾਂ ਜਿੱਥੇ ਮਿੱਟੀ ਭਰਨ ਤੇ ਬੋਰੀਆਂ ਪਾਉਣ ਲਈ ਟਰਾਲੀਆਂ ਦੀ ਘਾਟ ਆ ਰਹੀ ਸੀ | ਉੱਥੇ ਹੁਣ ਦੂਰ- ਦੂਰ ਤੋਂ ਲੋਕ ਆਪਣੇ ਘਰਾਂ ਤੋਂ ਬੋਰੀਆਂ ਵਿਚ ਮਿੱਟੀ ਭਰ ਕੇ ਲਿਆ ਰਹੇ ਹਨ | ਜਿਸ ਨਾਲ ਰਾਹਤ ਕਾਰਜਾਂ ਵਿਚ ਜੰਗੀ ਪੱਧਰ 'ਤੇ ਤੇਜ਼ੀ ਆਈ ਹੈ | ਸੇਵਾਦਾਰਾਂ ਦੀ ਅਪੀਲ 'ਤੇ ਲੋਕ ਆਪਣੇ ਕੰਮ ਧੰਦੇ ਛੱਡ ਕੇ ਬੰਨ੍ਹ ਬਚਾਉਣ ਦੀ ਲਗਨ ਨਾਲ ਮੈਦਾਨ 'ਚ ਉੱਤਰੇ ਹੋਏ ਹਨ | ਅੱਜ ਹਬੀਬ ਕੇ ਬੰਨ੍ਹ ਦਾ ਆਲਮ ਇਹ ਸੀ ਕਿ ਬਰਸਾਤ ਦੇ ਬਾਵਜੂਦ ਵੱਡੀ ਗਿਣਤੀ ਵਿਚ ਲੋਕ ਬੰਨ੍ਹ ਦੀ ਮਜ਼ਬੂਤੀ ਲਈ ਸਿਰਤੋੜ ਯਤਨ ਕਰ ਰਹੇ ਸਨ | ਇਕ ਪਾਸੇ ਜਿੱਥੇ ਹਜ਼ਾਰਾਂ ਹੱਥ ਲੋਕ ਸੇਵਾ ਰਾਹੀਂ ਬੰਨ੍ਹ ਨੂੰ ਬਚਾਉਣ ਵਿਚ ਲੱਗੇ ਹੋਏ ਹਨ ਉੱਥੇ ਦੂਜੇ ਪਾਸੇ ਕੁੱਝ ਮੁਨਾਫ਼ਾ ਖੋਰ ਲੋਕ ਵੀ ਮੌਕੇ ਦਾ ਫ਼ਾਇਦਾ ਉਠਾ ਕੇ ਮੋਟੀ ਕਮਾਈ ਕਰਨ ਲੱਗ ਗਏ ਹਨ | ਘਰਾਂ ਤੋਂ ਗੱਟੂਆਂ ਵਿਚ ਮਿੱਟੀ ਭਰ ਕੇ ਲਿਆਏ ਕੁੱਝ ਸੇਵਾਦਾਰਾਂ ਨੇ ਦੱਸਿਆ ਕਿ ਸ਼ਹਿਰ ਵਿਚ ਬਾਰਦਾਨੇ ਦਾ ਕੰਮ ਕਰਦੇ ਦੁਕਾਨਦਾਰ ਆਮ ਦਿਨਾਂ ਵਿਚ ਕਬਾੜ 'ਚ ਖ਼ਰੀਦੇ ਖਾਦ ਵਾਲੇ ਖਾਲੀ ਗੱਟੂ ਹੁਣ ਆਫ਼ਤ ਦੀ ਘੜੀ ਮੂੰਹ ਮੰਗੀ ਕੀਮਤ 'ਤੇ ਸੇਵਾਦਾਰਾਂ ਨੂੰ ਵੇਚ ਰਹੇ ਹਨ | ਸੇਵਾਦਾਰਾਂ ਨੇ ਦੱਸਿਆ ਕਿ ਕੁੱਝ ਦੁਕਾਨਦਾਰ ਖਾਲੀ ਗੱਟੂ ਜੋ ਆਮ ਦਿਨਾਂ ਵਿਚ 1-2 ਰੁਪਏ ਵਿਚ ਮਿਲਦੇ ਹਨ, ਹੁਣ 5-10 ਰੁਪਏ ਵਿਚ ਵੇਚ ਕੇ ਆਪਣੀਆਂ ਜੇਬਾਂ ਗਰਮ ਕਰ ਰਹੇ ਹਨ | ਸੇਵਾ ਵਿਚ ਲੱਗੇ ਲੋਕਾਂ ਨੇ ਸਥਾਨਕ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕੀ ਪ੍ਰਸ਼ਾਸਨ ਅਜਿਹੇ ਮਾਮਲਿਆਂ 'ਤੇ ਵੀ ਨਜ਼ਰ ਰੱਖੇ | ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਵੀ ਤਰ੍ਹਾਂ ਦੀ ਮਜਬੂਰੀ ਜਾਂ ਲੁੱਟ-ਖਸੁੱਟ ਵਾਲੀ ਗਤੀਵਿਧੀ ਵੇਖਣ ਨੂੰ ਮਿਲੇ ਤਾਂ ਤੁਰੰਤ ਇਸ ਦੀ ਜਾਣਕਾਰੀ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਦਿੱਤੀ ਜਾਵੇ |
ਬੰਨ੍ਹ ਟੁੱਟਣ ਦੀ ਸੰਭਾਵਨਾ ਦੇ ਮੱਦੇਨਜ਼ਰ ਲੋਕ ਘਰਾਂ 'ਚੋਂ ਜ਼ਰੂਰੀ ਸਮਾਨ ਕੱਢਣ ਲੱਗੇ
ਲਗਾਤਾਰ ਹੋ ਰਹੀ ਮੀਂਹ ਅਤੇ ਦਰਿਆ ਸਤਲੁਜ ਵਿਚ ਪਾਣੀ ਦੇ ਪੱਧਰ ਵਿਚ ਆ ਰਹੇ ਵਾਧੇ ਨੇ ਹਬੀਬ ਕੇ ਬੰਨ੍ਹ ਨਾਲ ਲੱਗਦੇ ਪਿੰਡਾਂ ਵਿਚ ਦਹਿਸ਼ਤ ਦਾ ਮਾਹੌਲ ਦੇਖਣ ਨੂੰ ਮਿਲ ਰਿਹਾ ਹੈ | ਬੰਨ੍ਹ ਟੁੱਟਣ ਦੀ ਸੰਭਾਵਨਾ ਨੂੰ ਦੇਖਦਿਆਂ ਕਈ ਪਿੰਡ ਵਾਸੀ ਆਪਣਾ ਜ਼ਰੂਰੀ ਘਰੇਲੂ ਸਮਾਨ, ਬੱਚੇ ਅਤੇ ਪਸ਼ੂ ਲੈ ਕੇ ਸੁਰੱਖਿਅਤ ਥਾਵਾਂ ਵੱਲ ਰਵਾਨਾ ਹੋ ਰਹੇ ਹਨ ਕਿਉਂਕਿ ਉਨ੍ਹਾਂ ਨੂੰ ਡਰ ਹੈ ਕਿ ਪਾਣੀ ਕਦੇ ਵੀ ਪਿੰਡਾਂ 'ਚ ਘੁੱਸ ਸਕਦਾ ਹੈ |
ਹਰੀਕੇ ਹੈੱਡ ਵਰਕਸ ਤੋਂ ਛੱਡਿਆ 2.84 ਲੱਖ ਕਿਊਸਿਕ ਪਾਣੀ
ਫਿਰੋਜ਼ਪੁਰ ਜ਼ਿਲ੍ਹੇ ਵਿਚ ਪਿਛਲੇ 48 ਘੰਟਿਆਂ ਵਿਚ 35,000 ਕਿਊਸਿਕ ਪਾਣੀ ਦਾ ਵਾਧਾ ਹੋਇਆ ਹੈ, ਜਿਸ ਕਾਰਨ ਜ਼ਿਲ੍ਹੇ ਦੇ 20 ਤੋਂ ਵੱਧ ਪਿੰਡਾਂ ਵਿਚ 6 ਤੋਂ 8 ਫੁੱਟ ਪਾਣੀ ਭਰ ਗਿਆ ਹੈ | ਹੁਣ ਤੱਕ ਜ਼ਿਲ੍ਹੇ ਦੇ 110 ਪਿੰਡ ਹੜ੍ਹ ਦੀ ਲਪੇਟ 'ਚ ਆ ਚੁੱਕੇ ਹਨ | ਹਰੀਕੇ ਹੈੱਡ ਤੋਂ ਸਤਲੁਜ ਦਰਿਆ 'ਚ ਮੰਗਲਵਾਰ ਸ਼ਾਮ ਨੂੰ 2 ਲੱਖ 84 ਹਜ਼ਾਰ ਕਿਊਸਿਕ ਪਾਣੀ ਛੱਡਿਆ ਗਿਆ | ਇਸ ਦੇ ਨਾਲ ਹੀ ਪਾਕਿਸਤਾਨ ਵਾਲੇ ਪਾਸੇ ਤੋਂ ਫ਼ਾਜ਼ਿਲਕਾ ਰਾਹੀਂ ਹੁਸੈਨੀਵਾਲਾ ਹੈੱਡ ਤੋਂ ਹੇਠਾਂ ਵੱਲ ਵੀ ਇੰਨੀ ਹੀ ਮਾਤਰਾ ਵਿਚ ਪਾਣੀ ਛੱਡਿਆ ਜਾ ਰਿਹਾ ਹੈ |

ਹਬੀਬ ਕੇ ਬੰਨ੍ਹ 'ਚ ਖੋਰਾ : ਸੈਂਕੜੇ ਲੋਕ ਬੰਨ੍ਹ ਬਚਾਉਣ ਲਈ ਜੁਟੇ

ਸੰਬੰਧਿਤ ਖ਼ਬਰਾਂ