ਭੁੱਚੋ ਮੰਡੀ, 25 ਸਤੰਬਰ (ਜੌੜਾ)- ਚੱਕ ਰਾਮ ਸਿੰਘ ਵਾਲਾ ਦੀ ਪੰਚਾਇਤ ਨੇ ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ ਸਮੁੱਚੇ ਪਿੰਡ ਦੀ ਸਫ਼ਾਈ ਕਰਵਾਈ | ਪੰਚਾਇਤ ਦੇ ਇਸ ਕਾਰਜ ਨੂੰ ਪਿੰਡ ਵਾਸੀਆਂ ਵਲੋਂ ਸਰਾਹਿਆ ਜਾ ਰਿਹਾ ਹੈ | ਸਰਪੰਚ ਸੁਖਪਾਲ ਕੌਰ ਨੇ ਦੱਸਿਆ ਕਿ ਪਿੰਡ ਵਿਚ ਲੰਮੇ ਸਮੇਂ ਤੋਂ ਸਫ਼ਾਈ ਨਹੀਂ ਹੋਈ ਸੀ ਅਤੇ ਪਿਛਲੇ ਸਮੇਂ ਬਰਸਾਤਾਂ ਕਾਰਨ ਹੋਰ ਵੀ ਬਦਤਰ ਹਾਲਤ ਹੋ ਗਈ ਸੀ | ਪਿੰਡ ਦੀਆਂ ਫਿਰਨੀਆਂ, ਗਲੀਆਂ ਅਤੇ ਨਾਲੀਆਂ ਸਮੇਤ ਸਾਂਝੀਆਂ ਥਾਵਾਂ 'ਤੇ ਮਿੱਟੀ, ਗਾਰ ਅਤੇ ਘਾਹ-ਫੂਸ ਕਾਰਨ ਲੋਕਾਂ ਨੂੰ ਸਮੱਸਿਆਵਾਂ ਪੇਸ਼ ਆਉਂਦੀਆਂ ਸਨ ਅਤੇ ਆਉਂਦੇ ਸਮੇਂ ਬਿਮਾਰੀਆਂ ਫੈਲਣ ਦਾ ਖ਼ਦਸ਼ਾ ਵੀ ਬਣਿਆ ਹੋਇਆ ਸੀ | ਸਾਬਕਾ ਸਰਪੰਚ ਕੇਹਰ ਸਿੰਘ ਵਲੋਂ 4 ਟਰੈਕਟਰ ਇਸ ਕਾਰਜ ਦੀ ਸੇਵਾ ਵਿਚ ਲਗਾਏ ਗਏ | ਹਰਦੇਵ ਸਿੰਘ ਨੇ ਕਾਮਿਆਂ ਲਈ ਪੇਅ ਜਲਾਂ ਦਾ ਪ੍ਰਬੰਧ ਕੀਤਾ | ਨੌਜਵਾਨਾਂ ਨੇ ਵੀ ਇਸ ਕਾਰਜ ਲਈ ਵਿਸ਼ੇਸ਼ ਉਤਸ਼ਾਹ ਦਿਖਾਇਆ | ਇਸ ਮੌਕੇ ਪੰਚ ਗੁਰਮੇਲ ਸਿੰਘ, ਪੰਚ ਦਰਸ਼ਨ ਸਿੰਘ, ਪੰਚ ਮੱਘਰ ਸਿੰਘ ਅਤੇ ਹੋਰ ਪਤਵੰਤੇ ਮੌਜੂਦ ਸਨ |
