ਲੰਡਨ, 25 ਦਸੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਬਰਤਾਨੀਆ ਦੇ ਮਹਾਰਾਜਾ ਚਾਰਲਸ ਤੀਜੇ ਨੇ ਕਿ੍ਸਮਸ ਸੰਦੇਸ਼ ਵਿਚ ਮਾਨਚੈਸਟਰ ਸਿਨਾਗੌਗ ਤੇ ਆਸਟ੍ਰੇਲੀਆ ਦੇ ਬੌਂਡੀ ਬੀਚ ਹਮਲੇ ਦਾ ਜ਼ਿਕਰ ਕਰਦਿਆਂ ਆਖਿਆ ਕਿ ਜੋ ਦੂਜਿਆਂ ਦੀ ਰੱਖਿਆ ਲਈ ਆਪਣੇ-ਆਪ ਨੂੰ ਖਤਰੇ ਵਿਚ ਪਾਉਂਦੇ ਹਨ ਉਹ ਬਹਾਦਰ ਹੁੰਦੇ ਹਨ | ਮਹਾਰਾਜਾ ਚਾਰਲਸ ਨੇ ਕਿਹਾ ਕਿ ਜਿਵੇਂ ਅਸੀਂ ਘਰ ਅਤੇ ਵਿਦੇਸ਼ ਵਿਚ ਵੰਡ ਬਾਰੇ ਸੁਣਦੇ ਹਾਂ, ਸਾਨੂੰ ਇਸ ਅਨਿਸ਼ਚਿਤਤਾ ਦੇ ਸਮੇਂ ਦੌਰਾਨ ਦਿਆਲਤਾ, ਹਮਦਰਦੀ ਅਤੇ ਉਮੀਦ ਦੀ ਜ਼ਰੂਰਤ ਹੈ | ਉਨ੍ਹਾਂ ਨੇ ਲੋਕਾਂ ਨੂੰ ਆਪਣੀਆਂ ਰੂਹਾਂ ਨੂੰ ਨਵਿਆਉਣ ਲਈ ਉਤਸ਼ਾਹਿਤ ਕੀਤਾ | ਆਪਣੇ ਸਾਲਾਨਾ ਸੰਦੇਸ਼ ਵਿਚ ਸਮਾਜ ਵਿਚ ਦਰਪੇਸ਼ ਚੁਣੌਤੀਆਂ 'ਤੇ ਵਿਚਾਰ ਕਰਨ ਲਈ ਰਵਾਇਤੀ ਕਿ੍ਸਮਸ ਕਹਾਣੀ ਪਵਿੱਤਰ ਪਰਿਵਾਰ ਦੀ ਯਾਤਰਾ, ਚਰਵਾਹੇ ਅਤੇ ਯਿਸੂ ਨੂੰ ਮਿਲਣ ਵਾਲੇ ਬੁੱਧੀਮਾਨ ਆਦਮੀਆਂ ਦਾ ਹਵਾਲਾ ਦਿੱਤਾ | ਮਹਾਰਾਜਾ ਨੇ ਸੰਦੇਸ਼ ਇੱਕ ਮਜ਼ਬੂਤ ਸਮਾਜਿਕ ਉਦੇਸ਼ ਦਿੰਦਿਆਂ ਵੱਖ-ਵੱਖ ਭਾਈਚਾਰਿਆਂ ਤੇ ਦੇਸ਼ਾਂ ਵਿਚਕਾਰ ਬਿਹਤਰ ਸਬੰਧ ਬਣਾਉਣ ਵਿਚ ਮਦਦ ਕਰਨ ਲਈ ਆਪਣੀ ਭੂਮਿਕਾ ਦੀ ਵਰਤੋਂ ਕਰਨ ਦੀ ਇੱਛਾ ਪ੍ਰਗਟਾਈ | ਪ੍ਰੰਪਰਾਵਾਂ ਮੁਤਾਬਿਕ ਸ਼ਾਹੀ ਪਰਿਵਾਰ ਨੇ ਐਂਡਰਿਊ ਤੋਂ ਬਿਨਾਂ ਸੈਂਡਰਿੰਗਮ ਵਿਚ ਕਿ੍ਸਮਸ ਮਨਾਈ |
