ਮਕਸੂਦਾਂ, 4 ਸਤੰਬਰ (ਸੌਰਵ ਮਹਿਤਾ)-ਮਕਸੂਦਾਂ ਇਲਾਕੇ ਦੇ ਨੇੜੇ ਨੇਤਾ ਜੀ ਸੁਭਾਸ਼ ਨਗਰ 'ਚ ਉਸ ਵੇਲੇ ਚੀਕ ਚਿਹਾੜਾ ਮੱਚ ਗਿਆ ਜਦ ਬਰਸਾਤ ਦੇ ਚਲਦਿਆਂ ਇੱਕ ਘਰ ਦੀ ਛੱਤ ਡਿੱਗ ਗਈ ਤੇ ਅੰਦਰ ਰਹਿੰਦੇ ਬਾਪ ਬੇਟੀ ਜਖਮੀ ਹੋ ਗਏ | ਮਿਲੀ ਜਾਣਕਾਰੀ ਮੁਤਾਬਕ ਜਿਸ ਸਮੇਂ ਘਰ ਦੀ ਛੱਤ ਡਿੱਗੀ ਉਸ ਵੇਲੇ ਘਰ ਅੰਦਰ ਰਹਿਣ ਵਾਲਾ ਆਟੋ ਚਾਲਕ ਛੱਤ ਉੱਪਰ ਤਰਪਾਲ ਪਾ ਰਿਹਾ ਸੀ ਤਾਂ ਅਚਾਨਕ ਛੱਤ ਨੀਚੇ ਡਿੱਗ ਪਈ | ਜਿਸ ਤੋਂ ਬਾਅਦ ਦੋਨੋਂ ਬਾਪ ਬੇਟੀ ਜ਼ਖਮੀ ਹੋ ਗਏ ਤੇ ਘਰ ਦਾ ਸਾਰਾ ਸਮਾਨ ਟੁੱਟ ਗਿਆ | ਹਾਦਸੇ ਬਾਰੇ ਜਾਣਕਾਰੀ ਦਿੰਦੇ ਹੋਏ ਸੁਰੇਸ਼ ਕੁਮਾਰ ਨੇ ਦੱਸਿਆ ਕਿ ਉਹ ਨੇਤਾ ਜੀ ਸੁਭਾਸ਼ ਨਗਰ ਚ ਪਰਮਜੀਤ ਕੌਰ ਦੇ ਮਕਾਨ ਵਿੱਚ ਕਿਰਾਏ ਤੇ ਰਹਿੰਦੇ ਹਨ ਤਾਂ ਪਿਛਲੇ ਕਈ ਦਿਨਾਂ ਤੋਂ ਹੋ ਰਹੀ ਬਰਸਾਤ ਦੇ ਕਰਕੇ ਘਰ ਦੀ ਬਾਲਿਆਂ ਵਾਲੀ ਛੱਤ ਚੋਣੀ ਸ਼ੁਰੂ ਹੋ ਗਈ | ਪਾਣੀ ਘਰ ਦੇ ਅੰਦਰ ਆ ਰਿਹਾ ਸੀ ਤਾਂ ਉਹ ਛੱਤ ਉੱਪਰ ਤਰਪਾਲ ਪਾ ਰਿਹਾ ਸੀ ਤੇ ਅਚਾਨਕ ਛੱਤ ਡਿੱਗ ਪਈ | ਜਿਸ ਵੇਲੇ ਛੱਤ ਡਿੱਗੀ ਤਾਂ ਉਸ ਸਮੇਂ ਉਹ ਤੇ ਉਸ ਦੀ ਬੇਟੀ ਮੁਸਕਾਨ ਮਲਵੇ ਦੀ ਲਪੇਟ ਵਿੱਚ ਆ ਗਏ ਜੋ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ | ਛੱਤ ਡਿਗਣ ਕਰਕੇ ਘਰ ਅੰਦਰ ਪਿਆ ਸਾਰਾ ਸਮਾਨ ਨੁਕਸਾਨਿਆ ਗਿਆ |
