ਫਗਵਾੜਾ, 3 ਨਵੰਬਰ (ਹਰਜੋਤ ਸਿੰਘ ਚਾਨਾ)-ਇੱਕ ਮਹਿਲਾ ਦਾ ਏ.ਟੀ.ਐਮ ਕਾਰਡ ਬਦਲ ਕੇ ਠੱਗੀ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਘਟਨਾ ਸੰਬੰਧੀ ਜਾਣਕਾਰੀ ਦਿੰਦਿਆਂ ਸਿਮਰਨਜੀਤ ਕੌਰ ਪਤਨੀ ਪਰਮਿੰਦਰ ਸਿੰਘ ਵਾਸੀ ਪਿੰਡ ਪੰਡੋਰੀ ਨੇ ਦੱਸਿਆ ਕਿ ਉਸਦਾ ਖਾਤਾ ਇੰਡੀਅਨ ਬੈਂਕ ਬਰਾਂਚ 'ਚ ਹੈ ਤੇ ਅੱਜ ਉਹ ਪੰਜਾਬ ਨੈਸ਼ਨਲ ਬੈਂਕ ਬੰਗਾ ਰੋਡ ਦੇ ਏ.ਟੀ.ਐਮ ਬੂਥ ਤੋਂ ਪੈਸੇ ਕਢਵਾਉਣ ਲਈ ਗਈ ਸੀ ਜਿੱਥੇ 3-4 ਹੋਰ ਲੋਕ ਵੀ ਖੜ੍ਹੇ ਸਨ | ਜਿਨ੍ਹਾਂ 'ਚੋਂ ਇੱਕ ਵਿਅਕਤੀ ਨੇ ਪੈਸੇ ਕਢਵਾਉਣ 'ਚ ਮੇਰੀ ਮਦਦ ਕਰਨ ਦੇ ਝਾਂਸੇ 'ਚ ਲੈ ਕੇ ਗੱਲਾ ਗੱਲਾ 'ਚ ਮੇਰਾ ਏ.ਟੀ.ਐਮ ਕਾਰਡ ਬਦਲੀ ਕਰ ਲਿਆ ਤੇ ਜਦੋਂ ਪੈਸੇ ਵਾਪਸ ਕਢਵਾਉਣ ਦੀ ਕੋਸ਼ਿਸ਼ ਕਰ ਰਹੀ ਸੀ ਤਾਂ ਪਿੰਨ ਗਲਤ ਆ ਰਿਹਾ ਸੀ ਤੇ ਬਾਅਦ 'ਚ ਉਸ ਨੂੰ ਘਰ ਆ ਕੇ ਦੋ ਮੈਸੇਜ ਆਏ ਜਿਨ੍ਹਾਂ 'ਚ ਨਿਊ ਜੌੜਾ ਜਿਊਲਰਜ਼ ਦੇ ਨਾਮ ਪਰ 51800 ਰੁਪਏ ਤੇ 46800 ਰੁਪਏ ਦੀਆਂ ਦੋ ਐਂਟਰੀਆਂ ਕਰਕੇ 98 ਹਜ਼ਾਰ 600 ਰੁਪਏ ਦੀ ਠੱਗੀ ਕੀਤੀ ਹੈ | ਘਟਨਾ ਸਬੰਧੀ ਉਨ੍ਹਾਂ ਸਿਟੀ ਪੁਲਿਸ ਨੂੰ ਸੂਚਨਾ ਦਿੱਤੀ ਤੇ ਪੁਲਿਸ ਵਲੋਂ ਇਸ ਸਬੰਧੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ | ਨੌਸਰਬਾਜ਼ ਦੀ ਸੀ.ਸੀ.ਟੀ.ਵੀ. ਫ਼ੁਟੇਜ ਵੀ ਕੈਮਰੇ 'ਚ ਕੈਦ ਹੋ ਗਈ |
