ਫਗਵਾੜਾ, 18 ਦਸੰਬਰ (ਹਰਜੋਤ ਸਿੰਘ ਚਾਨਾ)-ਸਿਹਤ ਵਿਭਾਗ ਵਲੋਂ ਕਰੀਬ ਦੋ ਮਹੀਨੇ ਪਹਿਲਾ ਸੀਲ ਕੀਤੇ ਨਸ਼ਾ ਛੁਡਾਊ ਕੇਂਦਰ 'ਚੋਂ ਗੋਲੀਆਂ ਚੋਰੀ ਹੋਣ ਦੇ ਸੰਬੰਧ 'ਚ ਸਿਟੀ ਪੁਲਿਸ ਨੇ ਅਣਪਛਾਤਿਆਂ ਖਿਲਾਫ਼ ਧਾਰਾ 305 ਬੀ.ਐਨ.ਐਸ. ਤਹਿਤ ਕੇਸ ਦਰਜ ਕੀਤਾ ਹੈ | ਐਸ.ਐਮ.ਓ ਡਾ. ਸਿਮਰਦੀਪ ਕੌਰ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ 'ਚ ਦੱਸਿਆ ਕਿ ਸਹਿਜ ਹਸਪਤਾਲ (ਨਸ਼ਾ ਮੁਕਤੀ ਕੇਂਦਰ) ਨੂੰ ਸਿਹਤ ਵਿਭਾਗ ਵਲੋਂ ਸੀਲ ਕੀਤਾ ਗਿਆ ਸੀ ਤੇ ਸੀਲ ਕਰਨ ਸਮੇਂ 72000 ਗੋਲੀਆਂ ਮੌਜੂਦ ਸਨ ਜਦਕਿ ਬਾਅਦ ਦੀ ਜਾਂਚ ਦੌਰਾਨ ਸਿਰਫ਼ 67 ਹਜ਼ਾਰ ਗੋਲੀਆਂ ਹੀ ਮਿਲੀਆਂ ਹਨ ਤੇ ਕੁੱਲ 5 ਹਜ਼ਾਰ ਗੋਲੀ ਦੀ ਘਾਟ ਪਾਈ ਗਈ ਹੈ | ਸਰਕਾਰੀ ਰਿਕਾਰਡ ਮੁਤਾਬਿਕ ਸਹਿਜ ਹਸਪਤਾਲ ਨੂੰ 15 ਜਨਵਰੀ 2025 ਨੂੰ ਸਿਹਤ ਅਧਿਕਾਰੀਆਂ ਵਲੋਂ ਬਣਾਈ ਗਈ ਕਮੇਟੀ ਨੇ ਸੀਲ ਕੀਤਾ ਸੀ ਤੇ ਉਸ ਸਮੇਂ ਦਵਾਈਆਂ ਦੀ ਪੂਰੀ ਇਨਵੈਂਟਰੀ ਤਿਆਰ ਕੀਤੀ ਗਈ ਸੀ | 24 ਅਕਤੂਬਰ ਨੂੰ ਸਿਵਲ ਸਰਜਨ ਕਪੂਰਥਲਾ ਦੇ ਹੁਕਮਾ ਤੇ ਕੀਤੀ ਗਈ ਅਚਾਨਕ ਜਾਂਚ ਦੌਰਾਨ ਕਮੇਟੀ ਨੇ ਸੀਲ ਕੀਤੇ ਸਟਾਕ 'ਚ ਗੜਬੜ ਪਾਈ ਜਿਸ ਨਾਲ ਇਹ ਸਾਹਮਣੇ ਆਇਆ ਕਿ ਵਿਭਾਗ ਵਲੋਂ ਸੀਲ ਕੀਤੀ ਇਮਾਰਤ 'ਚੋਂ ਦਵਾਈਆਂ ਗਾਇਬ ਹੋ ਗਈਆਂ | ਉਨ੍ਹਾਂ ਦੱਸਿਆ ਕਿ ਰਿਕਾਰਡ ਦੀ ਜਾਂਚ ਤੋਂ ਸਾਹਮਣੇ ਆਇਆ ਕਿ ਐਡਨੋਕ-ਐਨ (2 ਮਿ.ਗ੍ਰਾ, ਯ 0.5 ਮਿ.ਗ੍ਰਾ) ਦੀਆਂ ਗੋਲੀਆਂ ਘੱਟ ਹਨ | ਐਸ.ਪੀ. ਮਾਧਵੀ ਸ਼ਰਮਾ ਨੇ ਦੱਸਿਆ ਕਿ ਪੁਲਿਸ ਵਲੋਂ ਇਸ ਸਬੰਧੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਪਤਾ ਲਗਾਇਆ ਜਾ ਰਿਹਾ ਹੈ |