ਪਾਕਿ ਨੇ ਹੁਣ ਸਾਊਦੀ ਅਰਬ ਤੋਂ 10 ਸਾਲਾਂ ਲਈ 5 ਅਰਬ ਡਾਲਰ ਦੀ ਕੀਤੀ ਮੰਗ <br/>

ਅੰਮਿ੍ਤਸਰ, 9 ਮਾਰਚ (ਸੁਰਿੰਦਰ ਕੋਛੜ)-ਵੱਖ-ਵੱਖ ਮੁਲਕਾਂ ਅਤੇ ਗਲੋਬਲ ਵਿੱਤੀ ਸੰਸਥਾਵਾਂ ਤੋਂ ਲਏ ਭਾਰੀ ਕਰਜ਼ਿਆਂ ਹੇਠ ਦੱਬੇ ਪਾਕਿਸਤਾਨ ਨੇ ਹੁਣ ਰਸਮੀ ਤੌਰ 'ਤੇ ਸਾਊਦੀ ਅਰਬ ਤੋਂ ਵੱਡੀ ਵਿੱਤੀ ਸਹਾਇਤਾ ਦੀ ਬੇਨਤੀ ਕੀਤੀ ਹੈ, ਜਿਸ 'ਚ ਮੌਜੂਦਾ 5 ਅਰਬ ਡਾਲਰ ਦੇ ਡਿਪਾਜ਼ਿਟ ਨੂੰ 10 ਸਾਲਾਂ ਦੀ ਲੰਬੀ ਮਿਆਦ ਦੀ ਸਹੂਲਤ ਵਿਚ ਬਦਲਣਾ ਸ਼ਾਮਿਲ ਹੈ | ਪਾਕਿ ਮੀਡੀਆ ਰਿਪੋਰਟਾਂ ਮੁਤਾਬਿਕ ਇਹ ਕਦਮ ਕੌਮਾਂਤਰੀ ਮੁਦਰਾ ਫ਼ੰਡ (ਆਈ. ਐੱਮ. ਐੱਫ.) ਨਾਲ 7 ਅਰਬ ਡਾਲਰ ਦੇ ਪ੍ਰੋਗਰਾਮ 'ਤੇ ਜਾਰੀ ਗੱਲਬਾਤ ਦੌਰਾਨ ਚੁੱਕਿਆ ਗਿਆ ਹੈ | ਪਾਕਿ ਵਧਦੇ ਖੇਤਰੀ ਤਣਾਅ ਅਤੇ ਕੌਮਾਂਤਰੀ ਮੁਦਰਾ ਫ਼ੰਡ ਨਾਲ ਚੱਲ ਰਹੀ ਗੱਲਬਾਤ ਦੇ ਵਿਚਕਾਰ ਭਾਰੀ ਆਰਥਿਕ ਦਬਾਅ ਦਾ ਸਾਹਮਣਾ ਕਰ ਰਿਹਾ ਹੈ | ਦੱਸਿਆ ਜਾ ਰਿਹਾ ਹੈ ਕਿ ਪਾਕਿ ਨੇ ਲੰਬੇ ਸਮੇਂ ਦੇ ਆਰਥਿਕ ਸਹਿਯੋਗ ਲਈ ਪ੍ਰਸਤਾਵਿਤ ਢਾਂਚੇ ਤਹਿਤ ਸਾਊਦੀ ਅਰਬ ਦੇ ਅਧਿਕਾਰੀਆਂ ਨੂੰ 8 ਮੁੱਖ ਬੇਨਤੀਆਂ ਸੌਂਪੀਆਂ ਹਨ | ਇਨ੍ਹਾਂ ਮੁੱਖ ਪ੍ਰਸਤਾਵਾਂ 'ਚ ਹੀ ਪਾਕਿ ਦੇ ਭੰਡਾਰਾਂ 'ਚ ਰੱਖੇ ਮੌਜੂਦਾ 5 ਅਰਬ ਡਾਲਰ ਦੇ ਸਾਊਦੀ ਡਿਪਾਜ਼ਿਟ ਨੂੰ 10 ਸਾਲਾਂ ਦੀ ਲੰਬੀ ਮਿਆਦ ਦੀ ਸਹੂਲਤ 'ਚ ਬਦਲਣਾ ਵੀ ਸ਼ਾਮਿਲ ਹੈ | ਪਾਕਿ ਨੇ ਸਾਊਦੀ ਅਰਬ ਨੂੰ ਮੁਲਤਵੀ ਭੁਗਤਾਨ 'ਤੇ ਤੇਲ ਸਹੂਲਤ ਨੂੰ ਮੌਜੂਦਾ 1.2 ਅਰਬ ਡਾਲਰ ਤੋਂ ਵਧਾ ਕੇ 5 ਅਰਬ ਡਾਲਰ ਕਰਨ ਲਈ ਵੀ ਕਿਹਾ ਹੈ | ਪਾਕਿ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਕਿ ਪਾਕਿਸਤਾਨ ਨੇ ਆਰਥਿਕ ਸਹਿਯੋਗ ਨੂੰ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਕਈ ਵਾਧੂ ਪ੍ਰਸਤਾਵ ਵੀ ਪੇਸ਼ ਕੀਤੇ ਹਨ |