ਭਾਰਤ ਦੇ ਐਲ.ਪੀ.ਜੀ. ਟੈਂਕਰ ਨੇ 'ਸਟ੍ਰੇਟ ਆਫ਼ ਹੋਰਮੁਜ਼' ਨੂੰ ਕੀਤਾ ਪਾਰ

ਜੰਗਬੰਦੀ ਤੋਂ ਬਾਅਦ ਹੋਰਮੁਜ਼ ਪਾਰ ਕਰਨ ਵਾਲਾ ਪਹਿਲਾ ਭਾਰਤੀ ਜਹਾਜ਼
ਨਵੀਂ ਦਿੱਲੀ, 11 ਅਪ੍ਰੈਲ (ਪੀ. ਟੀ. ਆਈ.)-ਜਹਾਜ਼ ਟਰੈਕਿੰਗ ਡੇਟਾ ਅਨੁਸਾਰ ਭਾਰਤੀ ਝੰਡੇ ਵਾਲਾ ਤਰਲ ਪੈਟਰੋਲੀਅਮ ਗੈਸ (ਐਲ.ਪੀ.ਜੀ.) ਟੈਂਕਰ 'ਜਗ ਵਿਕਰਮ' 'ਸਟ੍ਰੇਟ ਆਫ਼ ਹੋਰਮੁਜ਼' ਨੂੰ ਪਾਰ ਕਰ ਗਿਆ ਹੈ | ਅਮਰੀਕਾ ਅਤੇ ਈਰਾਨ ਵਿਚਕਾਰ ਦੋ ਹਫ਼ਤਿਆਂ ਦੀ ਅਸਥਾਈ ਜੰਗਬੰਦੀ ਤੋਂ ਬਾਅਦ ਇਹ ਪਹਿਲਾ ਭਾਰਤੀ ਜਹਾਜ਼ ਹੈ, ਜਿਸ ਨੇ ਹੋਰਮੁਜ਼ ਨੂੰ ਪਾਰ ਕੀਤਾ ਹੈ | ਟੈਂਕਰ ਸ਼ੁੱਕਰਵਾਰ ਅਤੇ ਸਨਿਚਰਵਾਰ ਦੀ ਦਰਮਿਆਨੀ ਰਾਤ ਨੂੰ ਰਣਨੀਤਕ ਤੌਰ 'ਤੇ ਮਹੱਤਵਪੂਰਨ ਉਕਤ ਜਲਮਾਰਗ 'ਚੋਂ ਲੰਘਿਆ | 'ਜਗ ਵਿਕਰਮ' ਮਾਰਚ ਦੇ ਸ਼ੁਰੂ ਤੋਂ ਬਾਅਦ ਫਾਰਸ ਦੀ ਖਾੜੀ ਤੋਂ ਬਾਹਰ ਨਿਕਲਣ ਵਾਲਾ 9ਵਾਂ ਭਾਰਤੀ ਜਹਾਜ਼ ਹੈ, ਜਦੋਂਕਿ ਲਗਭਗ 15 ਭਾਰਤੀ ਝੰਡੇ ਵਾਲੇ ਜਹਾਜ਼ ਇਸ ਖੇਤਰ 'ਚੋਂ ਲੰਘਣ ਦੀ ਉਡੀਕ ਕਰ ਰਹੇ ਹਨ | ਮੁੰਬਈ ਸਥਿਤ ਗ੍ਰੇਟ ਈਸਟਰਨ ਸ਼ਿਪਿੰਗ ਕੰਪਨੀ ਦੀ ਮਲਕੀਅਤ ਵਾਲਾ 'ਜਗ ਵਿਕਰਮ' ਇਕ ਮੱਧਮ ਆਕਾਰ ਦਾ ਗੈਸ ਕੈਰੀਅਰ ਹੈ, ਜਿਸ ਦੀ ਡੈੱਡਵੇਟ ਸਮਰੱਥਾ 26,000 ਟਨ ਤੋਂ ਵੱਧ ਹੈ | ਵਪਾਰਕ ਸੂਤਰਾਂ ਦਾ ਅੰਦਾਜ਼ਾ ਹੈ ਕਿ ਇਹ ਲਗਭਗ 20,000 ਟਨ ਐਲ.ਪੀ.ਜੀ. ਲੈ ਕੇ ਜਾ ਸਕਦਾ ਹੈ | ਜਦੋਂ ਪੱਛਮੀ ਏਸ਼ੀਆ 'ਚ ਟਕਰਾਅ ਸ਼ੁਰੂ ਹੋਇਆ ਸੀ ਤਾਂ ਘੱਟੋ-ਘੱਟ 28 ਭਾਰਤੀ ਝੰਡੇ ਵਾਲੇ ਜਹਾਜ਼ 'ਸਟ੍ਰੇਟ ਆਫ਼ ਹੋਰਮੁਜ਼' ਖੇਤਰ 'ਚ ਸਨ, ਜਿਨ੍ਹਾਂ 'ਚੋਂ 24 ਪੱਛਮੀ ਪਾਸੇ ਅਤੇ 4 ਜਲ ਮਾਰਗ ਦੇ ਪੂਰਬੀ ਪਾਸੇ ਸਨ |