ਸ਼ਹਿਜਾਦ ਪੂਨਾਵਾਲਾ ਨੇ ਛੱਡੀ ਭਾਜਪਾ

ਨਵੀਂ ਦਿੱਲੀ, 31 ਜੁਲਾਈ (ਉਪਮਾ ਡਾਗਾ ਪਾਰਥ)-ਭਾਜਪਾ ਦੇ ਰਾਸ਼ਟਰੀ ਬੁਲਾਰੇ ਸ਼ਹਿਜਾਦ ਪੂਨਾਵਾਲਾ ਨੇ ਪਾਰਟੀ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਪੂਨਾਵਾਲਾ ਨੇ ਵੀਰਵਾਰ ਨੂੰ ਆਪਣੇ ਸੋਸ਼ਲ ਮੀਡੀਆ ਮੰਚ ‘ਐਕਸ’ ਦੇ ਆਪਣੇ ਹੈਂਡਲ ਤੋਂ ਭਾਜਪਾ ਦਾ ਰਾਸ਼ਟਰੀ ਬੁਲਾਰਾ ਹਟਾ ਦਿੱਤਾ। ਹਲਕਿਆਂ ਮੁਤਾਬਿਕ ਪੂਨਾਵਾਲਾ ਨੇ ਨਿੱਜੀ ਕਾਰਨਾਂ ਦਾ ਹਵਾਲਾ ਦਿੰਦਿਆਂ ਪਾਰਟੀ ਛੱਡ ਦਿੱਤੀ। ਪੂਨਾਵਾਲਾ ਨੇ ‘ਐਕਸ’ ’ਤੇ ਆਪਣੇ ਬਾਇਓ ’ਚ ਜਿਥੇ ਭਾਜਪਾ ਦੀ ਜਾਣਕਾਰੀ ਹਟਾ ਦਿੱਤੀ, ਉਥੇ ਇਹ ਲਿਖਿਆ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਜ਼ਿੰਦਗੀ ਭਰ ਫੋਲੋ ਕਰਨ ਵਾਲਾ। ਪੂਨਾਵਾਲਾ ਨੇ ਬਾਇਓ ਬਦਲਣ ਦੇ ਕੁਝ ਦੇਰ ਬਾਅਦ ਆਪਣੇ ਦੋ ਪੁਰਾਣੇ ਵੀਡੀਓ ਵੀ ਦੁਬਾਰਾ ਸਾਂਝੇ ਕੀਤੇ ਜਿਸ ’ਚ ਉਹ ਸਰਗਰਮ ਸਿਆਸਤ ਛੱਡਣ ਦੀ ਇੱਛਾ ਦਾ ਜ਼ਿਕਰ ਕਰਦੇ ਨਜ਼ਰ ਆਏ।