ਸੰਸਦ ਦਾ ਵਿਸ਼ੇਸ਼ ਇਜਲਾਸ ਬੁਲਾਉਣ ਦੀ ਤਿਆਰੀ ’ਚ ਸਰਕਾਰ ਹੱਦਬੰਦੀ ਤੇ ਔਰਤਾਂ ਦੇ ਰਾਖਵੇਂਕਰਨ ਬਾਰੇ ਬਿੱਲ ਪਾਸ ਕਰਵਾਉਣ ਦੀ ਯੋਜਨਾ

ਨਵੀਂ ਦਿੱਲੀ, 16 ਅਕਤੂਬਰ (ਉਪਮਾ ਡਾਗਾ ਪਾਰਥ)- ਸੰਸਦ ’ਚ ਹੱਦਬੰਦੀ ਅਤੇ ਲੋਕ ਸਭਾ ਤੇ ਵਿਧਾਨ ਸਭਾ ’ਚ ਔਰਤਾਂ ਲਈ ਰਾਖਵੇਂਕਰਨ ਦੇ ਮੁੱਦੇ ’ਤੇ ਸਰਕਾਰ ਇਸੇ ਮਹੀਨੇ ਹੀ ਸੰਸਦ ਦਾ ਵਿਸ਼ੇਸ਼ ਇਜਲਾਸ ਸੱਦ ਸਕਦੀ ਹੈ। ਹਲਕਿਆਂ ਮੁਤਾਬਿਕ ਸਰਕਾਰ ਨੂੰ ਭਰੋਸਾ ਹੈ ਕਿ ਲੋਕ ਸਭਾ ’ਚ ਇਨ੍ਹਾਂ ਬਿੱਲਾਂ ਨੂੰ ਪਾਸ ਕਰਵਾਉਣ ਲਾਇਕ ਗਿਣਤੀ ਉਨ੍ਹਾਂ ਕੋਲ ਹੈ। ਹਲਕਿਆਂ ਮੁਤਾਬਿਕ ਲੋਕ ਸਭਾ ’ਚ ਬਿੱਲ ਪਾਸ ਕਰਵਾਉਣ ਲਈ ਲੋੜੀਂਦੀ ਗਿਣਤੀ ਲਈ ਸਰਕਾਰ ਡੀ.ਐਮ.ਕੇ. ਅਤੇ ਹੋਰਨਾਂ ਛੋਟੀਆਂ ਪਾਰਟੀਆਂ ਨਾਲ ਸੰਪਰਕ ’ਚ ਹੈ। ‘ਇੰਡੀਆ’ ਗੱਠਜੋੜ ਦਾ ਹਿੱਸਾ ਰਹੀ ਅਤੇ ਕਾਂਗਰਸ ਦੇ ਬਹੁਤ ਕਰੀਬ ਰਹੀਂ ਡੀ.ਐਮ.ਕੇ. ਤਾਮਿਲਨਾਡੂ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਕਾਂਗਰਸ ਤੋਂ ਖਫ਼ਾ ਹੈ, ਕਿਉਂਕਿ ਉਸ ਨੇ ਸੂਬੇ ਦੇ ਡੀ.ਐਮ.ਕੇ. ਦੀ ਵਿਰੋਧੀ ਪਾਰਟੀ ਟੀ. ਵੀ. ਕੇ. ਨਾਲ ਸਰਕਾਰ ਬਣਾਉਣ ਲਈ ਹੱਥ ਮਿਲਾ ਲਿਆ ਸੀ। ਸੰਸਦ ਦਾ ਮੌਨਸੂਨ ਇਜਲਾਸ ਉਂਝ 13 ਅਗਸਤ ਨੂੰ ਖ਼ਤਮ ਹੋ ਗਿਆ ਸੀ, ਪਰ ਉਸ ਨੂੰ ਰਸਮੀ ਤੌਰ ’ਤੇ ਬੰਦ ਨਹੀਂ ਕੀਤਾ ਗਿਆ। ਜਿਸ ਕਾਰਨ ਵਿਸ਼ੇਸ਼ ਇਜਲਾਸ ਸੱਦਣ ਦਾ ਰਾਹ ਅਜੇ ਖੁੱਲ੍ਹਾ ਹੋਇਆ ਹੈ। ਸਰਕਾਰ ਫਿਲਹਾਲ ਇਜਲਾਸ ਦੀਆਂ ਤਰੀਕਾਂ ਤੈਅ ਕਰਨ ’ਚ ਰੁੱਝੀ ਹੋਈ ਹੈ।