ਰਹੱਲੀ ਤੋਂ ਬਢੇਲਾਂ ਸੜਕ ਘਟੀਆ ਮਟੀਰੀਅਲ ਕਾਰਨ 24 ਘੰਟੇ 'ਚ ਹੋਈ ਖ਼ਰਾਬ

ਚੱਬੇਵਾਲ, 21 ਅਪ੍ਰੈਲ (ਰਾਜੀਵ ਭਾਰਦਵਾਜ)-ਵੋਟਾਂ ਵਾਲਾ ਸਾਲ ਹੋਣ ਕਾਰਨ ਲਗਪਗ ਹਰ ਪਿੰਡ ਦੀਆਂ ਸੜਕਾਂ ਪੁੱਟੀਆਂ ਹੋਈਆਂ ਹਨ ਅਤੇ ਤੇਜ਼ੀ ਨਾਲ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ, ਪਰ ਮਟੀਰੀਅਲ ਦੀ ਗੁਣਵੱਤਾ ਨੂੰ ਬਿਨਾਂ ਚੈੱਕ ਕੀਤੇ ਸੜਕਾਂ ਬਣਾਉਣ ਦਾ ਕੰਮ ਚੱਲ ਰਿਹਾ ਹੈ | ਇਸਦਾ ਨਤੀਜਾ ਬਹੁਤ ਹੀ ਮਾੜਾ ਨਿਕਲ ਰਿਹਾ ਹੈ, ਸੜਕਾਂ ਬਣਨ ਤੋਂ 24 ਘੰਟੇ ਬਾਅਦ ਹੀ ਟੁੱਟਣੀਆਂ ਸ਼ੁਰੂ ਹੋ ਗਈਆਂ ਹਨ | ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਲੇਬਰ ਪਾਰਟੀ ਦੇ ਪ੍ਰਧਾਨ ਜੈ ਗੋਪਾਲ ਧੀਮਾਨ ਨੇ ਕੀਤਾ | ਇਸ ਸਬੰਧ ਵਿਚ ਪਿੰਡ ਰਹੱਲੀ ਤੋਂ ਬਢੇਲਾਂ ਨੂੰ ਬਣ ਰਹੀ ਸੜਕ ਉੱਤੇ ਪਾਏ ਘਟੀਆ ਮਟੀਰੀਅਲ ਅਤੇ ਗੈਰ ਤਜਰਬੇਕਾਰ ਕਾਮਿਆਂ ਵਲੋਂ ਕੀਤਾ ਜਾ ਰਹੇ ਕੰਮ ਕਾਰਨ ਸੜਕ 24 ਘੰਟੇ ਵਿਚ ਹੀ ਉੱਖੜਨ ਤੇ ਲੇਬਰ ਪਾਰਟੀ ਦੇ ਪ੍ਰਧਾਨ ਜੈ ਗੋਪਾਲ ਧੀਮਾਨ ਅਤੇ ਲਹਿੰਬਰ ਸਿੰਘ ਨੇ ਪੰਜਾਬ ਸਰਕਾਰ ਦੀਆਂ ਅਣਗਹਿਲੀਆਂ ਦੀ ਸਖ਼ਤ ਸ਼ਬਦਾਂ ਵਿਚ ਨਿੰਦਾ ਕਰਦਿਆਂ ਕਿਹਾ ਕਿ ਇਹ ਗੈਰ ਮਿਆਰੀ ਵਿਭਾਗ ਬਦਲਣ ਦੇ ਨਤੀਜੇ ਸਾਹਮਣੇ ਆ ਰਹੇ ਹਨ | ਉਨ੍ਹਾਂ ਕਿਹਾ ਕਿ ਪੀ. ਡਬਲਯੂ. ਡੀ. ਵਿਭਾਗ ਦਾ ਤਜਰਬਾ ਅਤੇ ਵਧੀਆਂ ਇੰਜੀਨੀਅਰਾਂ ਦੇ ਸਦਕਾ ਪੰਜਾਬ ਅੰਦਰ ਸੜਕਾਂ ਦੀ ਜਾਲ ਵਿਛਿਆ ਸੀ ਪਰ ਸੜਕਾਂ ਵੱਡੇ ਪੱਧਰ ਤੇ ਖਿੱਲਰੀਆਂ ਪਈਆਂ ਹਨ | ਧੀਮਾਨ ਨੇ ਕਿਹਾ ਕਿ ਲੁੱਕ ਪਾਉਣ ਤੋਂ ਪਹਿਲਾਂ ਪੱਥਰ ਦੀ ਚੰਗੀ ਤਰ੍ਹਾਂ ਠੋਸ ਤੁਆਈ ਵੀ ਨਹੀਂ ਕੀਤੀ ਗਈ | ਪੰਜਾਬ ਵਿਚ ਅਜਿਹੀਆਂ ਗੈਰ ਮਿਆਰੀ ਸੜਕਾਂ ਦੀ ਉਸਾਰੀ ਹੋ ਰਹੀ ਹੈ ਤੇ ਅਨੇਕਾਂ ਵੀਡੀਓ ਵਾਇਰਲ ਹੋ ਰਹੀਆਂ ਹਨ | ਧੀਮਾਨ ਨੇ ਕਿਹਾ ਕਿ ਬੜੀ ਮੁਸ਼ਕਲ ਨਾਲ ਤਾਂ ਸੜਕਾਂ ਦੀ ਉਸਾਰੀ ਵੀ ਵਾਰੀ ਆਈ ਪਰ ਫਿਰ ਵੀ ਕੰਮ ਅਧੂਰਾ ਹੀ ਅਧੂਰਾ ਹੈ | ਧੀਮਾਨ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਤੁਰਤ ਸੜਕਾਂ ਦੀ ਉਸਾਰੀ ਦਾ ਕੰਮ ਪੀ..ਡਬਲਯੂ. ਡੀ., ਬੀ.ਐਂਡ.ਆਰ ਵਿਭਾਗ ਦੇ ਹਵਾਲੇ ਕੀਤਾ ਜਾਵੇ | ਉਨ੍ਹਾਂ ਨੇ ਇਸ ਦੀ ਸ਼ਿਕਾਇਤ ਪੰਜਾਬ ਰਾਜ ਮਨੁੱਖੀ ਅਧਿਕਾਰ ਕਮਿਸ਼ਨ ਅਤੇ ਨੈਸ਼ਨਲ ਗਰੀਨ ਟਿ੍ਬਿਊਨਲ ਨੂੰ ਵੀ ਭੇਜੀ | ਇਸ ਮੌਕੇ ਦਲਜੀਤ ਸਿੰਘ, ਰਣਜੀਤ ਸਿੰਘ, ਜਿੰਦਰ ਰਾਮ ਤੇ ਰਾਜ ਕੁਮਾਰ ਵੀ ਹਾਜ਼ਰ ਸਨ |