ਹੁਸ਼ਿਆਰਪੁਰ, 21 ਅਪ੍ਰੈਲ (ਬਲਜਿੰਦਰਪਾਲ ਸਿੰਘ)-ਵਾਸਲ ਐਜੂਕੇਸ਼ਨ ਵਲੋਂ ਚਲਾਏ ਜਾ ਰਹੇ ਜੈਮਸ ਕੈਂਬਰਿਜ ਇੰਟਰਨੈਸ਼ਨਲ ਸਕੂਲ ਹੁਸ਼ਿਆਰਪੁਰ ਨੇ ਹਾਲ ਹੀ 'ਚ ਇਕ ਅਤਿ-ਆਧੁਨਿਕ ਇੰਟਰਐਕਟਿਵ ਸੈਂਸਰ-ਆਧਾਰਿਤ ਐਕਟਿਵ ਫਲੋਰ ਸਿਸਟਮ ਦੇ ਸ਼ਾਨਦਾਰ ਲਾਂਚ ਦੀ ਮੇਜ਼ਬਾਨੀ ਕੀਤੀ | ਵਾਸਲ ਐਜੂਕੇਸ਼ਨ ਦੇ ਸੀ. ਈ. ਓ. ਰਾਘਵ ਵਾਸਲ ਨੇ ਇਸ ਅਤਿ-ਆਧੁਨਿਕ ਇੰਟਰਐਕਟਿਵ ਸੈਂਸਰ-ਆਧਾਰਿਤ ਐਕਟਿਵ ਫਲੋਰ ਦਾ ਉਦਘਾਟਨ ਕੀਤਾ | ਇਹ ਇਕ ਅਜਿਹਾ ਸਿਸਟਮ ਹੈ ਜੋ ਫ਼ਰਸ਼ ਨੂੰ ਇਕ ਵਿਸ਼ਾਲ ਟੱਚ ਸਕਰੀਨ 'ਚ ਬਦਲ ਦਿੰਦਾ ਹੈ, ਜਿਸ 'ਚ ਵਿਦਿਆਰਥੀ ਆਪਣੇ ਪੈਰਾਂ ਦੀ ਹਰਕਤ ਅਤੇ ਛਾਲ ਮਾਰਨ ਦੀ ਪ੍ਰਕਿਰਿਆ ਦੀ ਵਰਤੋਂ ਕਰਦੇ ਸਕਰੀਨ 'ਤੇ ਚੱਲ ਰਹੀਆਂ ਗਣਿਤ, ਭਾਸ਼ਾ ਅਤੇ ਵਿਗਿਆਨ ਦੀਆਂ ਖੇਡਾਂ ਨੂੰ ਹੱਲ ਕਰਦੇ ਹਨ | ਇਹ ਤਕਨਾਲੋਜੀ ਵਿਦਿਆਰਥੀਆਂ ਦੇ ਸਿੱਖਣ ਦੇ ਤਜਰਬੇ ਨੂੰ ਰਵਾਇਤੀ ਕਲਾਸ-ਰੂਮ ਤੋਂ ਬਾਹਰ ਲੈ ਜਾਂਦੀ ਹੈ ਅਤੇ ਉਨ੍ਹਾਂ ਨੂੰ ਸਰੀਰਕ ਗਤੀਵਿਧੀ ਨਾਲ ਸਿੱਖਣ ਲਈ ਉਤਸ਼ਾਹਿਤ ਕਰਦੀ ਹੈ | ਇਹ ਤਕਨਾਲੋਜੀ ਬੱਚਿਆਂ ਨੂੰ ਵੀਜ਼ੂਅਲ ਤੇ ਆਵਾਜ਼ ਦੀ ਮਦਦ ਨਾਲ ਲੰਬੇ ਸਮੇਂ ਲਈ ਜਾਣਕਾਰੀ ਯਾਦ ਰੱਖਣ 'ਚ ਮਦਦ ਕਰਦੀ ਹੈ | ਇਸ ਦੇ ਨਾਲ ਹੀ ਸਰੀਰਕ ਗਤੀਸ਼ੀਲਤਾ, ਟੀਮ ਵਰਕ ਅਤੇ ਸਮਾਜਿਕ ਹੁਨਰ ਵਿਕਸਤ ਕੀਤੇ ਜਾਂਦੇ ਹਨ | ਇਹ ਮੋਸ਼ਨ ਸੈਂਸਰ ਤਕਨਾਲੋਜੀ ਰਾਹੀਂ ਰੀਅਲ ਟਾਈਮ ਇੰਟਰਐਕਟਿਵ ਅਨੁਭਵ ਪ੍ਰਦਾਨ ਕਰਦਾ ਹੈ | ਮਾਈ ਫਲੋਰ ਕਲਾਉਡ ਪਲੇਟਫ਼ਾਰਮ 'ਚ 10 ਹਜ਼ਾਰ ਤੋਂ ਵੱਧ ਵਿੱਦਿਅਕ ਖੇਡਾਂ ਉਪਲੱਬਧ ਕਰਵਾਈਆਂ ਗਈਆਂ ਹਨ | ਇਸ ਮੌਕੇ ਵਾਸਲ ਐਜੂਕੇਸ਼ਨ ਦੇ ਸੀ.ਈ.ਓ. ਰਾਘਵ ਵਾਸਲ ਨੇ ਕਿਹਾ ਕਿ ਰਾਸ਼ਟਰੀ ਸਿੱਖਿਆ ਨੀਤੀ ਸਮੇਤ ਆਧੁਨਿਕ ਸਿੱਖਿਆ ਨੀਤੀਆਂ ਨੂੰ ਲਾਗੂ ਕਰਨਾ ਤੇ ਆਧੁਨਿਕ ਸਿੱਖਿਆ ਤਕਨੀਕਾਂ ਦੀ ਵਰਤੋਂ ਸਾਰੇ ਵਾਸਲ ਵਿੱਦਿਅਕ ਸੰਸਥਾਵਾਂ 'ਚ ਤੇਜ਼ੀ ਨਾਲ ਅੱਗੇ ਵੱਧ ਰਹੀ ਹੈ | ਐਕਟਿਵ ਫਲੋਰ ਇਸ ਦਿਸ਼ਾ 'ਚ ਇਕ ਮਹੱਤਵਪੂਰਨ ਅਤੇ ਸ਼ਲਾਘਾਯੋਗ ਪਹਿਲ ਹੈ | ਵਾਸਲ ਐਜੂਕੇਸ਼ਨ ਦੇ ਚੇਅਰਮੈਨ ਸੰਜੀਵ ਵਾਸਲ ਨੇ ਕਿਹਾ ਕਿ ਵਾਸਲ ਐਜੂਕੇਸ਼ਨ ਦਾ ਟੀਚਾ ਹਮੇਸ਼ਾ ਸਿੱਖਿਆ ਨੂੰ ਜ਼ਿੰਦਗੀ 'ਚ ਜੋੜਨਾ ਰਿਹਾ ਹੈ, ਸਿਰਫ਼ ਕਿਤਾਬਾਂ 'ਚ ਨਹੀਂ ਅਤੇ ਉਕਤ ਤਕਨਾਲੋਜੀ ਵਿਦਿਆਰਥੀਆਂ ਦੇ ਮਾਨਸਿਕ ਅਤੇ ਸਰੀਰਕ ਵਿਕਾਸ 'ਚ ਨਵੀਂ ਊਰਜਾ ਭਰੇਗੀ | ਇਸ ਕਾਰਜ 'ਚ ਵਾਸਲ ਸਿੱਖਿਆ ਦੇ ਅਕਾਦਮਿਕ ਨਿਰਦੇਸ਼ਕ ਜੀ.ਐਸ. ਮਾਧਵ ਰਾਓ ਵਿਸ਼ੇਸ਼ ਤੌਰ 'ਤੇ ਮੌਜੂਦ ਸਨ | ਇਸ ਮੌਕੇ ਪਿ੍ੰਸੀਪਲ ਸੰਗੀਤਾ ਨਿਸਤਾਂਦਰਾ ਨੇ ਕਿਹਾ ਕਿ ਐਕਟਿਵ ਫਲੋਰ ਵਿਦਿਆਰਥੀਆਂ ਨੂੰ ਸਿੱਖਣ ਲਈ ਉਤਸ਼ਾਹਿਤ ਕਰੇਗਾ ਅਤੇ ਬੱਚਿਆਂ 'ਚ ਨਵੇਂ ਹੁਨਰਾਂ ਦੇ ਵਿਕਾਸ ਨੂੰ ਵਧਾਏਗਾ | ਅਧਿਆਪਕ ਵਿਦਿਆਰਥੀਆਂ ਨੂੰ ਬਿਹਤਰ ਢੰਗ ਨਾਲ ਸਿਖਾਉਣ ਦੇ ਯੋਗ ਹੋਣਗੇ |
