ਮਨੁੱਖਤਾ ਤੇ ਵਾਤਾਵਰਨ ਨੂੰ ਬਚਾਉਣ ਲਈ ਵੱਡੀ ਗਿਣਤੀ ’ਚ ਬੂਟੇ ਲਗਾਉਣ ਦੀ ਲੋੜ-ਸੁਰਿੰਦਰ ਗੁਪਤਾ

ਮੁਕੇਰੀਆਂ, 22 ਜੂਨ (ਰਾਮਗੜ੍ਹੀਆ)-ਅੱਜ ਸਰਬੱਤ ਦਾ ਭਲਾ ਮਿਸ਼ਨ ਗ੍ਰੀਨ ਸੁਸਾਇਟੀ ਮੁਕੇਰੀਆਂ ਦੀ ਮੀਟਿੰਗ ਸੁਰਿੰਦਰ ਗੁਪਤਾ ਦੀ ਪ੍ਰਧਾਨਗੀ ਹੇਠ ਹੋਈ। ਮੀਟਿੰਗ ਵਿਚ ਆਰਮੀ ਗਰਾਊਂਡ ਮੁਕੇਰੀਆਂ ਵਿਖੇ ਆਉਣ ਵਾਲੇ ਸੀਜਨ ਵਿਚ ਕਰੀਬ 300-400 ਬੂਟੇ ਲਗਾਉਣ ਦਾ ਟੀਚਾ ਮਿੱਥਿਆ ਗਿਆ। ਇਸ ਮੌਕੇ ਸਰਬੱਤ ਦਾ ਭਲਾ ਮਿਸ਼ਨ ਗ੍ਰੀਨ ਸੁਸਾਇਟੀ ਮੁਕੇਰੀਆਂ ਦੇ ਪ੍ਰਧਾਨ ਅਤੇ ਸਾਬਕਾ ਨਾਇਬ ਤਹਿਸੀਲਦਾਰ ਸੁਰਿੰਦਰ ਗੁਪਤਾ ਨੇ ਸੰਬੋਧਨ ਦੌਰਾਨ ਕਿਹਾ ਕਿ ਭਾਰਤ ਹੀ ਨਹੀਂ ਬਲਕਿ ਪੂਰੀ ਦੁਨੀਆ ਵਿਚ ਲਗਾਤਾਰ ਵੱਧ ਰਹੇ ਤਾਪਮਾਨ ਲਈ ਬਹੁਤ ਹੱਦ ਤੱਕ ਮਨੁੱਖ ਖ਼ੁਦ ਹੀ ਜ਼ਿੰਮੇਵਾਰ ਹੈ। ਪ੍ਰਮਾਤਮਾ ਨੇ ਸਾਨੂੰ ਜਿਵੇਂ ਦਾ ਵਾਤਾਵਰਨ ਦਿੱਤਾ ਸੀ ਅੱਜ ਅਸੀਂ ਮਨੁੱਖਾਂ ਨੇ ਇਸ ਵਾਤਾਵਰਨ ਵਿਚੋਂ ਵੱਡੀ ਗਿਣਤੀ ’ਚ ਦਰਖਤਾਂ ਦੀ ਹਰ ਰੋਜ਼ ਕਟਾਈ ਕਰਕੇ ਵਾਤਾਵਰਨ ਨੂੰ ਪੂਰੀ ਤਰ੍ਹਾਂ ਦੂਸ਼ਿਤ ਕਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਜੇ ਅੱਜ ਤੋਂ ਮਨੁੱਖ ਨੇ ਆਪਣੀ ਸੋਚ ਨਾ ਬਦਲੀ ਤਾਂ ਆਉਣ ਵਾਲੇ ਸਮਿਆਂ ਵਿਚ ਲੋਕਾਂ ਨੂੰ ਪਾਣੀ, ਆਕਸੀਜਨ ਤੇ ਹੋਰ ਕੁਦਰਤੀ ਸਰੋਤਾਂ ਤੋਂ ਹੱਥ ਧੋਣੇ ਪੈਣਗੇ ਜੋ ਕਿ ਮਨੁੱਖ ਦੀ ਮੌਤ ਦਾ ਕਾਰਨ ਬਣਨਗੇ। ਇਸ ਮੌਕੇ ਸਰਬੱਤ ਦਾ ਭਲਾ ਮਿਸ਼ਨ ਗ੍ਰੀਨ ਸੁਸਾਇਟੀ ਮੁਕੇਰੀਆਂ ਦੇ ਮੈਂਬਰ ਰਛਪਾਲ ਸਿੰਘ, ਮਾ. ਸੇਵਾ ਸਿੰਘ, ਇੰਜੀ. ਰਵਿੰਦਰ ਸਿੰਘ, ਇੰਦਰ ਬਤਰਾ, ਜੋਗਿੰਦਰ, ਲਲਿਤ, ਰਮੇਸ਼ ਵਰਮਾ, ਜਸਵੰਤ ਸਿੰਘ ਆਦਿ ਸਮੇਤ ਹੋਰ ਹਾਜ਼ਰ ਸਨ।