ਪੋਜੇਵਾਲ ਸਰਾਂ, 8 ਜੂਨ (ਨਵਾਂਗਰਾਈਾ)-ਪਿੰਡ ਟੋਰੋਵਾਲ ਦੇ ਚੌਧਰੀ ਪ੍ਰੇਮ ਚੰਦ ਦੇ ਦੋਹਤੇ ਤੇ ਡਾ. ਦੀਪਕ ਬਜਾੜ ਦੇ ਭਾਣਜੇ ਰਯਾਨ ਚੇਚੀ ਵਲੋਂ ਨੈਸ਼ਨਲ ਕਿੱਕ ਬਾਕਸਿੰਗ ਚੈਂਪੀਅਨਸ਼ਿਪ ਵਿਚ ਦੋਹਰਾ ਸੋਨ ਤਗਮਾ ਪ੍ਰਾਪਤ ਕਰਕੇ ਇਲਾਕੇ ਦਾ ਨਾਂਅ ਰੌਸ਼ਨ ਕੀਤਾ | ਜੂਨੀਅਰ ਨੈਸ਼ਨਲ ਕਿੱਕ ਬਾਕਸਿੰਗ ਚੈਂਪੀਅਨਸ਼ਿਪ ਵਿਚ ਟੀਮ ਜਲੰਧਰ ਵਲੋਂ ਰਿਆਨ ਚੇਚੀ ਨੇ ਰਾਸ਼ਟਰੀ ਕਿੱਕ ਬਾਕਸਿੰਗ ਚੈਂਪੀਅਨਸ਼ਿਪ ਵਿਚ ਲਾਈਟ ਕਾਂਟੈਕਟ ਤੇ ਪੁਆਇੰਟ ਫਾਈਟ ਵਰਗਾਂ ਵਿਚ ਦੁਬਾਰਾ ਸੋਨ ਤਗਮਾ ਜਿੱਤਿਆ | ਇਸ ਤਰ੍ਹਾਂ ਉਹ ਲਗਾਤਾਰ ਚੌਥੇ ਸਾਲ ਵੀ ਆਪਣੀ ਜਿੱਤ ਦੀ ਲੜੀ ਜਾਰੀ ਰੱਖਣ ਵਿਚ ਸਫਲ ਰਿਹਾ | ਉਥੇ ਹੀ, ਇਨ੍ਹਾਂ ਪ੍ਰਾਪਤੀਆਂ ਨਾਲ ਰਿਆਨ ਚੇਚੀ ਨੇ ਓਡੀਸ਼ਾ ਦੇ ਖੁਰਦਰਾ ਵਿਚ 30 ਮਈ ਤੋਂ 3 ਜੂਨ ਤੱਕ ਹੋਈ ਰਾਸ਼ਟਰੀ ਕਿੱਕ ਬਾਕਸਿੰਗ ਚੈਂਪੀਅਨਸ਼ਿਪ 'ਚ ਪੰਜਾਬ ਟੀਮ ਨੂੰ ਪਹਿਲਾ ਸਥਾਨ ਦਿਵਾਉਣ ਵਿਚ ਆਪਣਾ ਯੋਗਦਾਨ ਪਾਇਆ | ਓਡੀਸ਼ਾ ਵਿਚ ਹੋਈ 2026 ਜੂਨੀਅਰ ਨੈਸ਼ਨਲ ਕਿੱਕ ਬਾਕਸਿੰਗ ਚੈਂਪੀਅਨਸ਼ਿਪ ਵਿਚ ਟੋਰੋਵਾਲ ਪਿੰਡ ਤੋਂ ਉਸ ਦੇ ਨਾਨਾ ਪ੍ਰੇਮ ਲਾਲ ਚੌਧਰੀ ਕਰਿਆਨਾ ਸਟੋਰ ਪੋਜੇਵਾਲ ਅਤੇ ਮਾਮਾ ਡਾਕਟਰ ਦੀਪਕ ਕੁਮਾਰ ਨੇ ਇਸ ਰਾਸ਼ਟਰੀ ਚੈਂਪੀਅਨਸ਼ਿਪ ਵਿਚ ਉਸ ਦੀ ਸਫਲਤਾ 'ਤੇ ਉਸ ਨੂੰ ਵਧਾਈ ਦਿੱਤੀ ਅਤੇ ਕਿਹਾ ਕਿ ਇਹ ਸਭ ਰਿਆਨ ਚੇਚੀ, ਉਸਦੇ ਮਾਤਾ-ਪਿਤਾ ਤੇ ਕੋਚਾਂ ਦੀ ਮਿਹਨਤ ਦਾ ਨਤੀਜਾ ਹੈ | ਕੋਚ ਖੇਮਚੰਦ, ਕੋਚ ਯਾਦਵਿੰਦਰ, ਕੋਚ ਮਨਜੋਤ ਕੌਰ, ਕੋਚ ਜੋਗੀ ਦੇ ਉੱਤਮ ਮਾਰਗਦਰਸ਼ਨ ਕਾਰਨ ਹੀ ਰਿਆਨ ਚੇਚੀ ਸੂਬਾ ਪੱਧਰ 'ਤੇ ਚੈਂਪੀਅਨ ਬਣ ਸਕਿਆ, ਨਾਲ ਹੀ ਰਾਸ਼ਟਰੀ ਪੱਧਰ 'ਤੇ ਵੀ ਤਗਮਾ ਜਿੱਤ ਸਕਿਆ | ਰਿਆਨ ਚੇਚੀ ਵਲੋਂ ਨੈਸ਼ਨਲ ਪੱਧਰ 'ਤੇ ਸੋਨ ਤਗਮਾ ਜਿੱਤਣ ਨਾਲ ਉਸ ਦੇ ਦਾਦਕਾ ਪਿੰਡ ਡੰਗੋਰੀ ਤੇ ਨਾਨਕਾ ਪਿੰਡ ਟੋਰੋਵਾਲ ਵਿਖੇ ਖੁਸ਼ੀ ਦੀ ਲਹਿਰ ਫੈਲ ਗਈ ਤੇ ਲੋਕਾਂ ਵਲੋਂ ਉਸ ਦੇ ਮਾਪਿਆਂ ਨੂੰ ਵਧਾਈਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ |
