ਰਾਹੋਂ, 16 ਜੁਲਾਈ (ਉਂਕਾਰ ਸਿੰਘ ਰਾਠੋਰ) - ਪੁਲਿਸ ਵਲੋਂ ਹੈਰੋਇਨ ਦਾ ਸੇਵਨ ਕਰਦਾ ਨੌਜਵਾਨ ਰੰਗੇ ਹੱਥੀਂ ਕਾਬੂ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਏ. ਐਸ. ਆਈ ਸਤਨਾਮ ਸਿੰਘ ਰੰਧਾਵਾ ਚੌਂਕੀ ਇੰਚਾਰਜ ਸ਼ੇਖਾਂ ਮਜ਼ਾਰਾਂ ਨੇ ਆਖਿਆ ਕਿ ਪੁਲਿਸ ਥਾਣਾ ਰਾਹੋਂ ਤੋਂ ਚੌਂਕੀ ਸੇਖਾ ਮਜਾਰਾ ਹੋ ਕੇ ਸੈੱਲ ਟੈਕਸਟਾਇਲ ਫੈਕਟਰੀ ਦੇ ਨਾਲ-ਨਾਲ ਜਾਂਦੀ ਕੱਚੀ ਗੋਹਰੀ ਤੋਂ ਹੁੰਦੇ ਹੋਏ ਗੜ੍ਹੀ ਉੱਧੋਵਾਲ ਨੂੰ ਜਾ ਰਹੇ ਸੀ ਤਾਂ ਖੱਬੇ ਪਾਸੇ ਪਾਪੁਲਰ ਦੇ ਦਰੱਖਤਾਂ ਦੀ ਆੜ ਵਿੱਚ ਇੱਕ ਨੌਜਵਾਨ ਹੈਰੋਇਨ ਦਾ ਸੇਵਨ ਕਰਦਾ ਦਿਖਾਈ ਦਿੱਤਾ। ਉਸ ਨੂੰ ਫੜਨ ਉਪਰੰਤ ਉਸ ਕੋਲੋਂ ਪੰਨੀ, ਲਾਈਟਰ, ਪਾਈਪ, 10 ਰੁਪਏ ਦਾ ਜਲਿਆ ਹੋਇਆ ਨੋਟ ਆਦਿ ਬਰਾਮਦ ਹੋਈ। ਪੁਲਿਸ ਪਾਰਟੀ ਵਲੋਂ ਉਸ ਨੂੰ ਮੌਕੇ ’ਤੇ ਕਾਬੂ ਕਰਕੇ ਅਗਲੀ ਤਫਤੀਸ਼ ਸ਼ੁਰੂ ਕਰ ਦਿੱਤੀ ਗਈ ਹੈ। ਏ. ਐੱਸ. ਆਈ ਸਤਨਾਮ ਸਿੰਘ ਰੰਧਾਵਾ ਨੇ ਆਖਿਆ ਕਿ ਨੌਜਵਾਨ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਵਿਅਕਤੀ ਦੀ ਪਹਿਚਾਣ ਜੁਗਰਾਜ ਸਿੰਘ ਪੁੱਤਰ ਸੁਖਵਿੰਦਰ ਸਿੰਘ ਵਾਸੀ ਕੋਟ ਰਾਂਝਾ, ਥਾਣਾ ਰਾਹੋਂ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਵਜੋਂ ਹੋਈ ਹੈ। ਵਿਅਕਤੀ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।
