ਬਸੀ ਪਠਾਣਾਂ, 23 ਅਪ੍ਰੈਲ (ਐਚ.ਐਸ. ਗੌਤਮ)-ਆਗਾਮੀ ਨਗਰ ਕੌਂਸਲ ਚੋਣਾਂ ਸਬੰਧੀ ਕਾਂਗਰਸ ਪਾਰਟੀ ਦੇ ਵਫ਼ਦ ਵਲੋਂ ਸੀਨੀਅਰ ਆਗੂ ਡਾ. ਮਨੋਹਰ ਸਿੰਘ ਦੀ ਅਗਵਾਈ ਹੇਠ ਸਬ ਡਵੀਜ਼ਨਲ ਮੈਜਿਸਟਰੇਟ ਹਰਵੀਰ ਕੌਰ ਨੂੰ ਇਕ ਮੈਮੋਰੰਡਮ ਸੌਂਪਿਆ ਗਿਆ | ਇਸ ਮੌਕੇ ਡਾ. ਮਨੋਹਰ ਸਿੰਘ ਨੇ ਕਿਹਾ ਕਿ ਹਾਲ ਹੀ ਵਿਚ ਪੰਜਾਬ ਸਰਕਾਰ ਵਲੋਂ ਕੀਤੀ ਵਾਰਡਬੰਦੀ ਤੋਂ ਬਾਅਦ ਸਾਰੇ ਬਸੀ ਸ਼ਹਿਰ 'ਚ ਲੋਕਾਂ 'ਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ | ਨਵੀਂ ਵਾਰਡਬੰਦੀ ਅਨੁਸਾਰ ਵੋਟਰ ਸੂਚੀਆਂ ਘੋਖਣ ਤੋਂ ਵੱਡੇ ਪੱਧਰ ਤੇ ਵੋਟਾਂ ਦਾ ਹੇਰ ਫੇਰ ਕੀਤਾ ਸਾਹਮਣੇ ਆਇਆ ਹੈ | ਬਹੁਤੇ ਵਾਰਡਾਂ 'ਚ ਕਈ-ਕਈ ਪਰਿਵਾਰਾਂ ਦੀਆਂ ਵੋਟਾਂ ਇੱਧਰ-ਉੱਧਰ ਅਲੱਗ ਵਾਰਡਾਂ 'ਚ ਪਾ ਦਿੱਤੀਆਂ ਗਈਆਂ ਹਨ | ਇਹ ਵਿਸਥਾਰਪੂਰਵਕ ਢੰਗ ਐੱਸ.ਡੀ.ਐਮ ਧਿਆਨ ਵਿਚ ਲਿਆਂਦਾ ਗਿਆ ਹੈ | ਉਨ੍ਹਾਂ ਮੰਗ ਕੀਤੀ ਕਿ ਵੋਟਰ ਸੂਚੀਆਂ ਨੂੰ ਤੁਰੰਤ ਦਰੁਸਤ ਕੀਤਾ ਜਾਣਾ ਯਕੀਨੀ ਬਣਾਇਆ ਜਾਵੇ | ਇਸ ਮੌਕੇ 'ਤੇ ਸਾਬਕਾ ਨਗਰ ਕੌਂਸਲ ਪ੍ਰਧਾਨ ਓਮ ਪ੍ਰਕਾਸ਼ ਤਾਂਗੜੀ, ਰਮੇਸ਼ ਕੁਮਾਰ ਗੁਪਤਾ, ਕਰਮਜੀਤ ਸਿੰਘ, ਸ਼ਾਮ ਲਾਲ, ਕਿਸ਼ੋਰੀ ਲਾਲ, ਰਾਜ ਕੁਮਾਰ ਵਧਵਾ, ਪਰਮਜੀਤ ਸਿੰਘ, ਰਣਧੀਰ ਸਿੰਘ ਧੀਰਾ, ਹਰਦੀਪ ਸਿੰਘ ਬਾਜਵਾ, ਕਮਲ ਕੁਮਾਰ, ਰਾਧੇ ਸਿਆਮ, ਬਬਲੀ, ਜਸਪਾਲ ਸਿੰਘ ਵੀ ਹਾਜ਼ਰ ਸਨ |
