ਸੰਘੋਲ, 28 ਅਪ੍ਰੈਲ (ਪਰਮਵੀਰ ਸਿੰਘ)-ਪਿੰਡ ਸੋਹਾਵੀ ਦੇ ਸ਼ਿਵ ਮੰਦਿਰ ਦੇ ਸੇਵਾਦਾਰ ਦੀ ਬਿਮਾਰੀ ਕਾਰਨ ਇਲਾਜ ਦੌਰਾਨ ਚੰਡੀਗੜ੍ਹ ਦੇ ਹਸਪਤਾਲ 'ਚ ਮੌਤ ਹੋ ਗਈ | ਸਰਪੰਚ ਰਵਿੰਦਰ ਕੁਮਾਰ ਨੇ ਦੱਸਿਆ ਕਿ ਸੇਵਾਦਾਰ ਆਪਣਾ ਨਾਂ ਕਮਲ ਦਾਸ ਦੱਸਦਾ ਸੀ, ਜਦੋਂਕਿ ਉਹ ਕਿੱਥੇ ਦਾ ਰਹਿਣ ਵਾਲਾ ਹੈ, ਇਸ ਦੀ ਕਿਸੇ ਨੂੰ ਜਾਣਕਾਰੀ ਨਹੀਂ ਹੈ ਅਤੇ ਨਾ ਹੀ ਉਸ ਕੋਲੋਂ ਪਤੇ ਦਾ ਕੋਈ ਦਸਤਾਵੇਜ਼ ਮਿਲਿਆ ਹੈ | ਮਾਮਲੇ ਬਾਰੇ ਤਫ਼ਤੀਸ਼ੀ ਅਫ਼ਸਰ ਸਹਾਇਕ ਥਾਣੇਦਾਰ ਦਵਿੰਦਰ ਸਿੰਘ ਨੇ ਕਿਹਾ ਕਿ ਮਿ੍ਤਕ ਦੀ ਪੂਰਨ ਸ਼ਨਾਖ਼ਤ, ਪਰਿਵਾਰ ਦਾ ਪਤਾ ਕਰਨ ਲਈ ਉਸ ਦੀ ਲਾਸ਼ 72 ਘੰਟੇ ਲਈ ਮੋਰਚਰੀ 'ਚ ਰਖਵਾਈ ਗਈ ਹੈ | ਮਿ੍ਤਕ ਲਗਪਗ 55 ਸਾਲਾਂ ਦਾ ਪ੍ਰਵਾਸੀ ਪ੍ਰਤੀਤ ਹੁੰਦਾ ਹੈ |
