ਬਸੀ ਪਠਾਣਾਂ, 25 ਮਈ (ਐਚ.ਐਸ.ਗੌਤਮ)-ਅੱਜ ਦੇ ਪਦਾਰਥਵਾਦੀ ਦੌਰ ਵਿਚ ਜਿੱਥੇ ਇਮਾਨਦਾਰੀ ਵਰਗੇ ਗੁਣ ਘਟਦੇ ਜਾ ਰਹੇ ਹਨ, ਉੱਥੇ ਹੀ ਪਿੰਡ ਖ਼ਾਲਸਪੁਰ ਦੇ ਇਕ ਨੌਜਵਾਨ ਨੇ ਇਮਾਨਦਾਰੀ ਦੀ ਬੇਮਿਸਾਲ ਉਦਾਹਰਨ ਪੇਸ਼ ਕੀਤੀ ਹੈ | ਜਾਣਕਾਰੀ ਅਨੁਸਾਰ ਪਿੰਡ ਦਮਹੇੜੀ ਦੇ ਨਿਵਾਸੀ ਨਾਜ਼ਰ ਸਿੰਘ ਮੁੰਡੀ ਜਦੋਂ ਸ਼ਹਿਰ ਜਾ ਰਹੇ ਸਨ, ਤਾਂ ਰਸਤੇ ਵਿਚ ਉਨ੍ਹਾਂ ਦੇ 50,000 ਰੁਪਏ ਕਿਧਰੇ ਡਿੱਗ ਗਏ | ਇਹ ਰਾਸ਼ੀ ਸੁਖਵਿੰਦਰ ਸਿੰਘ ਕਾਲਾ ਵਾਸੀ ਖ਼ਾਲਸਪੁਰ ਨੂੰ ਮਿਲੀ | ਸੁਖਵਿੰਦਰ ਸਿੰਘ ਨੇ ਬਿਨਾਂ ਕਿਸੇ ਲਾਲਚ ਦੇ ਪੂਰੀ ਇਮਾਨਦਾਰੀ ਦਿਖਾਉਂਦੇ ਹੋਏ ਤੁਰੰਤ ਨਾਜ਼ਰ ਸਿੰਘ ਮੁੰਡੀ ਤੱਕ ਪਹੁੰਚ ਕਰਕੇ ਉਨ੍ਹਾਂ ਦੀ ਨਕਦੀ ਸਹੀ-ਸਲਾਮਤ ਉਨ੍ਹਾਂ ਦੇ ਸਪੁਰਦ ਕਰ ਦਿੱਤੀ | ਆਪਣੀ ਗੁਆਚੀ ਰਾਸ਼ੀ ਵਾਪਸ ਮਿਲਣ 'ਤੇ ਖ਼ੁਸ਼ੀ ਜ਼ਾਹਿਰ ਕਰਦਿਆਂ ਨਾਜ਼ਰ ਸਿੰਘ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਸੁਖਵਿੰਦਰ ਸਿੰਘ ਕਾਲਾ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ |
