ਬਟਾਲਾ, 25 ਫਰਵਰੀ (ਰਾਕੇਸ਼ ਰੇਖੀ)-ਆਪਣੇ ਕੰਮ ਤੋਂ ਛੁੱਟੀ ਕਰ ਕੇ ਘਰ ਜਾ ਰਿਹਾ ਵਿਅਕਤੀ ਰਾਹ ਵਿਚ ਪੇਸ਼ਾਬ ਲਈ ਰੁਕਿਆ, ਇਸੇ ਦੌਰਾਨ ਤਿੰਨ ਨੌਜਵਾਨ ਉਸ ਦਾ ਮੋਟਰਸਾਈਕਲ ਤੇ ਮੋਬਾਇਲ ਫੋਨ ਲੈ ਕੇ ਫਰਾਰ ਹੋ ਗਏ | ਥਾਣਾ ਸਦਰ ਦੇ ਏ.ਐਸ.ਆਈ. ਦਲਬੀਰ ਸਿੰਘ ਨੇ ਦੱਸਿਆ ਕਿ ਪਿੰਡ ਕੈਲੇ ਕਲਾਂ ਥਾਣਾ ਘੁਮਣ ਕਲਾਂ ਦੇ ਰਹਿਣ ਵਾਲੇ ਰਮਨਦੀਪ ਸਿੰਘ ਨੇ ਸ਼ਿਕਾਇਤ ਦਰਜ ਕਰਵਾਈ ਕਿ ਬੀਤੇ ਦਿਨ ਉਹ ਦੇਰ ਰਾਤ ਆਪਣਾ ਕੰਮ ਖ਼ਤਮ ਕਰਕੇ ਆਪਣੇ ਟੀਵੀਐਸ ਵਿਕਟਰ ਮੋਟਰਸਾਈਕਲ ਪੀਬੀ.18-ਕੇ-3478 ਰਾਹੀਂ ਆਪਣੇ ਘਰ ਵਾਪਸ ਜਾ ਰਿਹਾ ਸੀ | ਰਾਤ ਕਰੀਬ 10:30 ਵਜੇ ਜਦੋਂ ਉਹ ਬਟਾਲਾ-ਗੁਰਦਾਸਪੁਰ ਰੋਡ 'ਤੇ ਗਿੱਲਾਂਵਾਲੀ ਅੱਡੇ ਨੇੜੇ ਪਹੁੰਚਿਆ ਤਾਂ ਪੇਸ਼ਾਬ ਕਰਨ ਲਈ ਰੁਕ ਗਿਆ | ਉਸ ਨੇ ਆਪਣਾ ਮੋਟਰਸਾੲਹਕਲ ਸਟੈਂਡ 'ਤੇ ਲਗਾਇਆ ਹੋਇਆ ਸੀ ਤੇ ਨਾਲ ਬੈਗ ਟੰਗਿਆ ਹੋਇਆ ਸੀ | ਜਦੋਂ ਉਹ ਪੇਸ਼ਾਬ ਕਰ ਰਿਹਾ ਸੀ ਤਾਂ ਇਸੇ ਦੌਰਾਨ ਬਟਾਲਾ ਵਲੋਂ ਇਕ ਮੋਟਰਸਾਈਕਲ 'ਤੇ ਤਿੰਨ ਨੌਜਵਾਨਾਂ ਨੇ ਉਸ ਦੇ ਦੇਖਦਿਆਂ ਹੀ ਉਸ ਦਾ ਮੋਟਰਸਾਈਕਲ ਸਟਾਰਟ ਕੀਤਾ ਤੇ ਫਰਾਰ ਹੋ ਗਏ | ਬੈਗ ਵਿਚ ਉਸ ਦਾ ਕੀਮਤੀ ਫੋਨ ਤੇ ਜ਼ਰੂਰੀ ਸਾਮਾਨ ਸੀ | ਉਸ ਨੇ ਉਨ੍ਹਾਂ ਦਾ ਪਿੱਛਾ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਵਾਪਸ ਬਟਾਲਾ ਵੱਲ ਫਰਾਰ ਹੋਣ ਵਿਚ ਸਫ਼ਲ ਹੋ ਗਏ | ਪੁਲਿਸ ਨੇ ਅਣਪਛਾਤੇ ਵਿਅਕਤੀਆਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ |