ਧਾਰਕਲਾਂ, 5 ਮਾਰਚ (ਨਰੇਸ਼ ਪਠਾਨੀਆ)- ਪਠਾਨਕੋਟ-ਚੰਬਾ ਰਾਸ਼ਟਰੀ ਰਾਜ ਮਾਰਗ 154-ਏ 'ਤੇ ਪਿੰਡ ਦੁਨੇਰਾ ਮੇਨ ਬਾਜ਼ਾਰ 'ਚ ਵਾਹਨਾਂ ਦਾ ਭਾਰੀ ਟਰੈਫ਼ਿਕ ਜਾਮ ਦੇਖਣ ਨੰੂ ਮਿਲ ਰਿਹਾ ਹੈ | ਕਾਂਗਰਸ ਪਾਰਟੀ ਦੇ ਬਲਾਕ ਪ੍ਰਧਾਨ ਰਾਜ ਕੁਮਾਰ ਖਜੂਰੀਆ ਨੇ ਦੱਸਿਆ ਕਿ ਪੰਜਾਬ 'ਚ ਛੁੱਟੀਆਂ ਹੋਣ ਦੌਰਾਨ ਲੋਕ ਆਪਣੇ ਪਰਿਵਾਰ ਤੇ ਦੋਸਤਾਂ ਨਾਲ ਜ਼ਿਲ੍ਹਾ ਪਠਾਨਕੋਟ ਨਾਲ ਲੱਗਦੇ ਹਿਮਾਚਲ ਪ੍ਰਦੇਸ਼ ਦੇ ਜ਼ਿਲ੍ਹਾ ਚੰਬਾ 'ਚ ਸਥਿਤ ਸੈਲਾਨੀ ਸਥੱਲ ਡਲਹੌਜ਼ੀ ਵੱਲ ਵੱਡੀ ਗਿਣਤੀ ਵਿਚ ਸੈਰ ਸਪਾਟੇ ਲਈ ਜਾਂਦੇ ਹਨ ਜਿਸ ਕਰਕੇ ਧਾਰ ਬਲਾਕ ਦੀ ਸੜਕ 'ਤੇ ਵਾਧੂ ਬੋਝ ਪੈ ਜਾਂਦਾ ਹੈ ਤੇ ਲੋਕ ਧਾਰ ਬਲਾਕ ਦੇ ਪਿੰਡ ਦੁਨੇਰਾ ਦੇ ਮੇਨ ਬਾਜ਼ਾਰ ਵਿਚ ਖਾਣ ਪੀਣ ਲਈ ਆਪਣੇ ਵਾਹਨ ਬੇਤਰਤੀਬੇ ਢੰਗ ਨਾਲ ਖੜੇ ਕਰਕੇ ਦੂਰ-ਦੂਰ ਚਲੇ ਜਾਂਦੇ ਹਨ | ਟਰੈਫ਼ਿਕ ਜਾਮ ਵਿਚ ਅਕਸਰ ਐਂਬੂਲੈਂਸ ਤੇ ਦੂਰ ਦੁਰਾਡੇ ਜਾਣ ਵਾਲੇ ਵਾਹਨ ਫਸ ਜਾਂਦੇ ਹਨ ਤੇ ਲੋਕਾਂ ਨੰੂ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਸਥਾਨਕ ਲੋਕਾਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਟਰੈਫਿਕ ਸੁਚੱਜੇ ਢੰਗ ਨਾਲ ਚਲਾਉਣ ਲਈ ਟਰੈਫ਼ਿਕ ਕਰਮਚਾਰੀਆਂ ਦੀ ਦੁਨੇਰਾ ਬਾਜ਼ਾਰ ਵਿਚ ਸਥਾਈ ਤੌਰ 'ਤੇ ਤਾਇਨਾਤੀ ਕੀਤੀ ਜਾਵੇ |
