ਬੱਲੂਆਣਾ, 8 ਅਪ੍ਰੈਲ (ਜਸਮੇਲ ਸਿੰਘ ਢਿੱਲੋਂ)-ਹਲਕੇ ਦੇ ਪਿੰਡ ਹਿੰਮਤਪੁਰਾ ਵਿਖੇ ਬੀਤੀ ਰਾਤ ਕਰੀਬ ਢਾਈ ਵਜੇ ਤੇਜ਼ ਮੀਂਹ ਕਾਰਨ ਇਕ ਗ਼ਰੀਬ ਮਜ਼ਦੂਰ ਰੌਸ਼ਨ ਪੁੱਤਰ ਭੋਲਾ ਰਾਮ ਦੇ ਇਕ ਕਮਰੇ ਦੀ ਛੱਤ ਉਸ ਸਮੇਂ ਡਿੱਗੀ ਜਦੋਂ ਉਹ, ਉਸ ਦੀ ਪਤਨੀ, ਅਤੇ ਇਕ 2 ਸਾਲਾ ਦਾ ਬੱਚਾ ਉਸ ਕਮਰੇ ਵਿਚ ਸੌਂ ਰਹੇ ਸਨ | ਇਕ ਗਾਡਰ 'ਤੇ ਪਾਏ ਇਸ ਕਮਰੇ ਦੇ 2 ਖਣ ਸਨ | ਇਕ ਖਣ ਦੇ ਭਾਰੀ ਪੱਧਰ ਹੇਠਾਂ ਡਿਗ ਗਏ | ਪ੍ਰਮਾਤਮਾ ਦਾ ਸ਼ੁਕਰ ਕਿ ਪਰਿਵਾਰਿਕ ਮੈਂਬਰਾਂ ਦੇ ਮੰਜੇ ਦੂਜੇ ਖਣ ਹੇਠ ਸਨ | ਜਿਸ ਕਾਰਨ ਪਰਿਵਾਰ ਦੇ ਤਿੰਨ ਮੈਂਬਰ ਬਾਲ-ਬਾਲ ਬਚ ਗਏ | ਆਸ ਪਾਸ ਦੇ ਗੁਆਂਢੀਆਂ ਨੇ ਦੱਸਿਆ ਕਿ ਗ਼ਰੀਬ ਮਜ਼ਦੂਰ ਭੋਲਾ ਸਿੰਘ ਦੇ ਘਰ ਵਿਚ ਕੇਵਲ ਦੋ ਕਮਰੇ ਬਣੇ ਹੋਏ ਹਨ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ 8 ਜੀਆਂ ਦੋਨਾਂ ਕਮਰਿਆਂ ਵਿਚ ਰਹਿੰਦੇ ਹਨ | ਆਸ-ਪਾਸ ਦੇ ਲੋਕਾਂ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਉਕਤ ਗ਼ਰੀਬ ਪਰਿਵਾਰ ਨੂੰ ਬਣਦਾ ਉਚਿੱਤ ਮੁਆਵਜ਼ਾ ਦਿੱਤਾ ਜਾਵੇ |
