ਅਬੋਹਰ, 1 ਮਈ (ਵਿਵੇਕ ਹੂੜੀਆ)-ਭਾਰਤ ਸਰਕਾਰ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ 'ਮਰਦਮਸ਼ੁਮਾਰੀ 2027' ਦਾ ਜ਼ਮੀਨੀ ਪੱਧਰ 'ਤੇ ਰਸਮੀ ਆਗਾਜ਼ ਹੋ ਚੁੱਕਾ ਹੈ | ਅਬੋਹਰ ਪ੍ਰਸ਼ਾਸਨ ਨੇ ਇਸ ਵਾਰ ਤਕਨੀਕ ਦੀ ਵਰਤੋਂ ਕਰਦਿਆਂ 'ਸਵੈ-ਗਣਨਾ' 'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਹੈ | ਇਸੇ ਕੜੀ ਤਹਿਤ 'ਆਪ' ਦੇ ਹਲਕਾ ਇੰਚਾਰਜ ਅਰੁਣ ਨਾਰੰਗ ਅਤੇ ਐੱਸ.ਡੀ.ਐੱਮ.ਰਵਿੰਦਰ ਸਿੰਘ ਅਰੋੜਾ ਨੇ ਖ਼ੁਦ ਆਪਣਾ ਵੇਰਵਾ ਪੋਰਟਲ 'ਤੇ ਦਰਜ ਕਰਕੇ ਇਸ ਮੁਹਿੰਮ ਦੀ ਸ਼ੁਰੂਆਤ ਕੀਤੀ | ਹਲਕਾ ਇੰਚਾਰਜ ਅਰੁਣ ਨਾਰੰਗ ਅਤੇ ਐੱਸ.ਡੀ.ਐੱਮ.ਰਵਿੰਦਰ ਸਿੰਘ ਅਰੋੜਾ ਨੇ ਦੱਸਿਆ ਕਿ ਮਰਦਮਸ਼ੁਮਾਰੀ ਦਾ ਇਹ ਕਾਰਜ ਦੋ ਪੜਾਵਾਂ ਵਿਚ ਹੋਵੇਗਾ | ਪਹਿਲੇ ਪੜਾਅ ਮਈ-ਜੂਨ 2026 ਵਿਚ ਮਕਾਨਾਂ ਦੀ ਸੂਚੀ ਤਿਆਰ ਕੀਤੀ ਜਾਵੇਗੀ, ਜਦਕਿ ਦੂਜਾ ਪੜਾਅ ਫਰਵਰੀ 2027 ਵਿਚ ਪੂਰਾ ਹੋਵੇਗਾ | ਵਰਤਮਾਨ ਵਿਚ ਸਵੈ-ਗਣਨਾ ਦਾ ਦੌਰ 14 ਮਈ ਤੱਕ ਚੱਲੇਗਾ | ਇਸ ਤੋਂ ਬਾਅਦ 15 ਮਈ ਤੋਂ 13 ਜੂਨ ਤੱਕ ਗਿਣਤੀਕਾਰ ਘਰ-ਘਰ ਜਾ ਕੇ ਡਾਟਾ ਦੀ ਪੜਤਾਲ ਕਰਨਗੇ | ਮੁਹਿੰਮ ਦੇ ਪਹਿਲੇ ਦਿਨ ਫ਼ੀਲਡ ਟਰੇਨਰਾਂ ਦੀ ਟੀਮ ਨੇ ਵਿਧਾਇਕ ਸੰਦੀਪ ਜਾਖੜ, ਪੈਰਾ-ਬੈਡਮਿੰਟਨ ਖਿਡਾਰੀ ਸੰਜੀਵ ਕੁਮਾਰ, ਰਾਜਿੰਦਰ ਕੰਬੋਜ, ਅੰਸ਼ੁਲ ਬਤਰਾ ਅਤੇ ਜ਼ਿਲ੍ਹਾ ਪ੍ਰਧਾਨ ਉਪਕਾਰ ਜਾਖੜ ਨਾਲ ਉਨ੍ਹਾਂ ਦੇ ਨਿਵਾਸ ਸਥਾਨਾਂ 'ਤੇ ਸੰਪਰਕ ਕੀਤਾ | ਇਨ੍ਹਾਂ ਸ਼ਖ਼ਸੀਅਤਾਂ ਨੇ ਮੌਕੇ 'ਤੇ ਹੀ ਪੋਰਟਲ ਦੀ ਵਰਤੋਂ ਕੀਤੀ ਅਤੇ ਸਮਾਜ ਨੂੰ ਜਾਗਰੂਕ ਕਰਦਿਆਂ ਕਿਹਾ ਕਿ ਸਹੀ ਅੰਕੜਿਆਂ ਨਾਲ ਹੀ ਖੇਤਰ ਦੇ ਵਿਕਾਸ ਲਈ ਬਿਹਤਰ ਯੋਜਨਾਵਾਂ ਬਣ ਸਕਣਗੀਆਂ | ਮਰਦਮਸ਼ੁਮਾਰੀ ਦਫ਼ਤਰ ਦੇ ਅਧਿਕਾਰੀ ਰਾਜ ਕੁਮਾਰ ਅਤੇ ਪਵਨ ਕੁਮਾਰ ਨੇ ਦੱਸਿਆ ਕਿ ਨਾਗਰਿਕ ਆਪਣੇ ਸਮਾਰਟਫੋਨ ਰਾਹੀਂ ਵੈੱਬਸਾਈਟ 'ਤੇ ਜਾ ਕੇ ਖ਼ੁਦ ਨੂੰ ਰਜਿਸਟਰ ਕਰ ਸਕਦੇ ਹਨ | ਇਹ ਮੁਹਿੰਮ ਡਿਪਟੀ ਕਮਿਸ਼ਨਰ ਅਮਰਪ੍ਰੀਤ ਕੌਰ ਸੰਧੂ ਅਤੇ ਐੱਸ.ਡੀ.ਐੱਮ.ਰਵਿੰਦਰ ਸਿੰਘ ਅਰੋੜਾ ਦੇ ਮਾਰਗਦਰਸ਼ਨ ਹੇਠ ਚਲਾਈ ਜਾ ਰਹੀ ਹੈ | ਟੀਮ ਵਿਚ ਅਮਨਦੀਪ, ਗੌਤਮ ਗੌੜ, ਲਲਿਤ ਮਦਾਨ, ਕਪਿਲ, ਅਮਿੱਤ ਅਰੋੜਾ ਅਤੇ ਤੇਜਿੰਦਰ ਸਮੇਤ ਹੋਰ ਅਧਿਕਾਰੀ ਪੂਰੀ ਨਿਸ਼ਠਾ ਨਾਲ ਫ਼ੀਲਡ ਵਿਚ ਜੁਟੇ ਹੋਏ ਹਨ |
