ਬੱਲੂਆਣਾ, 2 ਜੂਨ (ਜਸਮੇਲ ਸਿੰਘ ਢਿੱਲੋਂ)-ਲੰਬੀ ਮਾਈਨਰ ਨਹਿਰ ਅਤੇ ਇਸ ਵਿਚੋਂ ਨਿਕਲਦੀ ਨਿਊ ਤਰਮਾਲਾ ਨਹਿਰ ਦੀ ਨਹਿਰੀ ਵਿਭਾਗ ਵਲੋਂ ਸਫ਼ਾਈ ਕਰਨ ਲਈ ਕੇਵਲ ਇਕ ਹਫ਼ਤੇ ਦੀ ਬੰਦੀ ਕੀਤੀ ਗਈ ਸੀ ਪਰੰਤੂ ਇਸ ਇਕ ਹਫ਼ਤੇ ਦੌਰਾਨ 26 ਮਈ ਦਿਨ ਮੰਗਲਵਾਰ ਨੂੰ ਸਵੇਰੇ 1 ਵਜੋਂ ਤੋਂ ਬਾਅਦ ਕਿਸਾਨਾਂ ਦੀ ਇਕ ਵਾਰੀ ਖ਼ਾਲੀ ਚਲੀ ਗਈ ਅਤੇ ਇਕ ਹਫ਼ਤੇ ਬਾਅਦ ਜਦੋਂ ਪਾਣੀ ਛੱਡਿਆ ਗਿਆ ਤਾਂ ਮੰਗਲਵਾਰ ਵਾਲੇ ਕਿਸਾਨਾਂ ਦੀ ਸਵੇਰੇ 1 ਵਜੇ ਤੋਂ ਬਾਅਦ 12 ਵਜੇ ਤੱਕ ਫਿਰ ਦੂਜੀ ਵਾਰੀ ਖ਼ਾਲੀ ਚਲੀ ਗਈ | ਕਿਸਾਨਾਂ ਨੂੰ ਪਾਣੀ 12 ਵਜੇ ਮਿਲਿਆ ਜਦੋਂ ਕਿ ਸਵੇਰੇ 1 ਵਜੇ ਪੂਰਾ ਪਾਣੀ ਮਿਲਣਾ ਚਾਹੀਦਾ ਸੀ | ਅਜਿਹਾ ਕਰਨ ਲਈ ਲੰਬੀ ਮਾਈਨਰ ਨਹਿਰ ਵਿਚ ਘੰਟੇ ਪਹਿਲਾ ਪਾਣੀ ਛੱਡਣਾ ਚਾਹੀਦਾ ਸੀ ਤਾਂ ਕਿ ਕਿਸਾਨਾਂ ਦੀ ਇਕ ਹਫ਼ਤੇ ਦੀ ਬੰਦੀ ਵਿਚ ਕੇਵਲ ਇਕ ਵਾਰੀ ਹੀ ਖ਼ਾਲੀ ਜਾਂਦੀ | ਕਿਸਾਨਾਂ ਨੇ ਦੱਸਿਆ ਕਿ ਇਹ ਮਹਿਕਮੇ ਦੀ ਵੱਡੀ ਲਾਪਰਵਾਹੀ ਹੈ | ਅੱਤ ਦੀ ਗਰਮੀ ਵਿਚ ਲਗਾਤਾਰ ਦੋ ਵਾਰੀਆਂ ਖ਼ਾਲੀ ਜਾਣ ਨਾਲ ਬਾਗ਼ਾਂ ਦਾ ਭਾਰੀ ਨੁਕਸਾਨ ਹੋਇਆ ਹੈ |
