ਅੰਮਿ੍ਤਸਰ, 14 ਮਈ (ਸੁਰਿੰਦਰ ਕੋਛੜ)-ਗਲੋਬਲ ਰਿਣ ਸੰਸਥਾ ਕੌਮਾਂਤਰੀ ਮੁਦਰਾ ਫ਼ੰਡ (ਆਈ. ਐੱਮ. ਐੱਫ.) ਨੇ ਪਾਕਿਸਤਾਨ ਨੂੰ ਵਿੱਤੀ ਸਾਲ 2026-27 ਦੇ ਸੰਘੀ ਬਜਟ ਤੋਂ ਪਹਿਲਾਂ ਵਪਾਰ ਆਧਾਰਿਤ ਹਵਾਲਾ ਰਾਸ਼ੀ ਵਿਰੁੱਧ ਤੁਰੰਤ ਅਤੇ ਸਖ਼ਤ ਕਦਮ ਚੁੱਕਣ ਦੀ ਅਪੀਲ ਕੀਤੀ ਹੈ | ਆਈ. ਐੱਮ. ਐੱਫ. ਨੇ ਵਪਾਰ, ਬੈਂਕਿੰਗ, ਰੀਅਲ ਅਸਟੇਟ ਅਤੇ ਗੈਰ-ਵਿੱਤੀ ਵਪਾਰਕ ਖੇਤਰਾਂ 'ਚ ਸ਼ੱਕੀ ਵਿੱਤੀ ਲੈਣ-ਦੇਣ 'ਤੇ ਵੀ ਚਿੰਤਾ ਪ੍ਰਗਟ ਕੀਤੀ ਹੈ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਨਵੇਂ ਵਿੱਤੀ ਸਾਲ ਦੇ ਬਜਟ ਦੀਆਂ ਤਿਆਰੀਆਂ ਦੌਰਾਨ ਆਈ. ਐੱਮ. ਐੱਫ. ਨੇ ਪਾਕਿ ਸਰਕਾਰ ਨੂੰ ਵਪਾਰ ਦੀ ਆੜ 'ਚ ਕੀਤੇ ਜਾ ਰਹੇ ਮਨੀ ਲਾਂਡਰਿੰਗ ਨੂੰ ਰੋਕਣ ਲਈ ਸਖ਼ਤ ਹਿਦਾਇਤ ਦਿੱਤੀ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਆਈ. ਐੱਮ. ਐੱਫ. ਨੇ ਬੈਂਕਿੰਗ ਖੇਤਰ, ਗ਼ੈਰ-ਵਿੱਤੀ ਕਾਰੋਬਾਰਾਂ ਤੇ ਹੋਰ ਮੁੱਖ ਖੇਤਰਾਂ 'ਚ ਸ਼ੱਕੀ ਲੈਣ-ਦੇਣ ਦੀ ਨਿਗਰਾਨੀ 'ਚ ਕਮਜ਼ੋਰੀਆਂ 'ਤੇ ਚਿੰਤਾਵਾਂ ਵੀ ਜ਼ਾਹਿਰ ਕੀਤੀਆਂ | ਦੱਸਿਆ ਜਾ ਰਿਹਾ ਹੈ ਕਿ ਆਈ. ਐੱਮ. ਐੱਫ. ਨੇ ਪਾਕਿ 'ਚ ਹਾਊਸਿੰਗ ਸੁਸਾਇਟੀਆਂ 'ਤੇ ਛਾਪੇਮਾਰੀ ਕਰਕੇ ਛੁਪਾਈ ਗਈ ਆਮਦਨ ਦੇ ਦੋਸ਼ਾਂ ਦੀ ਜਾਂਚ ਤੇਜ਼ ਕਰ ਦਿੱਤੀ ਹੈ |
